D-BLUE CH☆21 by Sammy♤

 D-BLUE 21

by Sammy♤


Ch☆21


DUATI POV.


A tuk chawhnu lam ni tlak dawnah chuan Aizawl lam pan chuan kan inkhalh chhuak veleh chauh va, hmanhmawh lo taka tlan kan ni bawk a zan dar 9 vel in kan thleng v chauh.



Ramtei an khaw lama a haw ve daih avangin kan pahnih te chuan kan awm a, ka intihfai hnuah kan thil hawn te chu phawrh a rem țhat ka tum a, mahse Zorem an zinglam a ti tura min tih tlat avang kan mu ta nghal a.


Muhil thei lo in ka che deuh sek a, chawn leh ngalrek vel chu a na deuh ut ut.


"I mu thei lo em ni ?" Zorema muhil tawh emaw ka tih chuan a rawn ti a, ka che reng chuan a muhil ka lo ti harh a ni maithei.


"Ka ti harh che em ni ?" ka ti a, inbengkang ur ur in "Na i nei em ni ?" min ti a, "Nei lo ve, ka mu thei lo satliah mai mai. Mu leh rawh, ka muhil thei țep ang" ka ti a.


"Na i neih chuan sawi rawh, i zep khan a dam phah dawn lo nia" a rawn ti dam leh diai a.


"Aaa... ka chawn keh ngal rek vel hi a na deuh a" ka tih chuan puan chu a theh hlim nghal a.


"A vâwttt...." tia puan a ka inkhuh lehnghal chuan "Ka en chhin dawn lawm i ke chu" tiin a țhu chhuak a, ka ke lam chu a zuk hlim a, "Khawilai hi nge na ?" tiin a chawn chu a zuk hmet a, "Ana vek mai... a tur tet tet mai" ka ti a.


Ngawi renga khum ațanga a thawh chuan "Khawnge i kal dawn? Lo mu rawh, a reh vat mai ang" ka ti zui a.


Room kawngkhar bula light switch chu a va on a, a eng deuh pup.


Khumah chuan a rawn let leh a, a mawng lamah chuan țhu thatin ka ke chu a malah chuan a hlang a, "A vung anih hi" tiin na lo te te in a hmet a.


"Lo mu rawh, a reh vat mai ang" ka tih pawh chuan  "Tikhan mutthilh tum la, ka lo hmet dam ang" a ti a, ka chawn vung chu na vak lo chuan a zut a.


"A vawt si, lo mu la a vung rei tawh lovang" tiin ka ke chu ka la sawn a, "Duatii..." ti ban charhin ka ke chu a la leh a, na lo te te a hmeh pahin "Na i nei tih hre rengin engtinnge tui takin ka mutthilh ve theih anga" a ti a, a duhdan chuan ka ke chu a zût ta pauh a.


Zai rat rat pah chuan dim zet chuan a zût a, "Pu Kunga'n a bawl hlawhtling bawk che a, i zai ka ngaithla deuh reng mai dawn a ni maw ?" nui chung chuan ka ti a.


"Ni lo e, zai sak che hi nuam ka ti. Hla ril leh nalh tak tak kan nei a, phawrh chhuah sak vek ang che" a ti a, ka nui seih.


Mut chhuak rawn kal riai riai in Zorema chu mu turin ka sawm muang ban chhap a, "muhil rawh" tia ka chala a rawn fawp chu chiang lo ruaiin ka hria a, ka muhil zui nghal.


Ka harh leh chuan phak chualin ka hawi kual a, khua a la var lo tih chu chiang takin ka hria a, ka sira mu Zorema hmaiah chuan ka va dap fu a.


"Hmmm" tiin a ner nung mai.


"I harh em ni ?" ti a ka zawh lah chuan min chhang chuang der si lova, a muhil lai khawih lek pawh chu a hre hle mai.


Zorema lam hawi chuan ka inher rem sat sat a, Zorema ban chu inkuah tirin keimah pawh chuan amah chu ka kuah a, ka dul in min kam ve tawh nen duh ang erawh chuan ka hnaih thei lo.


Mutthilh leh tum chuan ka mit ka chhing a, Zorema rawn khuh thut chuan min ti phu zawkin  lehlam hawi chuan a inher a, a khuh zui bawrh bawrh.


A hnungah chuan ka va chum a, rawi hawilet țawk țawk in min rawn en a, khum bul dawhkana tui dah chu ban in a in nghal khawlh khawlh.


Rawn mut țhat leh pah chuan "Ka ti harh che em ni ?" a ti sup a.


"Ka harh sa a.... I âwmna dawn aniang,  i khuh nasa emai" ka ti a, a kawr chhunglam chu ka zen  rak rak.


"Ka hrawk a za satliah mai mai anih kha. Dar engzat nge ni tawh ?" tiin amah chuan sana chu a en a.


"Dar 5 pawh a la ri lo, i va harh hma ve ?" a rawn tih leh chuan "Nia... muhil leh ang" tiin ka kuah thak a, a hmatawn zawnga rawn inlet ve in ka kham loh zawk a ban chuan min kuah thak a, a bawp in min khan nghal zat.


