D-BLUE CH☆18 by Sammy♤

 D-BLUE 18

by Sammy♤


CH☆18


DUATI POV.



"Mipa dangin an lo biak loh nan lo veng rawh aw ....... 'Zorema nupui' tih kherin lo ko țhin teh u" Zorema chuan a rawn ti a, Pu Kunga pawh chu a nui hak hak.



"Ka uang lo ania, a hmelțha zual zel si a. Mipa dangin an lo melh ka hlau em asin" a rawn ti a,  "Ni e ni e,  'Zorema nupui' tiin kan lo au ang. Tuman an melh loh nan ka lo veng dawn alawm"  Pu Kunga chuan a ti a,  Zorema pawh chu a rawn nui vur vur.



Inbiaka thusawi vak a rem chiah loh avangin kan dah vat a, Pu Kunga chu a nui zui kar kar.



"Khamaw.... Ka rin ang anih dawn kha. Pasal țha tak chu i hmu anih dawn phawt kha" a ti a, "Ni e...." ka ti ve sup.



Kan awmna leh ka u te chanchin ve min zawt a, kan chaw ei pah pawh chuan kan ti ti char char.



Dar 6 velah kan in lamah ka haw phei a, ka nu tui min lum sak chuan ka insil thuak thuak a, ka inthuam lum vat.



Boruak a vawt tîktêk lutuk a, kawrlum pahnih ka hak bakah shawl ka bat a, ka nu te sikri chhem chu ka ai tel bawk a, ka awm lum ve hram.



Chanchinthar chu kan ngaihthla țhap a, a tawp velah chuan  "Helai lakah chuan Aizawl kha a la lum daih zawk anih kha"  ka ti a,  "Ni e.... Chhaklam hi a vawt zawk alawm"  ka pa chuan a lo ti ve bawk a, "A vawt si a, mu lum vat vat rawh" ka nu chuan a lo ti ve zat.



"Zorema nen in inbe tawh em ?" ka pa thung chuan a rawn ti leh a, ka lu buk nghat nghat pahin  "Aw be tawh e....ka û te pawh ka be tawh" ka ti țha mai.



"Heiha!.... kan ram han chhiat tawh dan hi !"  Ka pa chuan Sikri a meihawl dah belh pah chuan a ti a.


"Inthlan lehah chuan sawrkar thar hi ding ve tawh se, ZPM te hi ding ve chhin se...... hetiang reng renga sawrkar inchhawk ringawt chu. Ram hmangaihna vang pawh ni lem lo, duh duh danin an kalpui mai ni hian ka hria"  ka pa bawk chuan a ti leh.



"Ve ringawt zel a che. Politician, minister te hi han ni ve teh mipui zawng zawng mit i tlung zo bik dawn kher em ni ?"  ka nu chuan a lo ti a.



"Dawn lo e.... Mahse hmunthum a țhen a thumhnih mit hi chu ka tlung zo ang....."   ka pa in a tih chuan ka nu chuan  " Awi awi awi ! .... Sum hian mit a tidel thei tih hre ta che!  Forest department a thawk Maenga te saw en teh. A thawh tir te kha chuan dikna kha a'n dah pawimawh vet vet tehreng nen khan tunah te chuan tupawhin permit nei lo pawhin plantation ami thing an zai a, Maenga hnenah pawisa an pe a, permit siam ai chuan awlsam zawk a ni chêk ang chu. Tisawn awm hmunah a hlawh piahlamah a eiru ve char char tho alawm"  a ti duah.



" Sawtiang hnaah ringawt pawh rinawm a har anih chuan Minister chin tan chuan eiruk loh chu a har ang...... Lo eiru in eiru lo pawh nise mipuiin kan mawl man kan tuar a ni mai. Kan thlan tlin an nia, tumahin an eiruk thu an sawi an sawi duh lo. Kohhrana leh khawtlangah sum an thawh hnem chuan a tawk der. Chutah lah khawtlangah a hruaitu V.C ten  'ka eiru ve e' te hi an han ti lehnghal a....."  ka nu chuan a ti leh a, ka pa chuan  "Pawng pawng a che.... Mihring hi kan in ang vek lo. Eiru zingah pawh rinawm tak leh dikna duh chu an awm ve tho.... Inthlan leh turah chuan kan khaw V.C ah hian ka incandidate ve tawh ang"  ka pa chuan a ti a, ka nu chu ngei awm deuhin a nui hak hak.




