D-BLUE CH☆12 by Sammy♤

 D-BLUE 

by Sammy♤


Ch☆12




DUATI POV.


A reh hian a reh hmak mai.


Min rawn biak emaw ka ring a, vawikhat tal țhen lo tura min tih leh kha ka lo ring a ni a. Mahse thehmeh an sawi ang mai hian reh hmak mai.


Engahmah ngai lo anga lan tum mah ila a theih bik si loh.


Vawikhat te mah ka duh leh hmangaih ang hian min hmangaih let ve lo tih ka hre nawn a, ka hriat reng ni mah se ka la na vawng vawng tho.


Nitin chuan College chu ka kal ve a, ka û te inah pawh chuan ka la awm ve zel.


Zorema chu a thawi pawn, a hlimthla takngial pawh ka hmu ngai lova, enge maw ka hriat a ka zawn ru ta fo mai.


Chutianga kan nih takah chuan kan chhungte ve ve beng a thleng a, nu leh pa te chu indawrin țha takin thu an sawi a, Zorema nen ber ințhen kan duh avangin tih theih vak an nei lo.


Ka û chuan sum chhuah a sawi a, ințhen chuan engkim tihfel law law a, ințhen ti ve uk a in koh haw leh mai mai theih ai chuan  inhnimhnaih leh kha a duh tawh loh thu a sawi.


Ka nu leh pa (Zorema nu leh pa) bakah UTetei te chuan sum chhuah kher chu an duh lo hle a, dawn pawh an dawn let duh dawn loh thu an sawi bur mai.


Ka û lah chuan engkim chu tihtawp law law a duh a, a ințhena te tur berin ințhen kan duh miau avangin engmah sawi buai lo tur chuan a ti ve hmak.


U Tetei lah in "Ka nau hian ințhen a duh ve reng reng hleinem!" tiin a țang tlat a, Zorema ber lah chu biak theih loh leka indah buaiin engmah a sawipui theih der lo.


"I nuța laktlak loh phiangsen tihnat reng atan ka farnu neihchhun hi ka phal bik hleinem" ka û lah chuan ti ve bur bawk.


An thusawi apiang chu a zawldawh leh zaizap zawnga la mai lovin a pawngpawrh zawng chuan a la ta zel a, UTetei nen chuan an inbakkhaih thui țep hman.


Puitling te chu inrawlhin Zorema nu leh pa te chuan sum em chu chhuah rih lo mai turin min ngen ta tawp a. Ka pa te pawh chuan tun atan chutia țawngkam sawifel mai chu a pawi loh thu an sawi a. Mahse Zorema pangngai taka sawipui a, thil anih dan tur anga nih tir zung zung chu a țhat zawk tur thu an sawi bawk.


Kan inbiak rem dan chuan awm in Zorema in lam ațang pawhin ka thawmhnaw vel chauh ka la a, ka lak laiin amah pawh a awm lo.


Ka hmuh lohna a rei tawh em em a, Ramtei hnena enge a tih țhin tih ka'n zawh khawmawi ve chuan a lehkhabu ziah an tlangzarh tur chungchangah a buai țhin thu leh ina a awm tam loh thu a sawi a, "Anih chu" ka ti duh lek.


Zorema khawsak vel dan tur chu ka mitthla thiam mai. A duhdan takin kan ințhen tawh bawk a, chuta karah a lehkhabu ziah langzarhna hnai nen Azualtei nen an duh ang ngeiin hun an hmang tam thei tawh ang chu.


Ka thaw hak a, ka tel loa a hlim viau theih lai hian enge maw ka indawm kun reng bik ang ni.


Ka kawngah chuan engpawh lo awm se ka pal ve pawp pawp mai tur alawm. Ani hmangaih reng hi ka bat a ni lo e.
.
.
.

Karhnih ngawt chu pangngai tak chuan hun ka hmang chho a, nitin college kalin college ah chuan țhian ka kawm a, abal chu in ah awm in Muani chu ka pui ve țhin.



