D-BLUE CH☆22 - 23 LAST by Sammy♤

 D-BLUE 22

by Sammy♤


CH☆22


"Aaa sawi sawi suh, ka lung i ti chhia" ka tih chuan "Ka nei che hi ka lawm êm a, sawi fo ka duh" tiin a rawn kun a, "Ka hmangaih che min ti lawk teh" tiin chiang fahran chuan min rawn en a.


"Sawi kher ngai lo, i hre ve vek" ka ti lai rût.


"Chaw ei ang" tiin ka tho zui hmak bawk.


"Mawwhhh... Sawi lawk teh, i sawi khât a ka hre chak" tiin ka hnunglam ațang chuan min kuah bet a.


"A ninawmmm.... min ti zak" ka ti a.


"Ka hmangaih che, ka hmangaih che, ka hmangaih che" tiin ka biang a rawn fawp mawlh mawlh a.


"Hmmm...."


"Nau ineih hma hian induat vul chûk ang" tiin amah chu a nui hawk hawk a.


"Nau i neih hunah chuan phir ngawt kan nei dawn si a, kan buai dawn lutuk" a ti leh a.


"Dam a kum khat an tlin hunah a dang kan ngaihtuah belh bawk anga" atih chuan ka beng a.


"Ninawm, chaw chu ei ang" ka ti hluk.


Nui hawk hawk in chaw ei chu a siam a. Tûm deuh lai deuh reuh siin chaw chu ka ei a, Zorema lah chuan min la nuih ang vur vur zel zui.


Kan chaw ei kham chuan tihfel ngai te chu ka tifel a. Zorema a intifai mek bawk.


Tihtur țul ka tih zawh chuan room ah ka lut a, Zorema chu a lo insiam mek.


"Lo kal ve la, kan rei dawn lo ania" atih chuan "Aa ka chhuak peih lo" ka ti a.


"Dawr ah kan kal zawk anga, ka nu te rawn len an tum a kan haw leh vat dawn lawm" a ti leh.


"Kawng a la tawt awm si, duh ai rei kan va thang anga" tiin ka hnial leh a.


"I lo kal ve chuan i duh duh ka lei ang che. Ee! Naute thil vel te kan en bawk anga, a țha dawn asin. Room chei danglam dan tur te hi i ngaihtuah tawh em ?" tiin min tihphur tum zet chuan phur hmel deuhin a ti a.


"Tih danglam vak angai em ni? Tihian a țha tawk viau alawm" ka ti a.


"A light lo e. Khum te hi a thar siam tir ila, naute kan neih hunah chuan pali ngawt kan mu dawn sia" a ti leh.


"Aaa... a zau tawk em hi" ka tih veleh chuan "I mangchhe sia, pali kan nih hunah chuan a zau dawn teuh lo. Hmun i awh zau si" a ti leh.


"Insiam la kan rei dawn lo ania, wallpaper hi thlak ila țha ang. Naute thil vel en pawh a țha hrim hrim" tiin closet chu a va hawng a, "Ee a ngai lo, tikhan i mawi tho" tiin a khar leh hmak.


"Kal ang, pheikhawk bun la" a ti a, ka chet hma hma in amah chuan pheikhawk chu a rawn la a, min bun tir leh thlap.


Ka bag ken tur ah chuan eng eng emaw dahin min kai a, "I duh duh ka lei ang che" ti chuan min han thlem leh a, ka kal ve a phût lutuk chu ka hnial duh ta lo.


In chu kalh țha in kan inkhalh chhuak a, a hma seat a ka țhut duh tlat loh avangin a hnungah chuan ke hlangin ka țhu diai.


Cindy ka bia a, sawi tur a ngah thei bawk a, a chanchin chu zawh ngai hran lovin a sawi par par.


A chhukthlak tuk a a bialpa in a lenpui thu te a sawi a, neih ngei a tum thu te a sawi bawk.


Dawr kan thlen hnu pawh chuan kan la inbia a, a duhtawk a sawi hnuah kan dah ta hram.


Zorema chuan lehkhabu hralh dan leh hawh chhuah dan tlangpui chu a en fel a, rei lo ah dawr ațang chuan kan inkhalh chhuak lehnghal.
.
.
.
Ka duhtawka kan bazar hnu chuan kan haw a, nau puan tur pawh ka en leh bawk a, naute thil tur kan in lei țeuh.


In ah chuan UTetei a lo awm tawh a, kan thil lei te chu min thiar luh puiin eng eng emaw a sawi a, a nui huah huah.


Rawng a lo bawl mek a, midang pawh an rawn thlen har loh tur thu a sawi bawk.


A sawi ang takin rei loah an rawn thleng a, ka nu leh pa leh  naupang te chauh an ni thung.


Ka nu chuan min kai hrangin lawmthu min hrilh mawlh mawlh a, Zorema ka ngaihdam avang leh ka haw leh duh avang te chuan lawmthu min hrilh mawlh mawlh a ni mai.


><><><><><><><><>TIME SKIPPP



Hun a liam zung zung a, ka naupai an lian in nau neih pawh hnai vet vet tawh tak a ni.


Zorema pawhin nau neih chawlh a la a, Principal in "In nu in ania nei dawn, a nei lo turin chawlh lak i tum daih a" tiin a lo fiam nghe nghe.


Ramtei leh kan nupa tehrawt in kan awm a, Zorem an ka nu a koh tlat avangin ka nu rawn kal a tum a, mahse ka pa dam țhat chiah loh avang in a rawn kal lawk thei lo thung.



Zorema chuan ngaihsak leh duat namen lohin min duat a, achang phei chuan ka vin leh hluk phah țhin.


Min hmangaih thu tawp lovin a sawi chamchi reng a, ka tel lova a chhuah hlek lahin minute rei lo te pawh nise min rawn call in min ngaih thu a rawn sawi hman ngei ngei bawk.


