D-BLUE CH☆13 by Sammy♤

 D-BLUE 13

by Sammy♤


Ch☆13

<a tawi viau mai a!>



"Kan lawm e, ka lawm lutuk...." Zorema chuan a ti a, eng eng emaw Doctor chuan a sawi hnuah kan chhuak a, kan chhuah rual deuhthawhin Zorema chuan ka kut chu a rawn vuan nghal chat.


"Kal ang" tiin a vei lamah chuan a pen thurh a, "a ni lo" tiin a ding lamah chuan a pen leh a, "A ni looo" tiin kalna lam ber tur pawh hre lo chuan a ding a, ama biang chu min vawn lohna lam zawk chuan a dawm vang vang.


"Min thlah teh" tihpah chuan min kaihna chu ka thingthla a.


"Doctor pakhat thusawi vang mai mai a phûl hlut kher a ngai lo. A hre sual ve thei.... ka rai tak tak pawh ka ring lo" ka âw a, ka mak tihna leh lawm ruk ve tho na thup thei ang ber chuan ka ti a.



"Duatii!" a ti hluk.



"Lo rai ta pawh ni ila i fa pai theihna chance a tlem lutuk" ka ti leh a. Lo rai ta ila, Zorema fa a ni tih chu ka beng awmna ka hriatchian tluk hian ka hria. Mahse ințhen tawh kan ni a, naute avang maia inhnimhnaih țhat leh emaw kha ka duh tawh lo.



"Ka fa ni lo in midang fa i pai tih sawi i tum em ni ?" engthawl hmel zet chuan a ti a, "Aih, i fa anih theihna chance a tlem ka ti mai ni" ka tih chuan a nui hawk a, "Tu bum theih hian ka awm tawh dawn lo. Ka hrechiang hle mai Duati, damdawiinah kan tlang anga checkup kan nei nghal dawn nia" dam zet hian a rawn ti a, ka kuta rawn kaih leh a tum chuan ka lo awm sawn a, mahse min man betin ka kut chu a la a, min kai chhuak daih.



A motor hunna lamah min kai a, ngawi reng chuan ka kal ve zel.



"Lo awm lawk rawh" tiin a motor ah chuan min kalh hnan a, amah chu a lut leh.



Reilo ah rawn chhuak in motor ah chuan a rawn lut su dawt a.



Ka en a, a nui vur vur mai.



A tlan chhuak a, ka ngawi reng tawp.



Sawi tur ka hre lo a, biak pawh ka chak hek lo. Ka theihngilh thei lo, mahse kan nun ngaia let leh kha ka duh lo.



Ka lo rai tak tak anih chuan thu lawmawm tak a ni a, mahse rai lo ila, an hriat sual mai mai ni se ka ti takzet.



Zoreman a fa lo piang tur ngaihsak lo nih duh si lova Azualtei nen min kartawn reng tur kha ka peih lo.



Ka phone chu hman min dil a, ka pe mai.



A sih mual mual hnuah a beng bulah a dah a, a dah hnu lawkah "Rampui" a ti a, ka en nghal hra.



Engvang ngawtin nge ka û chu a biak ni.



Ka û chuan lawm takin a chhang lo tih hriat takin "Engmah ka ti lo. Damdawiin lam kan pan mek a, a pum chhunga ka chi inhlawm khawm mek check tir turin" a ti a, a sawi zawng chuan ka lo ip chawih mai.



Phone chu min rawn pe a, a la nui suk zui.



"Ka lo rai anih pawhin i lak ațangin engmah ka phût lova'nga, nangpawhin min rawn tihbuai tum suh ang che" ka ti a, "Duatiii!" a rawn ti leh hluai ringawt.



Kan ngawih reng hnuah "A hma deuha ka awm dan kha nuhah an tih ang kha anih dawn chiah hi" a ti a, ka en zawk a, a nui tih ka hriat chuan hmalam chu ka en leh.



