D-BLUE CH☆14 by Samm♤
D-BLUE 14
by Sammy♤Ch☆14
<Ka fit țung ringawt lo, nangni aiin Duati ka hmangaih ~ Zorema>
DUATI POV.
Hun kal chak ka tih theih nen ka tun hun hman dan chu kalmuang ka ti a, nikhatah hian darkar 48 zel a awm ta hial zawk emaw ni.
Outing ah pawh ka kal ve lova, ka tih theih loh tur annih bakah eng tih mah hi ka phur tak tak tawh lo.
Christmas chawlh a rawn ni chho a, boruak chuan lung a ti lengin kan khaw lam min ngaihzual tir kher mai.
Nî a la tla fel lo, choka tlakdeng lama tukverh ațang chuan nî chuan min la rawn chhun a, kan inthlang kawng hnuai lei chàr a naupang infiam ri nak nak chu ka en a, ka lung hi a leng em em ringawt.
Kan khua ka ngaihtuah a, kan khuaah pawh khan tun ang naupang school chawlh hunah hi chuan khawlaiah khan naupang hi an tam thei khawp a..... phinhphihlip leh bâk te tlawk vuak thlak tum khan an ri nuai nuai zel.
Ka țhenawma Pu Kunga ka ngaihtuah a, tun ang hunah chuan a damțha anih ngat chuan a tiang nen an kawtlaia naupang lo pawnto tur kha a lo hnawt anga, an ni naupang lah in tlanchhiat zawr zawr pahin an chhaih bawk anga... Chung thil ka mitthla te chuan ka nui suk a, tunah chuan Aizawl veng țhenkhatah chuan naupang pawnto pawh an awm tawh lova, Aizawl mai pawh ni lo hmun hrang hrangah a ni tawh zawk ang.
Hun hi her let in tuna ka thil tawn tur te hi hre lawk vek ila, a hmasa ber atan chuan Zorema hi ka nei lo chiang ngawt ang.
"Enge i ngaihtuah vung vung? Puan pho va seng rawh" ka nu chuan min rawn sawi pah chuan a rawn ti a, harh zawkin ka tho a, pawnah kan thawmhnaw zar chu ka va seng a.
"Sam'ang ințhen zawng ana ngei....." rawn zai chu ka en a, ka khek raih.
"Hmelchhenu... in inluah tih te min hrilh ve ta che" tiin Cindy chuan min rawn kuah a, ka thawmhnaw pawm bawr nen chuan ka lo kuah ve țawk țawk.
"Engtik in nge i lo haw? Engtin nge hetah kan awm tih i hriat a ?" ka tih chuan "Ninawm zawhna i ngah thei lutuk..." ti hlukin puan ka seng bang ho chu a seng a, "Tinge i lo haw dawn te min hrilh lova, eng min lo hawn?" ka tih leh chuan "Zingah khan ka rawn thleng tawh, lut phawt ang" a ti a, in ah chuan kan inzui lut.
"Duati Zoreman a rawn call a, a khuasik avangin zaninah a rawn leng dawn lo aw" ka nu chuan a lo ti a, "Min hrilh kher a ngai lo" ka lo ti hmuk.
"Ehe! Cindy-i chu engtikin nge i lo haw a ?" ka nu chuan a ti hlut a, "Vawiinah ka lo thleng chiah, hei Duati hi thil sawipui ka duh a ka lo kal anih hi" Cindy chuan a ti a, "Ni e ni e... inkawm rawh u" tiin ka nu chu a kalsan leh ta daih.
Cindy chuan thawmhnaw min thleh țhatpui mawlh mawlh pah chuan "I hre vek tawh.... i û in min hrilh vek" a ti a, "Chutiang sawi rih lo teh. I zuk awmna chanchin chu sawi phawt teh" ka lo ti a.
"Khulam chu a nuam, ngaih pawimawh hmasak ka ngai lo. Nangmah zawk hi..... Thah daih che hi ka duh ni!" a rawn ti vak a, keipawh chu ka phu zuk.
"In ah te hian Zorema rawn kal te phal mah ta che.... Nakinah Lalsangzuali chu ka la sawisa hrep ang...." a ngawi vung vung a.
"Ka lo na ve lutuk a Duati... Tinge engmah hi min hrilh ngai loh a, mahni chauh khan i lo tuar a, Zorema hi mipa ni ve tlak pawh a ni lo" a rawn ti țap țuau a.
"Țap suh.... a ho emai. Anih tur ang kan ni vek tawh lawm" ka tih chuan min rawn kuah a, "Zorema hi nei tawh hlek suh ang che" tiin a insut hraih a, ka mittui chu rawn hnâm ve nghal.