Hetiang taka min ngaia ka beisei chhuah ka rin ngai miah loh dana min hmangaih viau hi ka lawm a. Kan inneih thutiam ka vawn hram hram vanga thleng ka ti lo thei lo.


Kan thutiam kha vawng tlat lovin hmanah khan lo țhen ta ila, hetiang hian kan hlim kher lovang'a, midang tawnin nun thar țan pawh ni ila Zorema ang taka min hmangaih thiam hi ka tawn kher ka inring lo bawk.


Ka tawrh zozai te ka ngaihtuah a, midang aia tuar hnem bik chu ka ni lo. Mahse ka tawrh ngaihtuah chuan ka hlimna tawn hi phu ka inti a, ka hlimna hian kumkhua daih ngei se ka ti bawk.
.
.
.

Nau puan chu thleh țhat paha chhiar in khumah chuan ka țhu a, Zorema erawh ka nu rawn thleng a va hruai thung.


Naupuan chu Zorema lo lei sa bakah ka lei belh leh avang khan 130 lai mai a ni a, tam ka ti lutuk chu dahțhat țhen chi zawk emaw ni aw tih te ka ngaihtuah.


Drawer awl ah chuan ka dah lut a. A chunglam chu ka dah thei mai a, mahse a hnuailam chu ka kun thei tawh lo.


"Ramte" Ramtei chu ka au va, a rawn ei mai thei lo.


Room kawngkhar chu hawng zau vin ban vuan țai chuan ka ding a, mahse sitting room a lo țhu kur ka va hmuh avang chuan ka chhuak law law a, "Enge i rawn tih ?" ka ti hmuk.


"Naupangin ai upa te zahloh taka biak tur a ni ngai em ni ?" zahna  chhete mah nei lek lo chuan a ti a, nui hakin "A ve khanglang a, nula pangngai in mi pasal an ngaizawng ngai em ni ?" ka ti veleh sak.


"Kei ni lovin i pasal hian min duh tlat si a, tih theih ka nei lo em a ni" te chu a la ti deuh deuh.


"Awiii, ka zak lutuk!!" ka tih chuan "Nia zak tur i ni. Mi inngaizawng țha hle hle inkarah rawn tla zepin...." a tih lai chuan "Nangma tan ania ka lo zah. Ka hrilh mai mai ang che Zorema hian duh tak tak che ni se kei min nei lovang. Ahmaa Zorema lo hmangaih ve țhin na che kha chu ka bula a tihdan tur a rawn practice țhin anih kha"  ka tih chuan a rawn ding a, kei aiin a sang zawk sia kawng dawm al chung chuan ka melh chho kar.


"I va han zaktheilo, nau hi pai lo ni phei la chuan...." a tih lai chuan kawngka lam ațang chuan "Kan lo thleng e" ka nu âw ka hria a.

"Ee kha inleng i nei law ?" tiin kan bul chu a rawn pan.


"I nau pai nen hian thi rawh u" a sawi zawh rual deuhthawin min min nam a, ka mawng sawh dawta chhuatah țhu hnawpin ka thal tawp tur chu ka nu chuan min rawn man hman a, ka insawh chawrh chuan ka pum a sawh chho a, ka pum chhung ami chu an che lawih ni hian ka hria.



Nâ in min rawn tuam nghal a, ka kap ațang chuan thisen a rawn chhuak bawk a "Nu" tiin ka rum nghal hlat hlat.



"Awi awi awi.... Duatpui... Lo tlan teh uuuu" ka nu chual a ti nghal chûl a, ka pum rawn na lutuk chu țawng pawh ka țawng peih lo.



Zorem an zo zetin min rawn pawm nawlh a, ka neih hun hnai tawh viau mah se ka neih ala hun si loh avangin keimah chu ka hlauthawng hle a. A nat piahlamah ka pum chhung ami te chu nunna nei lo in ka hring chhuak mai ang tih hlauhthawnna nen ka țap pur.



Zorema chuan seat hnungah min hlangin ka nu a rawn lut ve nghal a, Zorema chu kawh lutuk in a tlanchhuak nghal.



"Kan thleng țep ania aw Duati, tuar hram hram rawh" ka nu chuan min thlamuan mawlh mawlh a.



"Nu ana êmai" tihzawng ka sawi a, ka pum chhunga awm te chu an insual ta mai emaw tih turin a na a, na zual lai bik a rawn awm leh zawk zawk țhin.



ZOREMA POV.



Duati thisen nena țhusawp niai chu ka pawm a, motor ah hlangin hmanhmawh zetin damdawiin lam panin ka inkhalh chhuak nghal.



Duati chu a rum deuh hlat hlat a, ka hmanhmawh leh hlauthawng lutuk chuan ka speed pawh chu ka ngaihsak hman lo. Ka tlan pur pur a, hmanhmawh nak alai chuan kawngah motor an lo ti ding a, traffic jam chu a ni loin tute emaw insu inhnial mai mai an ni.



Ka chhuk a, "Midang tibuai lo zawng hian a sawifel thei lo em ni ??" chumi te lam hawi chuan ka va ti vin tuar a, midang te pawh chuan min en țhap.



Motor chhung ațanga Duatin min ko ri chu ka hria a, ka hmanhmawh zual em em mai.



"In motor te hi hung sawn rawh u, nangmahni avanga ka nupui leh ka fa ka chân anih vaih chuan...." ka tih lai chuan pa pakhat hian "Ee insum teh țhiana" a rawn ti a.



"Kha kawng lo kian teh ang u, a motor ah hian nau vei an awm ania" tiin chupa chu a au lauh lauh a, a rem dan ang ang chuan kawng chu min kian thei ta hram.