"Muhil leh nghal rawh" tiin ka sam ah fawp a, "Nizan khan i lo mut țhat leh lai pawh la hre lo, muhil la ka lo veng ang che" ka ti a.


Min en in a nui suk a, "Mahni pawh in zo țha mang tawh lovin ka veng ang che min ti nia, awiiii" a ti duai.


"Aww anih ka veng lo ang che, ka mu peih tawh lo ka tho dawn" tiin ka țhu chhuak a.


"Mu rawhhhh.... nakin lawkah i mut a chhuak leh ang" a tih chuan "A pawi lo, chhunah mut bak tih tur ka nei chuang lo" tiin khum tlanga chuan ka țhu a. Ka slipar rap fu mai tura inngaiin ka ke ka hlang hla a, mahse chhuat vawt hit tlar chu ka zuk rap a, ka ke ka khai leh nghal vak.


Ka slipar chu ka zawng a, ka hmu miah lo.


"Rawn mu mai mai teh" Zorema lah chuan a lo ti chhen bawk a.


"I Bata slipar lian lutuk hi ka bun dawn nia. Tikhan nangmah kha lo mu rawh, vawiinah dawr en fel te i ngai dawn si" ka ti a, inkuangkuah khawr hlunin room ațang chuan ka chhuak a.


Boruak chu a vawt vur vur viau mai a, kan khua ang em chu ni lo mah se vawt tak a ni tho.


Chokaah lutin tuilum ka chhuang a, choka leh sitting room velah heater ka zawng vel a, ka hmu mai lo.
Ka hmu lo beidawng lutuk chuan ka tui chhuan off pah chuan "Thil te hi ka dahțha e hi intia, hmuh theih te hian dahțhat tur cheu nia. Ka ai ve inhlau em ni ?" tiin ka phun a, ka phun ngaithla tur awm lo mah se ka phun mawlh mawlh tho.


"Aaa insum teh insum teh..." tiin Zorema chu room ațang chuan a rawn chhuak a. Thawmhnaw lum pawh in bel lovin ka slipar ka zawn hmuh miah loh kha tawt theihpatawp in a rawn bun chhuak a. Heater ka zawn hmuh miah loh bawk chu a rawn khai chhuak va bawk.


"Nû i ni ve dawn dek dek a, phun i zir nghal ngawt mai" tiin heater chu a rawn on a, a bulah chuan ka țhu nghal that.


"A awmna hria te chu ka phun hma khan rawn la chhuak vat ta reng che"  ka ti a, "Awww mu rih rawh min tih kha"  a rawn ti veleh khauh va.


"Aa i țawngthei, kha i bata slipar hlai lian zet hi bun rawh. Khawimaw ka slipar kha" tiin slipar chu ka inbun thleng pui a, "Inthuam lum ve ta che. Nichinah pawh i khuh bawrh bawrh a"  ka ti leh hlak hlak a, nui țha chungin room ah a lut a, blanket te nen a rawn inpawm chhuak leh a.


Ka bula rawn țhu in min rawn rawn kuah a.


"Amak, va inha lum pangngai rawh"  ka lo ti hlak.


"Awww..... i bula awm dan phet ka zawng ve anih hi" a tih chuan "I inhak lum pawh ka bulah bak khawiah nge awm i tum chuan ?" ka lo ti leh.


"Heiha, kan țawngthei dun si" a ti a, tho chhuakin room lam bawk a pan chu ka nuih a, a va inha lum ve ta nge nge.


Phone leh t.v chu connect in t.v  en chuan kan țhu dun reng a, kei phei chu Zorema nghengin ka lo muhil leh daih.


Ni a san viau tawh hnuah ka harh leh a, Zorema chuan zai rat rat pahin rawng a lo bawl a.


"I muttui leh em ?" min hmuh chuan nui chungin a lo ti var a, min rawn pan hnaiin ka hmuiah a rawn fawp zauh.


"Mutui, mahse ka nghawng a kham deuh" tiin chair ah chuan ka țhu thla a.


"I mangchhe lutuk a chuvang anih kha, ka lo malis ang che" tiin ka hnunglam ațang chuan ka dar leh nghawng kual vel chu a rawn hmet a.


"Tinge le ?" a tih chuan "Engchuuu ?" ka lo ti vat.


"Hmanah khan ka lo hmangaih vat loh che le" a rawn ti a,  "Chutiang sawi sawi ngai lo. Tunah min hmangaih tawh a tawk" ka lo ti deuh hmuk.



"Ka sawi duh alawm. Ka inchhir a, tinge hmanah khan ka lo vei viau tawh lo che le. Ka mawl luatah ka hlimna tur zawng zawng ka chân vek țep a" a ti a.


"Kan fate tur tan hian an pa hi entawn tlak ka awm silova, vanduai palha min rawn chhûn viau anih chuan tute rilru  mah ti na ve lo turin pa sual tak ka nih pawh pawisa lovin ka ri țhak țhak zel ang" a rawn ti leh a.


"Aaa sawi sawi suh, ka lung i ti chhia" ka tih chuan "Ka nei che hi ka lawm êm a, sawi fo ka duh" tiin a rawn kun a, "Ka hmangaih che min ti lawk teh" tiin chiang fahran chuan min rawn en a.