D-BLUE CH☆17 by Sammy♤

 D-BLUE 17

by Sammy♤


Ch☆17


ZOREMA POV.



"Tinge ka lo kal ve chu i duh loh tlat a ?" tiin a kawr banah chuan ka pawt a, a ban chu thing nawk in "Ka ning. Rawn kal ve i sawi leh chuan ka be tawh lo ang che" atih chuan ka ngawi hmak a.



Mahse motora an han chuan luh meuh chuan a kut chu ka va vuan leh a.




"Rawn kal luih i tum a, i rawn kal lui anih chuan tun mai nilo ka thâwk chhung chuan ka be tawh lovang che" a ti leh hmuk mai.



"Aw le.... Țha deuhin ka lo awm ang. Nuam deuhin han hmang la, țha deuhin han in enkawl la i rawn haw leh vat dawn nia. Ka lo nghak ang che" ka ti a, a kut chung chu fawpin ka en a, "Țha taka i lo awm a, i lo rinawma ka rinna che i tih chhiat loh chuan ka rawn haw leh ang" a ti a, a kut ka vawnna chu thlahin a kut pahnih chuan ka biang chu a rawn dawm a, min rawn fawp a.




"Le le le...." Driver in a tih ri ah chuan engmah ka tih hman hma chuan a inla hrang leh nghal a. Inchhunglam ațang chuan a pa leh a nu chu an rawn chhuak a, a û pawh in no tehchiam lo chuan min melh ve ran bawk.



Duati te tlan liam chu ka en a, ka thaw hawk.



Ka lung a leng nghal hle mai a, kan awmdun lohna rei tawh hle mah se khawkhata awm kan ni a, ka la tuar thei mai a. Mahse khaw hrana awm a, mi zawng zawngin hlimni, intawhkhawn nan leh inhmangaihte tana inhmangaih zualna ni a awm hran bik chu ka tuar thei kher angem ka hre lo.



A thinrim thusawi mai a ni tih hre mah ila kumkhuaa min biak loh chu ka hlau viau mai bawk si.



Ka bula hrawk rawn thian kharh avang chuan ka hawi a, Rampuia chuan a kekawr ipte zenin min lo melh run mai.



"Umzui chu i tum lo ang tiraw ?" a tih chuan ka lu ka bu nghat a, a nui hak.



"Eng chiah hi nge maw i beisei ve ni le ?"  a tih leh chuan amah hmachhawn zawng chuan ka inher rem a.



"Enge ka beisei a i hriat? I nau hian ka fa a pai a, neih leh ka tum mek anih hi" ka tih chuan a nui hak a, "Tlawm taka awm satliah hian i neih leh theih i inring em ni ?" a tih chuan chal ti chuar tapin ka en a.



"A beidawnsan tawh che a, neih i la tum veleh chauh chu ania. Eng i thleng lovang i neih tum dan hi" a tih chuan chhang lo lovin ka melh khui ringawt a.



Engtin pawn hma la ila Duati ka neih leh theihna anih phawt chuan a pawi lo, midang ngaiah mawi leh mawi lo ngaihtuah hman ka ni lova, Duati ringawt hi ka ngaihtuaha a ni mai.



"Ka hrilh che a, ' Beidawnsan tur khawp che in che suh ' ka ti lawk a. Mahse i luhlul ve nge a hmeichhia khan a kherh hneh hrim zawk che ni kalsan i nih dawn hma kha chuan i nupui phatsantu nih kha nuam i ti viau ania. Duati hlim i duh tak tak anih chuan kalsan zawk la, i tello nun a țan theih dawn chauh tih hian rawn ti buai la. I tello hian a hlim zawk ang" a tih chuan ka nui a.



"I hrechiang lo a ni. Duati telloa ka hlim thei lo ang bawk hian Duati hi ka telloin a awm thei lo. Kei chuan kalsan eng ang pawh ni ila a pum chhunga awm mek te vang hian min theihngilh ni a nei tawh dawn lo" ka ti let ve a, "Anih phawt" tiin ka motor hunna lam chu ka pan ta daih.