"Țap suh, i țah chuan ka țap ve dawn ania" ka ti veleh țuau a, kan pahnih chuan țap chung chuan țap lo turin kan han inthlem tawn a, bengchhet zai ngaithla ang kan ni.
Kei rai rilru no lo ni bawk, ani Cindy lah min khawngaih leh na min tihpui em vanga țap bawk. Kan țap hlawp hlawp a, a țawp lamah phei chuan in en in kan țah nui zawk.
In be miah lova rei tawk kan țhut hnuah Cindy chuan "Enge i lo țah nge ngawt a ?" a ti a, "I țap hmel ka hmuh khan ka țah chhuak ve lawm" ka lo tih chuan min nuih a, "Rai rilru no nei țan ni maw..." a ti a, ka nui ringawt.
"Ka ngai thei lutuk che a" tiin min rawn kuah vak a, "I induh si. Lalruatfela lah hi bialnu nei ve a, min be lo ringawt" a ti a, ka nui leh ringawt.
"Nichin khan i nu khan Zorema te kha a sawi a, a rawn leng fo țhin em ni ?" a ti a, ka lu ka bu nghat nghat.
"A rawn lang reng zel.... ka nu lah hian a be țha em em a" ka tih chuan "Heihi lawm hman ațang tawha i nu ka ngei nachhan, thah daih ka duh" tiin a inhrosa a, a vaupung hi a na ve a, mahse a sawi ang zawng zawng erawh hi chu a tih duh tak tak thil an ni chuang miah lo.
"Eng nge i rilru dik tak hi? Zorema neih leh i tum em, nau te i keng tawh bawk si" a tih chuan ka ngawi vang vang a, "Ka hre lo, Zorema hi fiah ka duh. A inthlak tak tak nge tak tak lo, mahse ka hre bawk si lo... neih leh tlak a ni leh nih loh hriat ka duh" ka ti a, ka thaw zui hawk.
"Ka han ngaihtuah chian hian fate fahrah a han dah tum ringawt chu thil dik ni thei hian ka hre mawlh lo, mahse Zorema neih leh lah chu ka thil duh lo ber a ni bawk si...." Aww naute hian min va han tibuai tak em!
"I duhthlanna chu ka zah in ka pawmpui ber zel che a, mahse chuti maiin nem tawh suh ang che. Zorema hian i hlutna a la hre hauh lo, i hlutna, khawvela lunghlu vâng ber leh manto ber chi ai pawha nangmah ang hi an vàn zia leh i man to dan hi hre rawh se.... vawmpuah ang maia vawikhat vawm a puak leh mai tur a ni leh ni loh te fiah vek rawh. Nangmahah a zahawmna hlauh khawpa a inphahhniam hnuah chauh pawm la ka duh. Mahse i thu vek ania..." a ti a, ka lu ka bu nghat.
"Ka lawm pui rual che in i lo rai ta kher hi a pawi anih hi" a ti ve hap a, "Ni e.... mahse a thleng tur ang a thleng vek tawh a, inngaihtuah buai vak vak ai chuan Zorema hi pasal tak tak tlak a ni em tih hi hriat ka duha nimai. Ka nei tawh dawn lo ti pawng pawng mah ila ka lo rai leh tawh si a, Azualtei a thlah tak tak a kei leh kan naute tana țha taka awm a tum ve anih chuan ka la pawm leh thei mai ang. Mahse ahma anga chiah a ka hlauh anga a fa ngaihsak lo nih hlau siin Azualtei nen min kartawn chhen dawn anih erawh chuan a hmuh phak lo ah ka kal vang vang ang" ka ti hap a.
"Hmeichhe hi kan mak! I rai hi pawi ka tih em em nachhan chu hetiang rilru i put ka rin vang ania. I fa lo piang tur i fahrah ringawt chu i duh dawn lova, mahse Zoreman insiamțhat nan an hman tak hlauh leh i vanneih a ni a. Engpawhnise chhel takin awm la, engkim lo thleng apiang hi hmachhawn dan thiam ila a țha ni mai" a tih chuan ka lu la bu leh nghat a, sawi tur a ngah bawk a, zanriah te kil ve nghalin zan dar 9 velin a haw ta chauh.
><><><><><><><><
Ka nu ka û te in lamah a leng phei a, keiin in ka nghak thung.
Tihtur em em nei lo in excer te ka la a, ka naupai pawn thlathum hmel a hmu tawh a, ka dul pawh a puar ve ak tawh.