"Ni e ti ve teh.... Sawi ringawt aiin a thawh i chak dawn chuan i tling em em ang. Heihi nia mipui kan atna.... Mahni țanghma hai ve kar in mi kan vote a. 'Chumi chu vote ila chutiang khatiang dawng tur a awm ang tih a sawi kha....'  a thlawna dawn leh sum ringawt hi rilru ah awm a, an tu leh fate rawn țhan len zel nana boruak țha siamtu a ni thei tih hre map lovin politician te țawngkam nalah an tawlhthlu a. An thusawi apiang an lem duak duak a.... A politician ate ai chuan mipui te hi harh ila.... Harh ila ka'n ti tak na, inthlan rawn ni leh chiah pawh ni se tuna kan sawrkar dinhmun rawn sawisel ve sek tu ho bawk hian an thlang tling leh anga.... Ram hmasawn thei lo, India ram Economy sang thei reng reng lo, chuta karah kan state hmasawn dan dik lova hmasawn char char....."  ka nu chu a thaw deuh hak.



"Mihring hi kan in ang lo tih  bak ka sawi peih lo e a" ka pa chuan a lo ti hmuk.



"Nu ka ring aiin politics lam i hre daih" ka tih chuan "Pawl sawm thleng ka kal ve a.... College te pawh rei lo te ka rap ve hman alawm. Khatih hunlai țang tawh khan ka vei tawh" ka nu chuan a ti a, ka rin ai daihin ka nu chu a lo tunlaiin lehkha a lo zir sang daih. Kan naupan lai deuh zawng zawng khan lehkha min zirtir ngai mang lova, thingtlang nu mawl ve tak tan chuan ka zirlai te kha hrethiam turah ka ngai ngai lova, chubakah nitin an feh a, an chauh hnep hnu zan lamah lehzel lo zar buai kha chu a inthlahrun awm țhin a. Ka zirlaia thiamloh ka nei anih pawn kan zirtirtu te kha ka pan ngat ngat țhin kha ania.



"Anih nu B.A i zo hman lo em ni ?" ka tih chuan  "Aw last year ah i pa nen hian kan inneih a, i pa hi lo nei ta ila, in piang awm tawp si lova" a tih chuan "Kan piang tho ang.... midang zawng zawng aia keimahni kan piang hi i fa tur kan nih zia a lang reng alawm"  ka ti a.



"I nu khan amahin a pai thei cheu em ni ? Ka tel ve tho lawm. I nu hi nei lo pawh ni ila ka fate ah in țanh tho ang" ka pa chuan a lo ti ve a.



"Kilkhat ațang hian i lo rak ve peih sia... Va mu daih rawh" ka nu chuan a ti a, ka pa lah chuan ka nu runluihin ka nu chu a va nek talh talh a, ka lo nui hak hak.



"Ka va mu nge ?" tiin ka tho thurh a, kan naupan laia kan û nena kan room  ni ve țhin lam chu ka pan chhat chhat.



"Puan i sin belh duh chuan almirah ah khan ka dah kha aw"  ka nu chuan a ti a, "A ninawm... Naupang awmlai hian thinrim khur khur ziah suh"  a tih zawm zat ri chu ka hria a. Ka pa lah chuan uar ring fahran hian "Nui kan fate an naupang tawh lo.... Pakhat in fa pahnih a  nei tawh a, a naupang zawk pawh a rai mek hi" a ti a, "Ka hre pha ania aw Pa"  ka ti vak chu "Tui deuh khan mu la aw Duati"  a rawn ti let lauh.




Puan chu lak belhin khumah chuan ka dah a, khum chu ka thlek vang vang.



Mattress dup tak a inphah ve hran lova, kan naupan laia țha kan tih leh dup kan tih em em tho si sava bu ang deuh mattress kha a la inphah char char.



Bakah khum a pawh hi a upa tawh a, a hunlai kha chuan țha in lian viau mah se tunah chuan a țhing hlui tawh a, ka pa in inti  mistiri taka a siam ve kha ania. Kan naupang laia a mawi lohna hre map lova a ke rual lo kan kam țhinna te chu tunah hian a mawi lohna ka hre chiah.



Ka han mu dawn a, a ri țat țat mai. A khum chhuatphahah pawh dap ala ni a, a zâ-ah lah maupum ro changțha deuh kha a ni mai a. Aizawla kan nupa khum nen kha chuan khaikhin chi a ni lo.



Ka  nupa khum ai khan tê zawkin dup ve lo mah se ka mutui dawn tih ka inhre chiang. A khuma chu engpawh lo ni se, chhuatah mu pawh ni ila ka pa in ngeiah, ka seilenna in ah ngei ka mu tur chu a hahdamthlak in, ka thla hi a muang em em mai ni.



Ka mut lum leh deuh hnu chuan ka phone chu ka en a, Zorema missed call a lo awm nual.



A message ka dawn chu ka en a, mak ka ti ang reng.



*Ka mu chiah*  tiin ka reply a, a online miah lo chu rawn online ka message chu a seen nghal a.



A call a rawn lut nghal a, face chat bawk. 



Ka la a, "Enge i tih ?" a âwm ruak kûng chauh ka hmuh avang chuan ka ti vat.



"Ka inbual zo chiah a, ka thawmhnaw hak tur ka'n zawng lawk ange ?" a ti a, amah lang thei tur chuan a phone chu a hung rem a, closet chu a en kual duk duk.