Hmanhmawh zet chuan tlan leh nghalin  damdawiin kan thleng a, Duati chu an lo buaipui vat.



Nau neihna roomah an hruai lut a, mahse rei loah doctor chu a rawn chhuak leh a.



"Dinhmun a țha lo tlat, naute pakhat zawk hi a khamphei zawngin a awm a, a hring chhuak ve thei dawn tlat lo" a rawn ti a.



"Enge awmzia? Engtin nge chutiang chuan a awm theih? Anih chuan kan fa chu kan chân dawn em ni !" ka ti a. Ka hlauhthawn leh mangan zia chu ka âw khur lek lek ațang chuan a hriat viau.



"Pakhat hi chu a hring chhuak mai thei anga, mahse pakhat buaipui chhung hian a khamphei zawnga awm hian nunna a lo chân hman dawn a. Keimah lam ațang chuan hrin kher lo a inzei pawi inti lo anih chuan naute dam ve ve nan zei mai țha ka ti"  a tih leh chuan "Doctor zawk i ni a, țha i tih dan ang khan ti rawh. Mahse Duati..." ka tih lai chuan "Engkim a țha vek ang" a ti a, a lut leh a, Duati chu an rawn nawr chhuak leh.



"Tuar hram hram rawh aw Duati" tiin a kut chu ka chelh a, "Zoremsang" ka hmingpum ngat chuan min ko lawl a.



"A na rei tawh lovang" tiin a chalah chuan ka fawp a, zei tur chuan an in nawr lut lehnghal.



Ka nu leh pa an rawn thleng a, Duati nu chuan chanchin a'n hrilh a. Kei ka melh ngai melhin ka țhu ngawi reng a, ka rilru chuan ka țawngțai mawlh mawlh.



Nakin deuhah chuan "Zorem khanu kha tunge ni ngai ?" Duati nu chuan a rawn ti a.



"Azualtei anih kha" ka tih chuan ka nu chuan "Engaa? Azualtei chu engtin nge i hriat theih a ?" Ka nu chuan Duati nu chu a zawt a.



"Awi awi awi, a nasa emai. Duati kha a namtlu lawm" Duati nu chuan a ti a.



"Awi maw awi mawww.....Duati hi nau vei pangngai emaw ka ti a, a ni nange ?" ka nu chuan a ti a, "Ngaihtuah chiang lova pawngpaw dai man chu i nupui fanau ten an tuar zel mai dawn a ni maw ?" ka pa chuan a rawn ti veleh a, ka pa țawngkam chuan min ti nghing dawt a. Inthiamlohna leh inchhirna hlirin ka khat.


Kan inneih tirh khan lo runluihin nupui neih avanga Azualtei țhen kha tlawmah la lovin han țhen ni ila, Duati min hmangaihna kha ka lo hmu thiam hma ni ila chuan hetiang tehnuai hian kan awm lo tur.


Ka pa țawngkam chuan min ti zak ngawih ngawih a, Duati ka phu loh ngawih ngawih zia hi a ti chiang em em bawk.


D-BLUE 23
by Sammy♤


CH☆23 LAST



ZOREMA POV.


Darkar khat dawn hnuah inzaina room ațang chuan nurse pakhat hi hmanhmawh zetin a rawn chhuak a, eng emaw kengin hmanhmawh tawk bawkin a lut leh.


A luh hnuah nurse dang chu nau puan var nen a lut veleh a, an luh ațang rei loah chuan naute țap ri kan hre ta.



Kan phu suau a, inzei na room kawngkhar bulah chuan kan ding deuh țhap.



"Naute kan nei ta anih chu" tiin ka nu leh Duati nu chu an inchibai a, Pu Kung'an a naute hming atana a duh min hrilh kha ka hrechhuak nghal.



Pa ka ni ve ta nih chu ka rilru ah a rawn lut a, ka khi sak.



"Pa ka ni ve tawh ania ka nu" ka ti a,  "Ni e, i puitling ve tak tak tawh anih hi" ka nu chuan a ti a, Duati nu bulah chuan "Hetiang taka fanu țha leh dawhthei min pek avang hian kan lawm takzet zet a ni. I fanu hi awm lo ni ngat se chuan kan Zorema hian puitlin ni a hmu ve awm si lo" ka nu chuan a ti a, Duati nu chuan nui chungin "Aaa a aa chutiang an sawi ngai lo, hlimni anih hi hlimni" a ti a, Duati leh naute te rawn chhuah hun chu kan nghak a ni ber e.



Duati chu a țha ngem tih ka ngaihtuah a, chutiang bawkin naute te pawh chu an țha angem?



Naute te hmel chu ka hmu chak a, mi enge an nih te, an hmelhmang put tur te chu ka hmu chak tawh lutuk ringawt.



"Hmeichhia ni se, min chhun ta se an hmelțha tho angem le ?" ka tih chuan ka pa chuan nui chungin "Nangpawhin mipa ni chungin i nu zawk i chhun daih tho a, i hmelțhat tho kha" a ti a.



"Fate chu nu leh pa mitah chuan kan țha reng alawm. Țha min ti viau mah ula Duati chuan țha min ti ve tehchiam hleinem" ka ti a.



"Aaa a aa... Chutiang sawi hun lo. Tupawh chhun se, eng mi pawh nise dam takin an rawn piang tawh a lawmawm vek" ka nu leh Duati nu chuan an lo ti a, nichin maia kan hlauhthawnna kha chu vawm bo an duak. Naute țap ri kan hriat vang ringawt khan kan nui dar dar thei tawh tlat.



Rei loah nurse pahnihin naute chu an rawn pawm chhuak a, ka pawm a. Nurse chuan nuisangin mipa ve ve an nih thu a sawi a, an hmel ka hmuh chiah chuan ka khawvel hi a par chuai chuai nimai hian ka hria.