Ka awm zel dan tur ka hre lova, ka sawi tawh ang khan Zorema chu naute tan chuan ka nei leh thei mai anga, mahse chupawh a nunchangah a innghat tawh.
Ka rai rilru no vel vang nge achang chuan Zorema chu ka khawngaih ve țhin a, kha leh chan Azualtei nen an inzui tawh a ințhen tawp chu thil harsa a ni ve ang.
Chutia excer ka lo lak vel lai chuan Ramtei a rawn lang hlawl a, ka dul puar ve ak tawh a hmuh chuan a țap ringawt lehnghal.
"In mawl dun lutuk hi țah pui zawih zawih tham alawm" a ti a, choka dawhkanah a thil rawn khai te chu a dah a.
"Tinge i lo lan ve tehmial a ?" ka tih chuan a mittui hruk pahin țah insum zet hian "Zorema nuamsam lova, thil i ei loh a hlau a min rawn tir anih hi" a tih chuan ka chek hluk.
Nizanah khan ka nu khan a khuasik thu a rawn sawi kha a ti taka, lan pawh a rawng lang lo reng anih kha. Ka lo ngaihtuah zui miah lova, a khua chu a sik nasa viau anih ka ring.
"Japan apple leh grape, eng eng emaw ka rawn keng a" tiin țhutthleng sei hun ah chuan a țhu a.
"Lo țhu teh" tiin a bul chu a beng thak thak a, ka țhut ve mai bawk.
"Rai i ngaih anih dawn hi i no surh mai, bakah a hma ai pawn i thau ve deuh tawh alawm" a tih chuan "Ka țha sa alawm" nui chungin ka lo ti a, "Ni e, chuvang aniang Zorema pawh hian a duh em em che ni" a tih chuan ka nui ve tawp ringawt.
"I thil ei te a tui em? Luak chhuak vel hi i nei lo em ni ?" a tih chuan "Thil ei chu a pangngai a, luak chhuak tih vel hi ka nei miah lo" ka ti a, "I vanneih hle nih chu.... Zorema kha thawkkhat lai khan raino ang chiah hian a awm a, a luak a thil te kha a ei țha thei lova. A lo nuhah ve anih dawn kha" a tih chuan ka nui a, ama insawi ang tak tak a lo nuhah ve anih dawn chu a.
"A dam lo nasa viau em ni ?" ka tih chuan "Nasa ti ila, nasa em em lo. Mahse a khua sik reng mai. Pakhatah chuan zan a meng rei thei lutuk a, chhunah a mu leh mang bawk si lo. A taksa chau lutuk hi a ni ber ang" a tih chuan "In entir se la, chutiang ringawt te chu a țha dawn em ni ?" ka tih chuan "A duh lo alawm" a ti a.
"Azualteiin a hre lo em ni? Hruai se la damdawiin lamah te chuan" ka tih chuan "Thil hi i hre lo si a, Azualtei a biak lohna a rei tawh. Azualtei nena inhnimhnaih a duh loh avangin a lehkhabu publish tur pawh kha a cancel vek" a tih chuan "Tinge !?" ka lo ti vak, mak ka ti em a ka insum hman lo a ni ber.
"Tuna publish tur te hi Azualtei hriat hnai te an nia. A duh lo, Lunglei lamah dawr thar hawn paha tih publish a duh a, mahse Lunglei ah pawh a la kal ta chuang lo" a tih chuan "Tinge !?" ka lo ti leh a, mak ka la ti reng.
"Awww.... nang i lo rai leh sia i bula awm a duh lawm. A ngaihtuah dan che hi i hre lo anih kha. Tunah pawh dam lo mahse a ngaihtuah vang che in min rawn tirh hi" a tih chuan ka ngawi tawp a.
"Azualtei nen chuan tinge an ințhen tawh em ni ?" ka tih "Aw" a ti tawi tak.
"Vawikhat pawh Azualtei kha a rawn kal a, rawn luhkhung a tum ni zawk Zorema nen an inhau hrep bakah Zorema pa khan a rawn hau hrep bawk a Zoreman a haw tir leh anih kha. Chawh hi ka ti sin awwww" a tih chuan ka ngawi ta vang vang.
Azualtei nen an inbe tawh lo tih pawh a sawi lo hrim hrim a, bakah Ramtei pawh hian a hresual a ni ve maithei.
Nge ni a min hmangaih thu a sawi khan a lo ti ve tak tak zawk em ni ang?
Ramtei chu tlai rawngbawl dawn velah a haw a, ka nu leng pawh Ramtei haw hnu lawkah a rawn haw ve a.
