D-BLUE Ch☆15 by Sammy♤

 D-BLUE 15

by Sammy♤


Ch☆15



"Zorem...." ka tih leh chuan min lo țawng khalh a, thutak hmel zeta min en in "Ka hlauh tak ber chu 'hlim takin an awm dun ta a' tih hi nang leh kei ni lova midang nena in chanchin sawi nan an hmang ang tih hi ka hlau a ni. Hmangaihtu che thinglung na taka i siam anih chuan engtikah mah a hmangaih leh tawh lo ang che an ti a, min hmangaih leh theih tawh loh hi ka hlau a ni" a ti a.



Min rawn țhut hnaih a, ka biang chulin kan inmelh ran.



"Hmangaih reng che hi ka duh a, ka hmangaihna dawng reng tura ka kianga awm reng turin ka duh bawk che" a ti a, min kuai dak deuhin ahma aia chiangin min en a, "Min pawm leh thei ang tiraw ?" a ti a, min fawh tum chuan a rawn kum hniam a. Mahse min fawh hman hma chuan thaw deuh hawkin ka tho chhuak a, hrilhhai hmel zetin min en.



"Duati!" tiin ka kut chu rawn vawn a tum a, mahse lo tawlh sawn hretin  "Eherm... aaaa... min hrethiam dawn nia. Mahse rin mai che hi a harsa ka ti tawh. Ka rin loh leh ka beisei loh dan zela nung țhin i ni a, thawk leh khata i mize thlak thut tur hian ka beisei ngai lo che a, tih tak tak na nen anih loh phei chuan beiseina min siam tawh suh" ka ti a, a rawn ding ve hluai.



Ka kut chu rawn vuanin ka tawlh hnung leh tur chu ka kawngah chuan a rawn vuan leh zat a.



"Tunah hian kan inneih nia thu ka intiam lai ai khan ka thutak zawk" tiin dawt sawi hmel pu hauh lo chuan min en a, sawi tur pawh ka hre lo.



Ka beisei loh lam a ni a. Hetianga min hmangaih thu a sawi mawlh mawlh ni tur hi ka lo suangtuah țhin a,  mahse a rawn thleng ta cheng a, a hun in a zir tawh loh em vang nge ka chhungril takin ka dawngsawng thei meuh tawh lo.



"Aww... ka hrethiam e" ti ro halhin a awm ah chuan ka nam a, ka kawng a vawnna chu thlah ve in min en a. Min en run a, ka pen sawn dawn a mahse ka che chu a lai vek.



"Apple kha ka va ei leh lawk" tia choka lam kawkin choka lamah chuan ka kal ta hmak.



Azualtei nen chuan an ințhen tak tak em ni ang. Azualtei a țhen lunglen vel hi ka lakah a rawn tâp vel phah mai mai a ni lo maw aw te ka ti a. Ti khawp khan min hmangaih thu leh neih leh ngei min duh thu a sawi ve bawk si a, ring lo viau mah ila ka ring lo hlawm tawp bik si lo.




"Naktuk hi check up hun tur a ni leh tawh ania aw" tiin ka hnunglam ațang chuan min rawn kuah a, ka lo ip deuh chawih.



In check up ni leh zel chu a hriat ka ring lo ania, hrilh hriat pawh ka tum lem lo kha a ni bawk. Mahse rin loh lam takin rawn sawichhuak tuah țang nalh bawk sia.



Ka dul chu chulin "Naute chu a țhang duh dawn hle mai a" a ti a, "Ka lawm e" tiin ka biang chu a rawn chuks zauh.



"Mipa nge hmeichhia ni se i tih ?" a tih chuan "Eng mi pawh ni se dam leh hrisel taka ka hrin theih chuan ka lawm vek a ni mai" ka ti a, min kuahna ațang talchhuah ka tum chu "Tihian awm rih teh" tiin min kuah tlat.



Ka dara a khabe nghatin ka dul chu a chul riak riak a, "Nang mi eng nge i duh a?" ka tih ve chuan "Nangmah ațanga chhuak anih dawn phawt chuan sakawr pawh hring chhuak dawn la ka duh vek" tiin ka biang chu a rawn chuk leh.