Nausen an la ni a, ka pawm zawk chu an lachhuah hmasak zawk. A dik zawnga awm zawk anih thu an sawi a. Ka nu in a a pawm zawk chu awm dik lo zawk, a khamphei zawnga awm zawk kha a ni thung.



Ka naute pawm chuan a chal ti chuar tapin a rum țiah țiah a, a chal rawn ti chuar ve ringawt te chu kan nuihpui a, kan hlimpui nghal em em.



Up lum an ngaih phawt thu sawiin an la leh a, ka nu te ho chuan an zui a. Keiin Duati chanchin sawi tura Doctor rawn chhuah hun chu ka nghak ran.



Minute nga hnu velah an rawn chhuak a, Doctor chuan min lawmpui thu sawiin keiin lawmthu ka hrilh a, Duati chanchin ka zawt nghal bawk.



"A la rawn harh chiah lova, rin aiin thisen a hlauh hnem dawn niin a lang a mahse hlauhthawnawm lutuk chu a ni lo ania. A rawn harh vat ang. Cabin awl kan neih loh avangin ward pangngai a in awm mai angaih hmel" a tih zawm pat a.



"Ward..." ka ti hman chauh tihin "A hreawm loh ang, ward ah damlo kan ngah vak lo" Doctor bawk chuan a ti leh a, a kalsawn nghal mai.



Room pawn ațang chuan ka en a, a luh theih siloh avangin chutia en chu ka tih theih tawk a ni rih.



Doctor leh male nurse țhenkhat chu rawn kal lehin Duati chu an rawn nawr chhuak a, ward lamah chuan kan inzui phei a.



A sawi ang takin damlo pahnih vel leh a awmpuitute nen ward ah chuan mi damlo an nei lova.



Mahse puan zar hliah vek chu ka duh avangin kan zar vek a, Duati bulah chuan ka țhu deuh ran.



A thlan chhuahna chu ka hru fai a, a dang bei mai.



Ka en reng a, ka nupui, ka fate nu, ka chhuang takzet. A chalah ka fawp a, lawmthu hrilhin ka phun sap.



Ka nu te rawn letin Duati chanchin chu min zawt a, a la harh lo tih an rawn hmuh chuan an hrethiam mai.



"An thla te ka la e ka tia hei, an hmelțha asin" ka nu chuan a phone chu a kungzungchal a hmeh hmeh mual mual pah chuan a ti a, "Aaa, nausen hmel bak an la put loh kha" ka pa chuan a lo ti a.



"Lo ngawi mai mai țhin teh, Mama leh Tetei kan thawn ve nge ?" ka nu chuan ti hlukin "Engtin nge ni kha? Ti hian em ni thlalak kha an thawn țhin" amah bawk chuan a tih zawm.



"Khawmaw han la teh" tiin ka pa chuan a en pui a.



"Zorem zuk intifai la, i kawr te kha zuk thlak rawh. Kan awm hi, Duati pawh rawn harh har tawh lovang" Duati nu chuan a lo ti a.



Ka kawrah chuan Duati thisen kha a lo kai tih ka hre ve chiah.



"Kan awm law law zawk ang, nangmahni kha zuk haw ula...." ka tih lai chuan "Zuk intifai la, i rawn kal leh hunah an hming phuah te pawh angai dawn a, zuk haw vat
zawk rawh" an tih leh tlat vang chuan ka haw ta a.



In ka thlen chuan ka beisei loh deuhin ka û te an lo awm a, Tetei chu a lo la inhrosa.



"Țha takin an piang tih hre lo ila chuan a ke te kha khawn tliah sak ania ka tum" a phone en pahin a lo la ti hmuar hmuar a, Mama chuan "Insum țhin teh, a mawi lo țhin emai" a lo ti ve bawk.



"Enge hetah intih teh țhup a" tiin ka lut a, "Hnawk kan lo thian, Duati chu enge a an a ?" Tetei chuan a lo ti a, Mama chuan "Mipa ve ve maw? In ti țha e" tiin ka dar a beng thuk thuk.



"Hawlh thiam zak zak khawp mai, mahse a nilo zawka lo hawlh ni la chuan i ngunhman kha mizopa chem ngatin ka sat bung hmawk ang" Tetei chuan a rawn ti a, ka ip deuh chawih.



"I rapthlak thei lutuk" ka ti a, "Ni e, hmeichhia ber si hi. Damdawiin lamah han chho ve teh ang" Mama chuan a ti a, chhuah mai an tum lai chuan "Naute thlalak kha min lo thawn ve teh" ka ti a, nui chunga lu bu nghatin an chhuak zui.



Ramtei chuan naupuan leh thil dang Duati thawmhnaw a lo pack mawlh mawlh mai a, min hmuh chuan "I lo haw a, lo kal ka tum a" a ti a.



"Immm ka intifai lawk anga, kan kal dawn ania" ka ti a. Tetei-in naute thlalak min rawn thawn chu entir ve in "Mipa ve ve an nih hi, an hmelțha tiraw ?" tiin ka en tir a, "Aw... intifai rawh" tiin room ațang chuan a chhuak a.



Thlalak chu en in ka nui vur vur phawt a, WhatsApp status chu vawikhat nan up ve in ka fate thlalak chu ka hmang a. Caption ka nei lo, an thlalak chu ka hmang mawl tawp a. An ni avanga ka lawmna inbelhchhah dan leh ka hmangaih si zia chu mihring țawng hian a sawifiah zo tlat lo.



Damdawiin kan thlen leh chuan Duati chu a lo harh tawh a, naute chu a chhiat ta mai emaw tiin a lo țap vak a, ka nu ten an thlalak nen lam an hrilh hnuah a țap bang thei ta chauh hi a lo ni.