Zanriah kan kil lai chuan ka nu chuan "I pa a rawn chho dawn a, hetah bazar ve ila a ti a" a tih chuan "Nia... a rawn chhoh hunah kan bazar anga chuan kan haw thei tawh anga" ka lo ti ve a.
"Hetah mass hman i duh lo em ni ?" ka nu in a tih leh chuan "Duh lo, kan khua a hman ka duh lawm. Bakah Pu Kunga nilum ai te pawh ka hmu chak alawm" ka ti a, ka nu chuan min nuih.
.
.
.
Inthurual ang mai hian Cindy leh Ruatfela chu an rawn leng a, Cindy chuan Ruatfela chu a chhuahchhal nghal char char.
Ruatfela lah chuan ngai pawimawh lo deuh hian ka țhat leh țhat loh ngawt te chu min zawt a, a tawpah Cindy lawm lo chuan "Lalruatfel amah chauh kha be suh ka la awm ve ania!" a rawn ti tuar.
"Hahahaa.... eee i lo hmu lo che a" Ruatfela chuan ngeiawm deuh hian a ti a, "Naupang te te hian ka hmingpum te hian min lo lawl lawl a" a ti phun niah niah a.
"I rualpui kawm tur hmu zo hek lo che" Cindy chuan a lo ti a, "Kannu awm a tawk" Ruatfela chuan a lo ti bawk a.
"Keini pawn ngaihzawng kan nei kan sawi kan sawi lo...." Cindy chuan lo la ti leh zek.
"Vairamah i awm bawk a, i rawn țawngthei haw hle mai" Ruatfela chuan a ti a, keiin nui chungin Grape chu ka lo sil mawlh mawlh.
"Kha ei rawh u" tia ka chhawp lai chuan kawngka lamah khuh thawm a rawn awm a, Zorema chu kan en țhap.
A rawn kal phei a, ka grape chhawp chu a rawn en run mai.
"I damțha tawh em ni ?" a tih chuan "Aih, ka ngai che a ka rawn kal anih hi" a tih chuan Cindy leh Ruatfela chu ka en a, anni pawh chuan min lo en run mai.
"I damloh chuan rawn kal angai hleinem. Harsatna ka nei lo ka tih kha" ka tih chuan "Ka hmu chak che sia lawm" a ti leh a, ka țawng zel chuan ka in țawng awk zo vek dawnin ka hria a, ka ngawi ta daih.
"I damloh chuan rawn kal angai hleinem. Harsatna ka nei lo ka tih kha" ka tih chuan "Ka hmu chak che sia lawm" a ti leh a, ka țawng zel chuan ka in țawng awk zo vek dawnin ka hria a, ka ngawi ta daih.
Ruatfela leh Cindy haw hnu pawh chuan Zorema chu a la haw ve lova, inbe chuang si lo chuan ngawi reng in kan pahnih chauh chuan ka awm tawp.
Țhutthleng ah chuan mu in ka phone ah chuan games ka khel a, Zorema pawh chutiang bawkin țhutthleng dangah chuan a țhu a, a ke a lawr zuah a, a ban chu a kham bawk.
A che reng a, ka melh leh zawk țhin. Țhutthleng ban a kham chu thing mai ania, hreawm a ti deuh nge a khamna bek chu a thlak chhen a, a chang leh a ban chu a kham hnan thul. A in ah chuan nise khum dup nuam lutuk ah emaw sofa dup nuam deuh ban khamin a mu dawn sia, ka khawngaih ve deuh.
Mahse engahmah ngai lo ang chuan games chu ka khel a, kan la chak thei lo lehnghal...
Phun hlukin zung tur chuan ka tho a, ka ke chhuatah ka nghat chu ka rak țhat a, Zorema pawh a rawn inperh tho nghal.
"Mu rawh, a mu a ka khat thuta a za lutuk a ka insum hman lo nih kha" ka tih chuan ka ke chu a en a, "Khua a vawh nen mawza bun ta che" a ti zui hluk.
"I la haw dawn lo em ni ?" ka ti daih a, min en run in "I nu in chaw eiah min sawm a" a ti a, "Duati" ka bula rawn țhut pah chuan a ti dam dap a.
Din pah chuan "Mu leh rawh, lukham kha kham rawh" tiin pen mai ka tum a, ka ke mu chu a la za lutuk.
Ka kawng dawmin ka ding teu a, ka ke zat vanga nui lo tur chhuak lo tur chuan insum in ka hmui chu ka pet țang țang.
Ka awn thut a, rak zui țhat in Zorema darah chuan ka invuan vat.