In lamah ka inkhalh haw a, dar zat ka en a 11:34 chiah. Duati te chhuah ațangin minute 11 chiah a la liam a. Aizawl khawchhung pawh an la tlanpel lovang.



Ramtei in choka lamah chuan a lo zai rat rat a, ka luh chuan in leng a nei ve tih ka hmu a. Amah Ramtei in min hmuh chuan "I va rawn let hma ve" a ti a, "Nia, Duati te an chhuak hma a. Dawr lamah ka phei leh vat ang" ka ti a. Ka room lam pam mai ka tum chu "UZorem"  a rawn ti a, ka hawi let leh.



"Azualtei a rawn kal a ?" a tih chuan ka mitko ka san ak a, "I roomah a la awm. Zing a i chhuah hnu deuh khan ania. ' Ka nghak dawn ' a ti tlat che a, i roomah țhu lui tlat" a tih chuan ka thaw hak a. "Lo hlauthawng lo la, ka chingfel mai ang" tia kal ka tum chu ka banah min rawn man a, " Duati hre reng rawh aw "   a tih chuan ka nui hak.



"Engmah  thleng lovang, kha inleng i neih kh" ka ti a, room chu ka pan nghal.



Ka luh chuan Azualtei chu khumah chuan a lo țhu a, min hmuh chuan a ding zawk.



"Zorem" tia min rawn kuah a tum chuan ka lo nawr sawn a, " Zoremm " a ti țuau.



"Mi nupa rooma lut tawp duh tur khawpa manner i hriat loh hi ka ring ngai lo a" ka tih chuan "Zoremsang" a ti vak a. A țap zui.



"Naute vang mai mai chuan tihian awm suh. Duatin a neih hunah kan pahnihin kan enkawl dawn ania" tiin ka banah chuan a rawn kuah a.



"Duati ka neih hma ațang tawh khan kan inkar ka nin zia i hriat kha. Duati hnar nan mai maia hnaih che ka ni tih la i hre bawk. Tun ataka rilru dang pu thut angah min ngai reng reng suh" ka ti a, ka phone chu a rawn ri a, ka en chuan Duati a ni. Lak ka tum uk a mahse Azualtei a awm bawk si avang chuan ka la ta lo zawk a.



"Mahse Duati pawh i hmangaih bik hleinem..... Naute chauh lawm i duh. Duati aiin ka hmangaih zawk che a, naute chu Duatin a neih hunah kan pahnihin kan enkawl dawn ania ka tih chu. Zorem!" a ti vak a, a țap par bawk.



Ka thaw hawk a, room chu ka hawikual thuak thuak.



"Room hi en la, zantin ka mut apianga ka hmuh theih tura banga Duati nena kan nupa thlalak te khu en la, ka mamawh loh zia che i hmu thiam ang. Hrethiam rawh, nupui nei ka ni a, nangpawh nula i ni bawk. Midang an tam ang" ka tih chuan "Midang ka duh hleinem!!" a ti vin vak a, "I âw ki san suh!!" ka ti ve țhat.



Kawngkhar chu pawn lam ațanga rawn inkikin Ramtei chuan  "UZorem, Duatin a be duh che a"  a rawn ti a,  "Keiman kan awmdun thu in kan hrilh ange"  Azualtei chuan ti tuarin kawngkhar chu a hawng țhuai a, pawt let nawkin a kâ chu ka hup sak a. Ramtei chuan phawk zetin min en.



Ka hmui phun chuan phone chu off turin ka ti a, harh thu niawm hian phone chu a off a. Azualtei chu chhuatah chuan ka paih thla tawp.



A rawn tho chhuak a, zat loh hmel tak hian a nui a, a che phut a, kan nupa thlalak kan tar chu la thla in frame chu a vawm chhia a, ka insum hman lo chuan a banah chuan ka banpuama pawh her pah chuan a hmaiah ka beng a, a thlalak frame tihkehna themah chuan a tlu zui hnawk.



Hmeichhia chu ni lo se ka chhirh zui hrep ang.



"Heti mai maia kalsan tur che hian nupui i nei tih hre reng chung khan ka kawp lo che. I hlim rei dawn lo" rawn thawh chhuah leh pah chuan a la ti ve fan a, a chhuak zui nghal.