Nau hming tur chu kan han ngaihtuah hlawm a, Duati pa chuan a upa zawk chu Liansangpuia Liansangpuia tiin a rawn phuah a, kan pawm tlang viau.



Ka pa in a naupang zawk chu rawn phuah lehin "Phir an ni bawk a, a nau zawk chu Rinsangpuia ni rawh se. Liansangpuia tih chu a mawi viau mai, mahse ral ațanga hming phuah hian phuah belh angai țhin. An rawn phuah ang ang kha chuan an put tir ngai lo" a rawn ti a.



"Anih chuan Jerome tih belh ila, a nau zawk pawh Victor tih i belh ang u"  Teteiin a rawn ti leh a, kan pawm tlang viau a. Duati pawn sawisel a nei hran lo.



DUATI POV.



Damdawiinah nithum zet kan awm hnu chuan ka inzaina leh thi put pawh a zia viau tawh a, chhuak mai tur pawhin kan inring tawh viau a. Mahse Victor-a zawk chu ni nga tal up a ngaih thu Doctor in a sawi avangin kan la nghak a ni a, ka neih hun aia karkhata hmaah ka nei a ni a, mahse vanneih vang liau liau in țha takin an rawn piang a. Harsatna lian lutuk a awm hi lo hi a lawmawm lutuk ringawt.



Jerome-a zawk chu kan pawm theih anih avangin tu emaw ber pangti lum a si chât reng a. Lawm a hlawh mawlh mawlh bik khawp a, nuih nachang han hre tawh ni ngat phei se chuan nau awi leh nui ri in kan ri teng tung țhin tawh ang.



Zorema phei chuan a pawm reng ti ila ka sawi sual lovang. A pawm a, a awi dur dur a. Chhaih nui thei mang si lo in a chhaih reng a, a khât tawkin thla a laksak leh țhin bawk.



Hauh chi a ni lova, han inkhap chi a ni hek lo. "Ka hlim tih bak in ka hlimna hi ka sawichhuak thiam lo" a tih khawpa hlim kha a ni a. A upat tawh akara a fa hmasa ber an nih bakah mipa an ni ve ve lehnghal si a, a awmdan pawh chu ka hrethiam viau mai.
.
.
.
Victor-a chu hnute pek hunah chuan hnute pe turin Zorema nen kan kal a, ka nu te pahnih in Jerome-a an lo awmpui thung.



Victor-a hnute hne dawk dawk chu kan en kar a, Zorema chuan "A kut te hi a tê e.... hetiang hian tiat lek hi ka lo ni ve awm țhin sia" tiin a kut leh ke chu a lo en kual chhen.



Ka hnute tui chu a duhthusam in a tam vak lo nge a hne tawp daih a, a lehlam ka hnêk tir leh a a hne chhunzawm veleh mai.



"Hnute tui tih tamna ngaihtuah a ngai. Bawihpui an a hne veleh duh anga. Anih loh pawhin pakhat zawk zawk hian i hnute tui lo an rin a ngai dawn anih hi" Zorema chuan a ti hap .



"A ngai lovang, kan dam anga an hnêk khawp chu ka nei em em ang. Keimah ațanga chhuak an nia, an mahni chawm zo turin ka taksa hi a insiam vek tawh" ka ti a, Zorema chuan min en in a kiai suk ringawt.



Kan pek zawh chuan țha deuha mutthilh tir lehin ward lam kan pan leh a, naute țap ri ka hriat avang chuan Jerome-a chu a lo tlei lo hman anih ka ring a.



Mahse ward kan luh veleh a thil thleng chu maw Jerome-a ka nu pawm lai chu Azualteiin a lo chuh a, Azualtei chu hnunglam ațangin Zorema nu in a lo pawt ve bawk a, Jerome-a chu a țap bawk.



"Bawiha lo tlan teh!!" Zorema nu chuan a ti chûl a, kan ving phei fua hi a ni ber.



Jerome-a chu ka la a, ka thiam ang tawk chuan awi in ka thlem a, nû kut leh âw chu a hre ve nge ni a țap bang mai.


Zorema te chu ka en a. Zorema chuan Azualtei  chu ka nu a vawnna ațang chuan a pawt hrang hlawk a, a zak kau meuhin a biangah a beng ri țhuai a, Azualtei chu a țhu thlep hnawk.



Jerome-a chu rawn ţah leh tum niawm takin a rawn ngîk leh deuh a, "Shhh... shhh.. hmm hmm hmm" ka awi su leh nghal dur dur.



"I va han rapthlak ve...." tih chiah a sawi hman tih chuan Azualtei chu a biang hupin a rawn hawi chhuak a, "Zoremsang ka nei ang che i tih kha i hria em ??" a ti tuar.



"Vawikhat chhe te zeuh mah hi ka neih tur thu che ka sawi lo. Neih tumna che pawh ka nei hek lo. Nun nuam taka i la hmang ve duh te anih chuan kal nghal rawh" Zorema chuan a ti ve țhawt a.



"Mipa rinawm lo lutuk. Hre rawh, i pasal hian midang lakah a la rinawm loh san tho tho ang che...." keimah min melh kal chuan a rawn ti leh a, Zorema chuan rapthlak zawk khawpa awrâwl ring hian "A tawk ka ti a ni lawm ni?" tiin Azualtei chu a phih tho leh lawp a, a hma ai nâ tur zawk mah in a beng leh a, a ban ah man tlat lo se chuan Azualtei chu a thal leh tawp ngei ang.



Jerome-a chu a rawn țap leh a, kan boruak tehnuai chu ani naute tan mai chuan han țahpui loh chi pawh a ni lo.


"Eee... insum teh u.... Kha midang in ti thlabar e" tiin Doctor leh guard pahnih hi an lo lut a, guard chuan Azualtei chu an hruai a, Doctor leh Zorema chu an inzui chhuak bawk.