"I mawl em ni!" ka ti vak a, chhuata tlu thal tawp turah ka inngai hman.
"Min dahthla vat teh, ka zun a chhuak ania" ka tih chuan choka bathroom awm na lamah chuan min pawm a, bathroom kawngkhar nek hawngin bathroom chhung chu a thlek vut.
A chek hluk a, min dahthla in "Hetiang vang hi nia rawn haw rawh ka tih ka tih... i rai len hunah phei chuan khutiang commode ah chuan i țhu thei dawn mi ?" a ti a, ka ke la sa mer mer chuan ka pen lui a, "Lo buai suh, a rai a zawk pawn buaina ka neih loh hi" tiin bathroom kawngka chu ka khar a.
Diktak chuan kan in luah lai hi ka duhthusam tak chu a ni bik hleinem. Mahse tun ang laiah in luah tur a vang a, chubakah a rei tawh dawn lo nen a palzam mai mai theih lutuk.
Ka zung ri sur sur a, ka zun vang ringawt chuan ka awm hi a nuam em em ringawt mai lehnghal.
Ka chhuah leh chuan Zorema chuan eng emaw hi tuihmunah chuan a lo sil a. A thil sil pawh en lovin choka vel chu a en kual vut vut.
Engmah sawi lo chuan țhutthlengah chuan ka va țhu leh hmak a, ig ah lutin online shopping page vel chu ka en a.
Naute thil vel leh kum upa deuh tana hman tur night cream vel ka en a, ka nu țawngkam takin christmas a hnai tawh si a, amah ka nu inhnawih tur a ni ka en ni.
Zorema chu a kut lehlama stool leh a kut lehlama plate chawiin a rawn phei a, ka ke lamah chuan țhu in stool a hun ah chuan a plate ken chu a dah a.
Centre table te a awm ve thlip thlep lova, stool chu a rawn hmang țangkai thiam phian mai.
"A chep ah berkher i rawn țhut a" tiin ka bawp chu ka tluan lui a, Zorema lah chuan a malchungah a dah hmak.
"Kha apple hi a thlum tui lutuk" tiin engmah ka sawi hma chuan min rawn barh a, melh khui khui in ka lo țhial nuap nuap. Apple lah chu a la thlum em em zui.
Ka thil en lai chu ka en zawm a, a khât tawk apple min rawn barh chu ka lo hmawm veleh zeuh zel a.
"Duati"
"Immh"
"Ka thusawi hi lo ngaithla teh"
"Aw"
"Min en la" ka en a, "Apple kha a awm tawh lo em ni ?" tiin plate chu ka en a, nui suk in min rawn eitir leh.
"Thil hriatchhuah ka nei a. Kei hian ka lo hmangaih lutuk che a...." a ti a, a sawi zawng chuan a nui a, ka lo en ran.
"Atthlak takin ka duh phawt che a, mawlmang deuhin ka ti langa, tum loh takin ka hmangaih bawk che a" a tih chuan min rawn en a, a nui reng a, engmah sawi lovin ka en tawp.
"A tirah khan Azualtei kalsan tawp kha a theih bik lova, mahse kan inneih ațang khan i pasal ka nihna hriain i tan hmun siam kha chu ka tum ve lutuk. Mahse hetia kan awm hran phawt hi ka hmangaih che min hriatchian tir tu atan a lo țha zawk daih a"
"Ka hmangaih ve ngai lo che kha i ring a, mahse i ti sual der. Ka khawvela rawn lutin sulhnu tamtak hnutchhiahin ka belhchian tak tak hma che in i kal leh daih a, hriatchian chakna che in ka khat a, ka nun zawng zawng thlak danglamin atthlak taka hmangaih che in zahpuiawm khawpin ka umzui tak duan duan che hi" ât hmel deuh hian a nui zui a.
Ka ke chu la sawnin ka țhu chhuak a, min en a, nui chung in "Duati i hmangaih nih kha a nuam a, hmangaih che hi a nuam" tiin a ngawi a, a nui hmel chu a tawp riai riai.
"Zorem...." ka tih leh chuan min lo țawng khalh a, thutak hmel zeta min en in "Ka hlauh tak ber chu 'hlim takin an awm dun ta a' tih hi nang leh kei ni lova midang nena in chanchin sawi nan an hmang ang tih hi ka hlau a ni. Hmangaihtu che thinglung na taka i siam anih chuan engtikah mah a hmangaih leh tawh lo ang che an ti a, min hmangaih leh theih tawh loh hi ka hlau a ni" a ti a.
☆comment☆
Comments