"Duati" a tih chuan apple ei pah chuan ka rum nghut a.



"I thinrim lo em ni ?" a tih chuan "Engah maw ?" ka ti let a, ka apple ei anga thlum chu bazar ah leitur a awm angem aw tih ka ngaihtuah nghal neuh neuh.



"Tinge min thinrim khum ve ngai miah lo ?" a rawn tih chuan ka nui hak a, a țawngdan ki chu amah ka thinrim khum loh avanga lungawi lo zawk ang alawm anih le.



"Thinrimma chuan thilțha a keng hleinem" ka ti a, a rum nghut.



"Mahse thinrim khum ta ngai miah lo che ila kan ințhen hlen daih anga, tunah pawh hian ka fa i pai kher lovang" thinrimna chu thilțha tak a ni tia sawi tum ang mai hian a rawn țawng a.



Nui chung chuan ka inher a, a kut pahniha ka kawng hnunglam chu vuanin min melh chhuk run.



"Apple hi lei leh ang" tiin a hmai zawnah chuan ka lek a, a rinloh lam ka sawi daih vang nge eu vakin min en a.



"Ațha lawm. Naktukah kan lei leh dawn nia" min thlah a, thawk hawk hawk in a ban chu a vai kual vel a.




"I khua a sik leh lo em ni ?" ka tih chuan min en vut a, "Aih.... thildang a ni" a ti ringawt a, engmah sawi zawm lo chuan thaw hawk hawk in a ban chu a vai kual leh.



Sitting room lamah chuan pheisan in ka phone chu ka en a, dar 2 a ri tawh a, WhatsApp group message a rawn thleng nual bawk.



Kan college ah hian pasal ka nei tih hria an awm mang lo nia, chutichung chuan be tu hi ka nei ngai miah lo! Luck lo ve tak chu ka ni.



Zorema chu a ban la vai chung chuan sipai kal dan tak hian a rawn pen phei thlup thlup a.



"A lum ka ti" ka bula rawn țhutthlak pah chuan a ti a, "Haw la va inbual rawh" ka tih chuan a ding uai a.



"I nu lo haw hma chuan hawsan che ka duh lo" tiin a rawn țhu thla leh.



Ka țhu awn diai a, Zorema chuan min melh deuh ngar ngar.



In be lo chuan kan awm ta reng a, kei hahdam deuhin ka țhu a, ani chu a țhu mar ut.



Ka nu call ka dawng a, ka lak chuan țawng pawh ka țawng ve hma in "Duati hei i û te an rawn haw tlai dawn si a, naupang ho hi ka awmpui rih ang ngai dawn anih hi..... mahniin i lo awm hlau em? Helamah i rawn phei ve mai dawn em mi ?" ka nu chuan a ti zat zat.



"Khawnge ka u te chu an kal a?"



"Muani pu damlo an han kan ve kha an awm lai lai khan a zual sia, an rawn haw maithei lo anih hi" a tih chuan ka lu ka bu nghat nghat a "Mahni chuan awm hlau hran love, nangmah zawk kha i buai em? An harh tawh si naupang kha" ka ti leh chuan "Buai lo e.... i hlauh loh chuan a țha hlauh anih chu. Zorema ka call sak ang che nga rawn riah pui che se a țha ang" a tih chuan "A ngai lo, mahni pawn ka riak thei" ka ti vak a, Zorema chu ka en a, min lo en ve kar.



"Call reng reng suh" tiin phone chu ka dah ta hmak.



"Eng nge a ?" a tih chuan "Ka nu a lo haw mek a, mamawh ka neih leh neih loh min rawn zawt" ka tih chuan a ngawi zui mai a, eng emaw ngaihtuah hmel hi a pu.



"A lum i ti sia, va haw tawh rawh.  Ka nu lo haw mek tho" ka tih chuan rinhlelh hmel deuh hian min en a, engmah sawi chuang lo chuan a tho thurh.