Jerome-a pawm chuan khumah chuan ka țhu a, hnute pek ka tum a a duh si lo. A țap chu a bang duh der bawk si lo.



Ding chung te chuan ka'n awi a, a bang thei reng reng lo.


Ka nu te chuan min han lak sak a, tu kutah mah chuan a tlei duh der lo.



Zorema lo lut leh chuan a rawn la a, Zorem an a pawm hnu deuhah a țap bang nghal hmak.



"A va han khirh kher kher, a pa a duh bik dawn anih kha" Zorema nu chuan a ti a.



"Khanu kha hnaih reng reng tawh suh u. A rapthlak emai" ka nu chuan a lo ti thung.



Zorema chuan mitmeng pha dai hian min rawn en a, ka en lo kur avang chuan nge Jerome-a lawm chuan a hawisawn nghal daih.
.
.
.
Ka nu te an haw a, kan nupa leh naute nen chuan kan awm a. Mu chungin naute chu hnute ka pe a, Zorema chu khum bula a țhu bawk.



"Engtin nge Azualtei kha i tih tak ?" ka tih chuan min en zawk a, hawi sawn lehnghalin "Min rawn tibuai tawh lovang" a ti ringawt a.



"Min en teh Zorem. Azualtei sawi ang khan hmeichhe dang lakah hian min rinawm loh san leh mai ang tih ka hlau" ka ti a.



Ka mit a chiang taka min en in "Midang thusawi avang mai mai in i rilru ti hah suh. Fate kan nei tawh a, fate tana pa entawn tlak nih tum laiin chhungkaw ti keh darh leh i rilru ti na zawnga ka awm ring suh. Neitu che nih hi ka intithei a, ka inchhuang a, ka phatsan phal lo che. I na hmel ka hmuh chuan a aiin ka lo na ve zel țhin" a ti a, ka ring nghal thlap.



"Ka hmangaih che, ka hmangaih reng ang che nga, ka ta, ka fate nu i ni reng bawk ang" a ti a, ka chala fawp in intihtheih hmel tak chuan a nui suk.

><><><><><><><><><><><><

Damdawiin ațanga kan chhuah hnu chuan nau lawm na kan nei a, Zorema te fapa chuan an lawm fal hle.



Victor-a zawk chu a sawngnawi deuh zawk avangin keimah tehchâwt chuan ka pawm a, amah pawhin kei tih loh duh a nei mang lo.



Jerome-a erawh Zorema fa bik awm ngawih ngawih a mawi a ni.



Hnute ka pek lai tih loh chuan ka chang mang lova, zing lamah hian ka pe zawk a, abak chu siamchawp hlir a hne mai țhin.



Thla thar anih apiangin Zorem an an mudun lai thla a laksak țhin a, an len huna en atan tiin a print chhuak a, an unau ulbum tur bîk leiin a dahțha thlap thlap țhin.



Hun a liam puat puat a, kan fate pawh thla nga lai an tlin veleh tawh.



Zorem an hna a țan leh tawh avangin ka buai em em a, Zorem an nauawm tur dang lak belh a duh laiin ka rem tih chiah loh avangin kan la ta lo phawt a. Nitin chuan Ramtei nen kan in awm tluantlin ve thei mai zel.



Zorema a hna ban veleh khawiah mah kawi lovin a rawn haw nghal țhin a, traffic a jam deuh chuan a rawn phun haw ngei ngei țhin.



Ani aiin nau khawih ka zei lo daih a, achang chuan min hau lek lek țhin a, mahse inhauh chi a ni in a hre chiah lo nge thaw hawk in ka nau bual lai te hi aman a rawn bual leh tawp țhin.



Kawng engkimah a rintlak zia a ti lang a. Ka rin leh beisei aiin min hmangaihna a tilang thiam a, ka beisei phak loh leh a landan ang aiin min ngaihsakin a rinawm tih ka hre thar bawk.



Ahma ka hriat ngai miah lo a puitlinna chu a rawn lang chhuak zel a, pa țha nih a tum zia lah chu nasa tak a ni.



Mut hmunah hian a thil ruahman lawk dan min hrilh malh malh reng țhin a, achang chuan amah hi ka nupui ni zawk awm țhin tak a ni.



Zorema țawngkam takin.... A hmangaih nih hi a nuam a, a hlimawm in famkim lohna khawvelah hian a hmangaihna hian min ti famkim bik riau in ka hre țhin.



4Years Later ♤♤♤



"Le le le.... ding țha ru le"  Zorema chuan a fate pahnih ding kawi tlat chu ding țha turin a'n ti a. Victor-a zawk chu a ding țha mai a, Jerome-a zawk chuan a kut chu a lu chungah la dah lui tlat.



"Bawihpui i kut dahțha la, i nu lam saw hawi rawh le" Zorema chuan a'n ti leh a. A biang ti puar in a la ding țha duh chuang lo.



"Ding țha rawh Liansangpui" ka va ti vin deuh a, men nghal pûr in a ding țha a, an pafa thum chuan an school luh ni hmasa ber hriatreng nan chuan thla chu ka lak sak a.


"In van mawi em em aww" tiin thlalak chu ka en a, Jerome-a zawk chuan Zorema chu bawh in piai hrep ang mai hian a țap nghal hluam hluam a. Victor-a erawhin min rawn pan in "Anu a û țap" tiin a û țah thu chu a rawn sawi a, a pa fe lamah chuan tlan pheiin a û țap chu a va kuah a.


"Bang rawh bang rawh.... Ka tlangval tawh i ti sia tinge i țah" tiin Zorema chuan a thlem a, chhuah vang em em a țap a ni lo bawk a Jerome-a chu a bang nghal mai.