"Midang fa-a nuhah ka lo nei daih chu amak viau lo maw Duati?" a ti a, chhang lo chuan ka ngawi reng phawt a.



"Azualtei um a i tlan kawi na lamah i chau anih chu. Khawilama nuhah mah a ni lo" a hnu deuhah chuan ka ti a, a rawn nui hawk hawk.



Engmah sawi zui tawh lovin damdawiin kan thlen thleng chuan kan țawng tawh lo.



Kan thlen chuan engmah pawh tih ngai lovin min lo buaipui nghal a.



Ultrasound te kan tih chuan nau ka pai ngei tih chu a chiang ta.



Naute chu ni 5 chauha thlahnih a la tlin loh thu a sawi a, lawm tur nge engtia awm tur nge ka hre lo.



Ka rai thu hi Zorema nena kan innneih țhat laia hria kha ni ngat ila chuan ka lawm em em anga, tunah pawh ka lawm lo tihna ni miah lovin ka lawmdan hi a famkim thei thlawt lo.



Doctor chuan vaitamins leh naupai tana  eitur țha, thil chi hrang hrang min hrilh a, Zorema hnenah chuan "I theih chuan innu hian ei chak zawng neih apiang tihsak zel i tum dawn nia, nau pai hian engpawh an ei thei lova. Huat an ngah a, an rai no lai nilo an rai lai hrim hrim hi chuan keh thei dawm tak meuh meuh a dawm hi an țha ber" tiin a hrilh bawk.



Damdawiin ațangin kan chhuak dawn țep tih chuan ka ding a, Zorema chuan 'Enge ?' tih en hian min en a.



"Ka duh lo..... Tihtlak ka duh" ka tih chuan a meng phawk vak a, "LALDUATPUI!!" a ti vin țhat.



"I tel ve na thil hi ka duh lo!" ka ti leh chuan a mitmeng leh a hmel awmdan chu a inthlak chak lutuk. A in seh ruh a, a bek a pawnga thisen zam leh a khabe ruh kual te chu a pawng țawlh țawlh thei.



Min kai nghal dawr dawr a, țap țepin a a kaih ang ang chuan ka kal kawi a.



Motor ah chuan min țhut luh tir a, amah pawh chu rawn țhu lutin a tlan chhuak nghal.



Engmah a sawi lova, engmah ka sawi
tawh bik hek lo.



Tihtlak chu ka duh bik lo, mahse awm miah lo se chu chu ka duh zawk.



A eng vang kher kher chuan nge maw kha zanah khan nupa nun kan lo hman kher kher a, chuta kara kan chi a la inman fuh viau mai ni.



"I lak ațangin engmah ka beisei lova, min rawn hre zui tawh suh ang che" ka ti a, a la ngawi reng.



"Nau hi chu ka nei ngei ang, mahse....." ka tih lai chuan a rum nghut a, "Engvang tehhrep hian nge i lak ațanga kalbo tura min duh em em a?" a rawn ti.



"Nat leh ka duh tawh lo!" a reh nghal duk nimai hian ka hria.



Motor chu a ti ding a, kan la ngawi reng.



"Duati" nem deuh zawk hian a rawn ti a, ka hma lam chu ka en ran.



"Ka tihpalh.... I duh angin ka duat thiam lo che a, i phu angin ngaihsak tawk lo che tih pawh ka hria. Lo haw la, bul țan țha ang" nem deuh hian a rawn ti a, ka  ngawi reng.



"Duati" tiin ka kut chu a rawn vuan a, ka hma lam en reng chung chuan "Ka sawi tawh kha Zorem... Țhen leh mai mai tura ka neih loh thu che ka sawi ang bawk khan i vawikhat kamțha vanga rawn haw leh mai tura țhen che ka ni lo!" ka kut chu ka la sawn.