Ka thaw hawk a, thinrim zetin kan nupa thlalak chu ka en a. A frame chu ti chhe law law vekin a thlalak a chu ka la a.



"Duati engmah hrilh lo la, ka chingfel mai ang. Heihi min lo tihfai sak rawh aw" ka tih chuan Ramtei chuan a lu chu a bu nghat nghat a.



Thlalak chu tel țha in ka chhuak zui a, ka dawr lam ka pan ta phawt.



Dawr ka thlen hma deuh chuan Duati call ka dawng leh a, "Khawnge i awm a ?" ka lak rual chuan a rawn ti a.



"Dawr lam ka pan mek a, khawilai nge in thlen tawh" a dam thei ang ber chuan ka ti a, "Khawilaimah kan la thleng lo. Kawng a chep lutuk a, kan la tang" a tih chuan za lo deuhin ka nui a.



"Nichin khan hmeichhe au ri niawm tak te kha ka hria a" a rawn tih chuan "Keipawh hei ka tang a, kawngmi thawm vel aniang" ka ti veleh mai a. A ruk chuak ka thaw hak.



"Duati kan nupa thlalak kha frame dang deuh hlekin tih tir ila" ka tih chuan "Tehdaih a, i inchhung a mi nia. I duh duh dan khan ti danglam rawh" a rawn ti a, a thusawi danah chuan lawm loh rukna a awm in ka hria.



"I duh loh chuan ka thlak tir lo mai ang..."  ka tih chuan "Thlak tir rawh ka lungawilo lo" a rawn ti tawi leh tak.



"Hei Aizawl ațang kan chhuak chiah aw" a rawn ti zawm zat.




DUATI POV.



"In khaw hluiah i kal dawn sia, țhianhlui mipa te i nei anga, mipa kha han be tam suh aw" Zorema chuan a rawn ti dam thluam a.



"Nupui fanau nei te anni ve tawh a, bial tam chi an ni bik lo" ka tih chuan "Ka hlauthawng ania, tu emaw lakah khan nangmah kha i lo han inpa pek tawp ange aw" a rawn ti a, ka nui hak.



"Nau ka pai hi, phir lehnghal. Tuman min enkawl peih lo. Nangpawh hian hausa hle lo la chuan....." ka tih lai chuan "Ka hausak ve na te hi chu in tan vek alawm. Ka nupui fanau te tana ka thawh vek" a tih chuan ka nui a.



"Dah suh aw, ka ngai nghal che ania. Tihian inbiak reng ka duh" a rawn ti leh a, "Dawr chu i thleng tawh em ni ?" ka ti ta thung.



"Thleng lo deuh.... Duati!!" a rawn ti hluai a.


"Ka lo kal ve anga.... Christmas urlawk zana meilum aia i kut hmer lum vawng vawng a,  'mu tawh ang' i tih hnuah i pangtilum si chat a mut te ka chak a" a ti a, "Ava mak em! ka hril thiam thei lo, ti ema lung i dum mai hi. I sakhmelah dar a zam em ni le? I tello chuan ka tlei thei lo...." a rawn sak zawm a, ka lo nui pat pat.



A zai ka vawikhat hriatna a ni a, zaithiamlo lutuk chu a ni hran lo, ka hriat ngailoh avangin ka hre thut a, chutah amah nena inmil lo deuh mizo love song a sa bawk a.



" I zún hi ka phur sual anih hi Duati ! " a ti a,  "A zahthlak.... kawnga kal te khan i zai te kha an lo hria ange"  ka ti a, a rawn nui ve hak.




"An lo hriat chuan a țha hlei hlei, ka duh zia che min hriatpuitu atan an țha" a ti a,  hetiang em em hian țawngkam hi a lo thiam ve thei ang tih hi ka hre ngai lo a. Chhan dan tur ka hre lo nghal der mai.




"Zorem.... Ka sawi i hre thei em... Shhh... Zorem...."  signal chhia niawm tak chuan phone chu ka dah ta hmak a, airplane mode ka on  nghal bawk.