Zorema chuan Jerome-a chu a pawm kang a, "Apaa" tiin Victor-an a en chho kiau.



"Jerome-a hi duat bik viau țhin suh. I duat leh lutuk a i ti pangchang khawlo zo vek tawh" tiin ka pan phei a, Victor-a chu pawm in motor lam ka pan pui nghal.



Kum 3 an pum ve tawh a, Zorem an pre-school kal tir a kum thar ațanga school pangngai luh tir a duh a.


Vawiin an ni hmasa ber tur a ni a, Victor-a zawk chu a têtlai ațang tawh a zawiawi zawk tih takah school an kal dawn tih a hriat pawn a awm mai mai a, Jerome-a zawk bawk hi a za cheng thung.



Phir ni si hian mi hran hlak ang mai hian Jerome-a zawk hi a harh em em a, țawng pawh a țawngthei hma zawk in kal pawh kum khat an tlinhma hret in a kal thei a. Victor-a erawh a hnukhawiah rawn țang zel in kum khat leh thla hnih a nih hnu ah rawn kalthei chauh thung.



Mahse kum hnih an tlin hnu kum thum an hman mek laiin Victor-a zawk hi a rawn țhang ve deuh a, Jerome-a nen intiat thawthângin min chhun a Jerome-a aiin a hmelțha zawk mah.



Jerome-a erawh a pa nen an in awm nasa bawk a, Zorema hmel chiah chiah a ni thung.



School lam pan chuan kan inkhalh chhuak a. Naupang chu a hnungah țhu in Jerome-a zawk bawk chu a su leh dawt dawt țhin a, Victor-an a țhutna ațangin a en tawp bawk.



"I naupan lai hian i harh ngawt ang ka ti" ka tih chuan Zorema chu a rawn nui hawk a, "Awww naupang harh te chu an țha zawk alawm. An dam an hrisel tihna ania" a ti a.



"Țhat te chu țha e, mahse mi fate hi Bawihpui ang em em hian an harh ve angem tih ka ngaihtuah" ka ti a, "Aaa an harh rei tawh dawn lo emai. Ngaihtuah la, hmanni lawkah an rawn piang a tunah school kal rual an nih dawn tawh hi" a tih chuan dik ka ti ve reng.



Hun hi a kal chak lutuk tlat. An sên chhung a rei lo si, lawm nuih uar uar hun an nih lai te kha a rei lo lutuk.



"An ni pawh school an kal dawn tawh a, an chhang tur hi ngaihtuah leh tawh zawk ila" a tih chuan ka melh ralh a.



"An school kal țan tirh ngaihtuah an ngaih hun lai ber chuan hna dang insiam lo teh ang. Vanneih thilthua ka indang chung pawha kan pai leh thut anih te chuan thuhran" ka ti a.



"Aww neih vat vat ila, puitling rual dual dual se" a ti leh chuan "I țawng te hi fimkhur ve țhin rawh. Kan dam phawt chuan kan la nei zel ang chu" ka ti a.



"Heiha.... Nupui naupang lutuk neih chu ka upat rilru ang hi i pu ve thei der si lo" tiin a thaw halh a.



"Ve a che, min nei tur pawn ka tih luih loh che kha....." ka sawi zawh hma hma chuan  "Chup chup chup..... fa neih vat vat kha ka duh lawm. Ka tar hunah i la nula țha bik dawn si a, mipa dangin an lo melh loh nan che chhangchhe berh deuhin awm la ka duh" a tih chuan ka nui a.



"I mitah lo hian ka țha lo tih i hre der si lo va" ka ti a.



"Chutak chu, ka mita i țhat ang hian midangin an hmu țha ve ang che tih ka hlau" a rawn ti a, a ding su dawt.



"Kan thleng taaaa" tiin Jerome-a chu a chhuak a, a tlan nghal nal nal.



"Liansangpui, ding rawh!!" tiin ka chhuak ve nghal a, a tlan thui hma chuan ka va man hman hram.



"Anu school kan kal dawn em ?" ka pawm kan chuan a ti heu mai a.



"Dawn dawn dawn.... school ah anih hi kan awm" ka ti a, motor dahna lamah chuan ka kalpui a.



Fa neih hi phur thut thil tih chi a ni lo. A hautak in a hahthlak a, zaidam angaiin insumtheihna  zir mawlh mawlh a ngai.



Principal kan va hmu a, pre-school chauh anih avangin darkar thum chauh class an la țhin a, zing dar 9 ațanga chhun dar 12 thleng.



Zorema chu college lama kal angaih avangin a kal lehnghal a, a fate pahnih chu fel deuha awm turin a hrilh a, thuawih tawkin an aw ve thlap.



Class ah chuan ka țhutpui ve renrawn a, chu chu nu leh pa dangte pawhin an tihdan a ni.



A hriat ngai loh leh a awmna ngai loa a awm vang nge Jerome-a pawh a ngawi ve dâk a, thusawi awih deuh chuan a inkuangkuah ve then mai.



Class a zawh hnu chuan kan nufa thum chuan ke in ka haw pui a. Victor-a zawk chuan ice-cream a ei chak thu a sawi avangin ka ei kawi pui a.



An ei zo țep tih chuan kan țhutna bulah chuan Azualtei a rawn ding hlawl.


Ka fate pahnih chu  ka kuah nghal a, ka en kar.


A chanchin kan hre lo vang vang a, a reh ta hmak kha ania. Tun atakah a rawn lang hlawl a, mi lah chu a la nuih sawng zui.


"Engtinmah ka ti dawn hleinem" a ti a, "An va lian ve tawh ve" amah bawk chuan a ti leh.


"Rawn kal ka tum a, mahse ka hmu remchang tho si che a kha" tiin card min pe a.


"Pasal ka  nei dawn a" tiin a nui a, engmah chu ka la sawi ve lo.