"Nupa kan la nia lawm.....Ka la țhen ve lo che" tiin ka kut bawk chu a rawn la leh a, ka kut chu phihsawn pahin amah chu ka en a "Min hmu thiam lo em ni, Hmangaih che hi ka bansan tawh! I bula awm ka duh lo a, i kianga chen leh ngat phei chu ka duh lo hul hual. Naute avanga ka rilru nem sawt tur leh danglam tura i ngai anih chuan i tisual hle" ka ti ve țhak a, min lo en kuau ringawt.



"Ka tihlan chhuah thiam loh ka thinlung a mi hi i hmu thiam bik miah lo...." a tih chuan ka nui hak a, "Ka hmangaih che min tih tum suh. Min hmangaih lo! Eng anga mi zei lo ber pawn a thiam ang tawkin a hmangaihna chu a tilang ve țhin alawm.... Ka hmuh laia Azualtei nena infawh te, ka hmuh laia Azualtei nen inkai riala kal te, i nupui rilțama daha Azualtei nen tlei taka awm duh te kha min hmangaihna i tihlan thiam ve dan chu ?" ka ti a.



"Ka sawi zawng pawh hian min la vilh ngut ngut thei asin! Vawi engzat nge zanriah eitura ka nghah thlawn che, vawi engzat nge zinga i hmel hmuh duha ka thawh hma țhin te hi i hria em? Ka theih ang ang chuan ka hmangaihna che kha ka tilang ve țhin alawm. I pa in ngeiah i nupui hmaa i ngaihzawng huaisar taka i rawn hruai ngam te kha mi min hmangaihna chu? Kan ngaih chhan tur che ka ngaihtuah chang hian maw 'Ka hmangaih che' min tih hnua Azualtei i fawp lai ringawt kha ka hre țhin.......... Min hmangaih dan hi a nasa em a, ka tuar zo lo anih hi!" ka ti a, ka mittui chu hru in hmalam chu ka hawi leh ka hmak.



"Duati" ti supin a che hrut a, ka darah rawn beiin "Ka tihpalh.... Ka tihpalh lutuk" tiin min kuah a, engmah sawi lo chuan ka țhut ngai chuan ka țhu reng.
.
.
.

Hostel ka thlen chuan ka mu nghal hmak a, ngaihtuah pawh ka nei lo.



Ka û in min rawn phone in thil awmdan min zawt a, Zorema chuan engtin nge ka phone hmanga a biak theih tih te, thil chu chîk takin min zawt.



"Ka chau rih em a, engmah sawi ka duh rih lo" tiin ka dah ta ringawt.



Chaw pawh ei lovin ka mu reng a, intihfai takngial pawh ka la intifai lo.



Dar 7 a ri dawn dek dek a, zan dang ang bawkin Hriatrenga rawn lang.



Vawiina ka bo daih avanga an buai hman thu te a sawi a, ka țhat leh țhat loh te min zawt.



"Ka nuam sam lo deuh a" ka ti ringawt a, engmah chu ka sawi zawm chuang lo.



"I hmel hi a dik lo, eng emaw harsatna i nei em ni ?" ka û ang chiah chuan chîk takin min zawt a, ka lu ka thing mai.



"Ti hian maw kan tih dawn a, țhian kan ni emaw a tia" a tih chuan ka nui a, ka nui chu tawp riai riai in ka hmai ka hup a, ka țap leh ta!



Ka thil tawn hi ka hne lutuk.... Nun thar ka țan țhat ve mek laiin ka lo rai leh a, ka chhungten an hriat hunah engtin nge an tih ang. Zorema hnena kir leh mai tura min tih te chu ka hlau a, Zorema bula awm lehna hlauhna chuan min luah khat a ni ber mai.



Hriatrenga chuan ka dara rawn kuahin ka dar chu a tuai vut vut.



"Zorema nen khan ka hmu cheu a" a ti a, "Tianga i awm hi chu ka ring sa lawm" a ti leh.



Ka duhtawk ka țah hnu chuan ngawi rengin kan țhu a, a reh tlawk tlawk a ni ber mai.