"Ka rawn be dawn che nia" tiin a chhuak zui.



Ka thaw huai a, ka nu chuan lo va call hrem pek lo se ka ti  bawk.
.
.
.
Mahni chuan chaw ka ei a, ka chaw ei tui lai a ni bawk a, mahnia ei e tilo chuan ka țeuh tho.



Khua a thim det det tawh a, kawngka chu kalh hmakin phone khawih pahin țhutthlengah chuan puanlum nen ka mu a.



Ka lo muhil a ni ang kawngka rawn inkik ri chuan min ti harh a, dar zat ka en chuan dar 7 chauh a lo la ni zui.



Kawngkhar lam ka pan mek lai chuan ka phone chu a rawn ri a, mahse la leh phawt lo chuan kawngkhar chu ka hawng a, Zorema chu a lo ding tlawn zuah.



Min hmuh chuan a benga a phone dah chu la thlain a call button chu a hmet a, ka phone ri chu a tawp ve leh chiah.



"Enge i tih a ?" rawn lut ta phawt lo chuan a ti a, "Rawn lut phawt la" ka tih chuan a rawn lut a, amah chuan kawngka lah chu a kalh vei that.



"Ka lo muhil a" tiin ka mutna sa țhutthlengah chuan ka mu leh a.

"I nu in min rawn call a" a tih chuan ka chek hlak a. Ka nu chuan a lo va call tak tak anih chu. Mahnia awm nuam ka tih tehreng nen.



"Enge a rawn sawi a ?" hre lo awm tak chuan ka ti leh a.



"Ka rawn riak ve dawn" a tih chuan ka en a.



"Phal lo mah la ka riak dawn tho" tiin a kut a kuangkuah a, țhutthleng ban kham chuan a mu nghal hmak.



"Rawn riah kher angai lo. Mahnia awm te pawh ka duh ve a" ka tih leh chuan "Keichu tah hian ka mu anga, nang roomah i mu anga mahnia awm ang chu i ni mai dawn lawm" a tih chuan ka thaw hak.



"I duh duh dan khan awm vel teh a" tiin ngaipawimawh duh lo luiin ka phone chu ka en san daih a. WhatsApp status ka check lai vel chuan Cindy message ka dawng a, ka en vat.



"Ka bialpa thlalak, a chhelo asin" tiin thlalak chu min rawn thawn a. A chhelo tak tak reng bawk.



"Hetiang hian an duh ve tak tak lo ang che" tia ka va reply chuan "Min atchilh hlum lo chauh. Tunah pawh hian kan inbe pah reng" a tih chuan ka nui a, "Anih i nu te chu i hrilh tawh em ?" ka tih chuan "Aw ka nu chu ka hrilh a, mahse min hau a i pa chu hrilh reng reng suh min ti a" a tih chuan ka reply dan tur ngaihtuah in ka ngawi vung vung.



"Hrilh zawk la chu ka ti tho mai. Christian anih chuan kei chuan a pawina ka hre lova...." tia ka reply chu.



"Ka tia keipawn. Mahse anu hi hnam ngai pawimawh chi hi a ani sia. Mizo a ni lo kha pawi a ti ber. Awii ka hrilh lai phei chuan 'Mizo ngei ni zawk se, Christian lo pawh nise mizo anih zawk chuan ka duhpui tho ang che. Mahse mizo a ni lova ka duh hlawl lo' min tih sak alawm" a rawn tih chuan ka ngawi leh vung vung.



"Mahse mizo leh zo lo ah ka buai lo. Christian anih a min hmangaih chuan a tawk. Kan mizo mipate neih tur pawh an awm lo. Ruihhlo bakah mipat mipatnaah an mang zo vek dawn" Cindy bawk chuan a rawn ti leh a. "Nia, a buaithlak anih hi" tiin ka reply veleh.