"I va inbual tlai ve, i khua te  sik leh mai tur asin" ka tih chuan "Ka cell țhenkhat te hian damloh hi an support lo"  tihpah chuan a ban chu a'n ti sek vel a.



"Tianga pasal chhelo min nei hi a nuam i ti em ?" nui chunga a rawn tih chuan ka ner nak a, awmdun ila chuan ka beng chawrh duh ang.



"Min hai aniang keichu pasal țhen hlim ka nia" ka tih chuan a rum nghut a, "Mipa dang kha be reng reng suh ang che..." a ti a, "Heihi ka ha dawn" tiin ka halfneck a la chhuak a, "Ka ta anih kha..." ka tih chuan  "A fan thei tho ang" a rawn ti leh a. "I nei ve reng a, ka thleh ho zingah khan zawng la i hmu mai ang" ka ti a, zat loh hmel tawkin a nui khi țha.



"A inthlep țha lutuka ka hmu thei lo" tia phone chu a la kangin ka thawmhnaw thleh dahna min en tir a, thawmhnaw chu a inchingchivet vel vek. Pakhatmah chu thleh țhat in a awm lo hrim hrim.



"Ihmaw Duati, zep loah chuan.... i awm loh ațang khan thawmhnaw hak tur ka buai thei lutuk a, ka hmanhmawh thei sia tihian ka hai darh vek palh a, mahse nakinah ka thlep ţha mai ang" a rawn ti zuah zuah. 




Ka thaw hak a, "Aww i duh duh kha ha rawh, in ha vat vat rawh hritlang te i kai ang" ka ti a,  a duh ang ngeiin mar lutuk tak maiin ka halfneck chu a ha a, a nghawngah pawh a half zo ve lo. Kawr nghawng pangngai hi a ni mah zawk.



Amah chu a nui vak vak a, a in en deuh chhen.



A tawpah chuan "Aaaa ka ban leh ka zak leh hi a tawn mar lutuk..." tiin a inthlak ta tawp.



Kan mu a, engmah sawi lo chuan kan in en tawp.



"I mut a chhuak tawh em ?" a tih chuan "Imm dah tawh i la ?"  ka ti a, "Aih, ka hmu duh che lawm. Muhil rawh ka lo zai ang" a ti a, ka nui hak.



Ka mit ka chhing a, a hrawk a thian kharh.



" Nun khawhar buaina mai,
I zùn leng ngaih țahna mai;
I tello chuan hringnun hi vanvaihna        mai  a ni,
Kei ka tan chûnni a rei, zankhua a sei.

* Ka thinlairil'an i khat liam ngei,
Nang ngai hian chhawl ang ka uai zo  ta;
Dawn a sei lunglam ka vai ruai e,
Aw khawiah nge i awm le ?
I zun ngai ka fam tur min hnem rawh. "


><><><><><><><><><><><><


Zing dar sarih velah zun chhuakin min ti harh a, peih lo tawk chuan ka tho țuih țuih.



Ka va zun hnuah ka phone ka en a, nizan khan a zai lai khan ka lo muhil daih a, call a cut lai pawh ka hre lo. Battery a low viau a, ka charger nen chhuakin ka phone chu ka charge a, pawn an tual mei chhem ai tur chuan ka chhuak veleh nghal zat.



"I va rawn tho hma ve ?"  ka pa chuan a ti a,  "Ka rit tawh lutuk a mut reng pawh taksa a kham"  ka ti a,  "Nizan i mutui em ?" Pu Kunga chuan a lo ti var.



Țhutna rem ve pah chuan  "Mutui lutuk, nang i mutui em ?"  Ka ti a, "Muttui a ni mai ang chu"  a ti a, ka pa chuan  " I nu thingpui min va thlit teh i Pu Kunga nen hian, kurtai kan hawn pawh kha han la tel nghal la"  a ti a, inchhung lamah chuan ka lut vat.


Ka nu chuan kurtai chu a phel sawm mek a,  thingpui leh kurtai la a ka kal leh chu  "Chaw ei dawn dawn tawhah hian kurtai te hi an han ti tlaikhawhnu a, rawn lut vat ula chaw ei teh ang u"  a ti a,  ka pa thingpui tur chu tlem in in ka tep chuap chuap.


"Ka nu in in rawn luh hun hunah chaw kan ei thei a ti aw ?" ka pa hnenah chuan ka ti a.


Ka pa chuan a thingpui no dawm pahin  "Lo lam kal te hi a tum veleh ringawt emaw ni? Thlai hrik thahna ka kap hlawm a, thlai an lak theih loh ka ti reng si a"  a ti nuah nuah.


"Nu ho hi chu en vel mai mai teh ang.  Thlama țhu mai mai tur pawha kal hi an duh tlat zel"  Pu Kunga chuan a lo ti ve a, an pahnih chuan an nui zui kar kar.