Mahni chuan ka nui var var reng a, tunah hian Zorema ka rin leh tawh zia hi a awihawm loh zawk.



Mahse fiahna paltlang lova neih leh chu ka miah chuang lo thung.



><><><><><><><><><><><><><><><


Tlai dar 4 velah kan khua chu kan thleng a, kawng a chhe lutuk a ka sil țhum mai.



Kan thlen hunlai chu lo feh haw hunlai tak a ni a, a țhen mi inti hre deuh te chuan min han chibai a, kan nu leh pa chuan lo ( huan ) lam chanchin te an han zawt zel bawk a.



In chu a reh thim țhiap mai a, țhenawm Pu Kunga pawh rawn lang vat.



Min chibai a, min hmuh chuan a hlim ngang mai.


Kan inhmuh lohna a rei tawh bakah tetlai zawng zawnga min awm ve țhintu kha a ni a, keipawhin ka khua ka awm chak chhan pakhat kan han hmu chu a nuam ka ti.



"Chaw ei pawh kan peih vek tawh, phei ila i ei ang u" a ti a, hnial hman lohin min kai a, an in lamah chuan min phei pui vat.



UManui kei aia upa, ka u te nena inrual vel tur te nupa leh amah Pu Kunga te nupa nen an awm a, naupang an nei lo nge ka hmu hauh lo.



Pu Kunga chuan an sikri aina lamah chuan min țhutpui a, "Midang zawng ai hian ka ngai mai che. Pasal i nei tihte ka hria a, i neih khan ka rawn kal thei si lo a" a ti a.



"Mahse ka thil rawn thawn che kha chu i hmu ang tiraw ?" amah vek chuan a ti leh a.



"Aw hmu e.... ka hmang țangkai khawp asin" ka ti a, "A thu hrimin i lo va tlangval tawh reng reng ve a" nuichunga ka tih chuan a nui a, "Nangpawn pasal hial i nei tawh a, kha i la rai lehnghal. Nupui tur ka zawn ve ahun tawh lawm" a ti a, kan pahnih chuan kan nui dun hak hak.



"Chawhmeh hi ti lum leh lawk ila kan ei dawn nia..... ka rin aiin in rawn thleng hma a" ka nu te rawn lut chu UManui chuan a lo ti a.



"Anih min han hrilh teh, i pasal chu a fel em? A duat che em? Aizawla i chhoh khan i la nau deuh em a, nupui pasal neih kawnga fimkhur a ngaih zia kha ka hrilh lo che a, mițha en dan lah kha ka sawi hman hek lo. Mahse duha i thlan anih chuan i pasal chu i hmangaih in ani pawhin a hmangaih ve hle tur che ah ka ngai a" a tih chuan ka lu ka bu nghat a.




"Zorema ania, nangmah anga pa țha hi a ni mai...." ka tih lai chuan ka phone a ri a, Zoreman min rawn video call chiah.



Ka la a, khuma mu in puan a inkhuh hlun.



"In thleng tawh em ni ?" a rawn tih chuan "Aw kan thleng deuh chiah. I hmel han tilang teh, Apu Kungan a hmu ve duh che a" tiin Pu Kunga lang thei tur chuan ka phone chu ka keng a, Pu Kunga chu a lo nui țha mai.



Zorema chu a țhu a, "Chibai Apu Kung" a rawn ti ve dut.



"Chibai leh chibai le...." Pu Kunga chuan a ti a, "I chanchin kan lo sawi mek a" a tih zawm a.



Zorema chuan phawk uar deuh  "A ni maw!! Mahse ka chanchin a sawi chuan lo ngaithla ning suh aw. Kan awmdun lai pawn i chanchin a sawi țhin. I bula țhu kha ka nupui anih kha aw" a rawn ti a, ka nui a, Pu Kunga chuan "Ni e.... Duati berkher i thlang a, i thlang thiam khawp mai" a ti a. Kei ka lo nui char char.




"Mipa dangin an lo biak loh nan lo veng rawh aw ....... 'Zorema nupui' tih kherin lo ko țhin teh u" Zorema chuan a rawn ti a, Pu Kunga pawh chu a nui hak hak.