"Min ngaidam dawn nia, ka lo chêt țhin dan avang khan" a ti a, a inthiamlo ve tak hmel hle.


"Ațha vek e" ka ti a, "Ka kal phawt ang, in hlim reng dawn nia" tiin naupangte chu a melh zeuh a, kei min en leh a nui suk in a kalsan nghal.


"Anu tunge ?" Victor-a chuan a kal veleh chuan a ti nghal a.


"Anutei hla tawkkkk ami nih kha..." ka ti mai a.


"Anutei kan nei ve lo emaw ka tia"  Victor-a bawkin a tih leh chuan "Van â tak, anutei vairam ami pawh kan neih kha. Sam eng khaaaa" Jerome-a chuan a lo ti a, ka nui hak. Anutei sam eng a tih chu Cindy a sawi na ni.



Ani hi la kal zel in khulamah hna a thawk pah bawk a, Bawihpuia te unau kumhnih an tlin kan lawmnaa a rawn haw bak kha a la rawn haw leh ta miah lo a, a awm thei char char khawp mai.
.
.
.

In kan haw hnu chuan kan nufa thum te chuan muangchangin rawn kan bawl a, Ramtei in kum hmasa lama pasal min neihsan daih avangin keimah chu inchhung engkim enkawltu ka ni tawh a, naupang enkawl nen buai pawh ka buai ve thei khawp mai.



Zorem an midang lak leh a sawi a, mahse ka duh rih chiah lo. Naupang tan mithar a hranpaa han nel leh tur kha ka duh lo a. Kan la leh dawn anih pawhin tlema an len deuh hunah law law ka duh zawk.



An unau hnih chuan dawhkana țhut tirin purunvar bul khat hi kheh turin ka ti a, an kheh ve mial mial.


"Anu keichu kum nga ka nih hunah bialnu ka nei dawn" Jerome-an a rawn tih chuan phawk fe hian ka en a. Bialnu tih țawngkam te chu khawi ațanga a hriat nge ni.


"Enge bialnu chu Bawihpui ?" hrelo ang tak chuan ka ti a.


"Nangmah ang hi! Apa i tlangval hunah i nu ang hi bialnu i nei dawn nia min ti a" a rawn ti a, ka chal ka ti chuar tap.


Zorema pawh chu tinge maw bialnu tih lam te a lo hrilh ni.


"Keimah ang an awm hleinem. Bakah kum nga chu tlangval pawh anih theih em ni ?" ka ti leh a.

A kut zungțang thliak mial mialin a vai a kut pahnih chu a rawn phar chhuak a, "Tiang zat kum hi ka nih hunah" a ti a, ka nui tawp.


"Anih kha kha engzat nge ?" ka ti a, inti hre em em a suk auh pahin ring tawk in "Five"  a rawn ti a, "A ni looo" nui chungin ka lo ti vat.


"Anu kei chu ka hria" Victor-a chuan a rawn ti a, a kut zung țang chu thliak ve mial mial in "Pasawm" a rawn ti veleh a, ka nui hak hak.


An hresual chu ka lawm tih hre tak hian an han chhiar leh a, min tih nuih dan an han sawisual der leh a, an mahni pawh chu an nui ve uar uar.


"Anu nau ka nei ve dawn em ?" Victor-a chuan a rawn ti thut a, "Nei ve dawn e" ka tih chuan "Keipawh nau neih ka duh, hmeichhia. Kan inkhawmna mi Puipuia pawh anau hmeichhia nen an lo kal țhin" Jerome-a chuan a rawn ti ve bawk a.



"Ka rawn hre hman ania aw" Zorema chuan a rawn ti lut a, a fate pahnih chuan "Apa apa" tiin dawhkan ațang chuan an chhuk a, an pa chu an va bawh nghal nawk nawk.



Zorema chuan lawm in a lo dek nui uar uar a, "A tlanchhe lo lo chu ka ei zo vek ang" a âw ti thumin boruak chu a'n hap vel a, naupang pahnih chu khek nui uar uar pahin room lamah hmanhmawh deuhin tlanchhe lut vat.


Zorema chuan min rawn pana, ka kawnga kuahin min melh chhuk run a. A âwma nam deuh chungin ka melh chho ve kar.


"Naupang pawn nau neih an duh tawh" a ti a, a âwm ah chuan ka beng taih.


"Ka ngaih em em nu" tia nui hawk hawk in ka biangah chuan a rawn fawp zauh a.


"Tunlai chu hun kan nei khât sia, naupang hi ka nu te in lamah riah tir ila an nau tur chu kan siam dawn em ni ?" a ti leh a.


"Amak, ka sawi...."  ka ti hman țawk, min rawn fawp thut a. Nui sak in ka chhang let ve zat a.


♡♡♡♡♡♡♡♡♡♡♡♡♡

Hmangaihnain a dawhthei a, ngil a  nei bawk țhin; hmangaihna a in fak lo va, a uang lo va, a che mawi lo lo va, mahni hma a sial lo va, a thinur duh lo va, sual lamah a ngaihtuah lo va; engkim a tuar hrâm hrâm a, engkim a ring a, engkim a beisei a, engkim a tuar chhuak țhîn.







A tir ațanga a tawp thlenga min chhiar sak tute chungah ka lawm em em a. In duhkhawp loh lai tamtak a awm anga, chapter țhenkhatah khi chuan in beisei aia ngaihnawm lo te pawh a awm ang. Mahse thinglung takin ka lawm em em a. Abîk in thurawn țha tak tak a, thu hman dik loh leh ziah dik loh min hrilh țhin tute chungah lawmthu ka sawi a.

Min thlâwp tlatna avangin ka lawm em em a, min thlâwp chhunzawm zel turin ka sawm bawk a che u.