"I pa chu hrilh hrilh rawh" ka tih leh chuan "Nia hrilh ngei ngei chu ka duh. Mipa zawk ania, a thuthluknaah pawh ka nu aiin ka ring ngam zawk a. Engtin pawn min ti se a duhloh dana awm chu ka tum bik lovang" a rawn tih leh chuan reply tumin ka type a, ka type mek lai chuan "Duatiiii!!" rawn ti vak chu ka melh.



Zorema chuan hnai fahranah min en lo en a, ka phu zuk nghe nghe.



"Mawla, lungphuchawl in thi se min ti mi" tiin a darah chuan ka beng taih a.



"I phone kha dah tawh rawh. I khawih rei tawh" a tih chuan ka en a, "Lawks" tiin Cindy chu ka reply a, Zorema chu en leh in "Mamawh i nei em ni ?" ka ti a.



"Ka ril a țam" a tih chuan "Chaw i ei lo em ni ?" ka ti a, a lu chu a bu nghat nghat.



"Bai chiah awm tawh asin" ka tih chuan "A pawi lo, i siam anih chuan" a ti a, tho in choka lamah chuan ka kal zui a.



Zorema min rawn zui chu "Ramteiin rawng a bawl lo em ni ?" ka ti a, ka bai bel chu en ka en a, a daih deuh tawh avangin ka chhuang leh te te.



"Chawlh ka pe lawm" a tih chuan "I haw hma tho sia in bawl mai ta che" ka ti leh a, "Ka khua a sik leh a, ka mu daih alawm" a ti a.



"Min ngaihsak te pawh ka phut ve a" a rawn ti leh chuan thil ka ngaihtuah chhuak zawk.



"Nangpawn college ah pawh khan min ngaihsak loh kha. Min mitsir duh leh chauh anih kha" ka ti a, kan ngawi zui vung vung.



"Kha kha chu i bulah Hriatrenga a awm a...." a ti a, fridge chu hawn pahin "Chu chuan min ngaihsakna a dal chuang che em ni?" ka ti a.



"Ka thik alawm" a tih chuan artui chu la chhuakin ka nui hak.



"I bialnu nau chu i thik em em a" ka tih chuan a rum nghut a, "Ka bialnu a ni lo" a ti hmuk.



A lawm lo lutuk chu ka chhaih chak a, artui chu chhut keh pahin "Mahse a hna kal tur te kha i thlah țhin bawk sia" ka ti leh a, "Kha chu ka hmangaih hma che a thil thleng alawm" a rawn ti.



"Scooty te pawh i lei sak a, eng ang nge i leisak kha ?" ka tih chuan a rum leh nghut.



"I duh ve em ni? Nau i neih hunah i duh duh ka lei ve ang che" a tih chuan ka nui leh hak.



"Duh lo. Ka pasal hlui bialnu lirthei neih ang lo neih ve chu a hniam thlak lutuk" ka ti a, artui kanna tur tel chu ka leih bawrh.



"Awi a pawi lutuk! Tel ka leih sual tawh" ka ti nghal chûl. Tam lutuk chu ka leih lo, mahse amah hian tel mawm lutuk a ei theih loh avang hian kan ti mawm ngai lova.



"A pawi lo, ka ei thei tho ang" a tih tak avang chuan ka thaw huai.



Chaw chu a ei a, kei a bulah țhu in apple bawk chu ka lo ei leh.



"Apple chu i duh tak hle mai a, naktukah a case in kan lei dawn nia" a chaw ei lai chuan a rawn ti a, "Țawng lo khan ei rawh" ka lo ti hmak.



Tuna kan awmdan chu a nuihzatthlak ka ti a, a hma kan awmdan nen chuan danglam tak a ni.



Min duh ve tak tak ni anga a lang chu a duhawm a, mahse bumna mai mai anih ka hlauh lutuk vang hian nge amah ka pawh dan hi a dik lo.



Keimahah hian ka sawifiah thiam si loh rinlohna lian tak ka nei a, ka lo hmangaih em a, hetia a awm pawh hian nuam chu ka ti veng veng. Mahse ka lo hmangaih em avang chuan a thiltih engkimah a rinawm hle tih a fiah lo anih ngat chuan ka â thei tawh  ngei ang.