"Theihngilh i duh tiraw ?" a tih chuan ka lu ka bu nghat a, "Min kawp la, Zorem mai mai theihngilh tur chuan ka siam khawp ang che" a tih chuan ka nui hak a, a zat vang erawh a ni lo.



"A hun lo viau a mahse Duati  chhuahpui che ka duh, hman ațang khan....."



"Ka rai!"



A reh nghal duk a, Hriatrenga chu a rawn nui chhuak hawk "Min chhuahpui i duh loh pawn sawi țha la, khatiang kher a...." a tih leh lai chuan "Zorema fa ka pai" ka lo ti leh a, a nui ta hawk hawk.



"Chuvang em ni thisen kha i pek ve theih loh ?" a ti a, chhang lovin a nui sâng hmel chu ka en, a hlim bik mawlh lo tih hi a hriat lutuk.



"Ka lawmpui lutuk che...... Zorema pawhin a rilru a thlak anga, țha takin in awm leh thei ang" tiin a kutzungpui pahnih chu a rawn ti pir va a, ka en tawp ringawt.


><><><><><><><><><><


Ka rai thu ka nu ten an hriat rualin hostel ațang chuan min la chhuak a, ka pa in zir zawm tawh lova kan khaw lama min haw pui mai a duh laiin ka nu leh ka û in zo law law turin min duh leh tlat a, ka pa nen chuan kan țang zo lo.



Ka pa chuan ka kal zawm leh dawn anih chuan ka û te bula awm lova in luah ka nu in min awmpui tura a duh thu a sawi a, ka nu pawh chuan a hnial ta bik lo.



Kan college hnaih takah hmuin kum tawp dawn lamah chuan kan luah lut veleh phawt chu ania...



Zorema leh a chhungte an rawn lang reng a, Zorema pa chuan haw leh mai tur te chuan min ngen a, ka nu leh pa bulah pawh an ngen nasa. Mahse ka keimah berin ka duh miau loh avangin tihngaihna a awm lo.



Thup reng theih ni hek lo College ah chuan an hre ta fur hlawm a, Zorema nen kan innei tih hre ve hlawm hek lo mi en hrek hrek ka hlawh in sawi ka hlawh hle a, a nuam lo ve țhin khawp mai.



Mahse Feli te an awm a, engkim hre ve tu an ni bawk a, nitin chu ka la tlingtla ve thei zel mai.




Inrinni a ni a, Zorema te chu amah bakah a nu leh pa, U Tetei leh Ramtei te nen an rawn lang țhup.



Ka nu chuan a lo be bawr bawrh hlawm a, keipawh min biak chang chuan ka chhang ve tho bawk.



Rei lo ah Zorema tih loh zawng chu an haw diak a, a ni chu a la awm reng.



Ka nu lakah chuan mark țhat tum niawm tak hian ka nu chu a phûr deuh hian a be surh surh a, thil te chu a tihpui zung zung. Kei nen erawh kan in be miah lo.



Tlaiah haw in ka nu chuan chaw eiah a sawm a, mahse mawihnai taka hnarin a haw hram.



Zanriah kan ei lai chuan ka nu chuan "Keichu mițha tak a niin ka hria..." ka nu chuan a rawn ti a, ka ngawih reng vang nge "Zorema kha" a rawn ti leh kher a, ka la ngawi reng.



"Nau awm zirna school ah a kal a ?" a tih chuan ka melh ralh a, Zorema khan eng dawt nge maw a lo hrilh ni.



"Chutiang school a awm lo... awm pawh nise a kal hman lo" ka lo ti hmuk.



"A awm alawm, a thlalak te pawh min hmuh... E! Zorema thlalak i nei em ?" a rawn tih leh chuan ka melh leh ralh a, "Engatan nge i tih a ?" ka ti a.



"I neih chuan en reng rawh... Naute khan a pa am chhun dawn alawm" a tih chuan ka hnar ka tum dat a, "En lo pawh ni ila a fa tur ania an chhun dawn tho" ka ti hmuk a, ka kham zui daih.



☆comment☆