Ka û te bula awm ngawt reng chu ka inthlahrung deuh a, thisen zawm pawh ni mah ila nupui fanau nei a inbengbel ve tawh a ni a, keiin a lo bawhbuai ve reng hi thil tihchi ni chiah pawh in ka hre lo.



Ka nute bulah pawh ka sawi a, ka pa chuan in luah tur zawng mai turin min ti a, ka nu lah chuan rem a ti lo. Hmeichhia mahni chauh a awm chu a him loh thu leh pasal țhen hlim ka ni a, mi ngaihdana a mawi loh thu a sawi a. Ka nu hiam Zorema nena kan inneihna hi mi chuti teh lua in an hre lo tih hi a hre miah loh bakah heng aizawl angah hi chuan tumah midang chanchinah kan inrawlh tak tak hman loh zia hi a hre ve der lo.


A tawpah chuan ka tihluih tlat avangin Private hostelah chuan ka lut ta ngawt a, ka û chuan rem a ti lo viau a, mahse ka pa chuan hrilh in a rei tawh dawn loh thu te a sawi a, lungawi famkim zan lo chuan a pawm ve ta tho.


Ka hun hmandan tehnuai chu ngaihtuah letin ho ka ti a, ka nun hi thawnthu ziaktu in peih lo chung chunga a ziah luih ang ka ti.


Ni chu a liam zung zung a, khua a vawt in zing boruak a nuam thei viau mai.


Kan hostel awmna ah chuan 23 ngawt mipa 11 leh hmeichhia 12 kan awm a, a nuam pangngai in hostel strict over an ni lova, mahni in a awm ang riak angah a in ngaih theih.


Zorema chu a la reh zui vang vang a, min rawn be lova, hmuh pawh ka hmu ngai hek lo va. Phone emaw ațang pawha biak ka tum ngai hek lo.



Nitin chuan ka hre tam lo telh telh a, keimah pawh chuan ka theihngilh țan mek tih chu ka inhria. Hma ka sawn ve zel tipawh chu ka inhria.


><><><><><><><><><><><


December kan lai leh meuh chuan boruak chu nuam fia fia tak a ni.


Ka hostel awm chu ka ngaih nge pawh ka hre lo, ka taksa a mam chakin ka no surh a, keimah pawh chu țha intih ve hle lai tak a ni.


Chawlh hmain kan batch ho chuan vawikhat outing neih leh an duh a, an kal chakna te leh sum neih zat te en in ro an rel nak nak.


"I kal ve angem ?" Feli chuan min zawt a, "Ka theih te chuan kal ve ang" ka lo ti a.


"Keichu ka kal theihloh hmel" a tih chuan "Tinge...?" ka lo ti a, "Kartharah ațang khian kan chhung zin dawn a, kan rawn haw hman dawn si lo a" a ti niah niah.


"Mahse pawi pawh ka ti lo, chhungkuaa zin chu nuam ve deuh hi ania" a ti a, ka lu ka buk khum nghat nghat.


"Mahse urlawk zan vel chu kan hmang ho thei ang chu" a rawn ti leh a, "Aaa keichu dam chuan kan khaw lamah haw ka tum a. Kan khuaah Christmas ka hman lohna rei ve tawh si a" ka ti a.


"Anih kumthar tal" a tih leh chuan nui chungin "Nia... kan dam chuan kan tum dawn nia" ka ti ta ngawt.


Ka phone a rawn ri a, ka en chuan Hriatrenga ni.


"Hello"


"Khawnge i awm a? Library ah ka zawng che a ka hmu lo che" a rawn ti a.


"Playground ah kan awm daih" ka ti a.


"Lo awm rawh u ka rawn kal ang" tiin phone chu a dah.


"Hriatrenga bawk a mi ?" Fel in a lo tih chuan aw tihdan ka lu ka bu nghat nghat a.


"He mihring hi chuan a ngai ngawt mai che.... Ehhh eng emaw a awm chiang" min chhaih titih chuan a rawn ti a, "Â thei viau suh. Chutiang engmah awm lo" tiin ka lo khap vat.


Hriatrenga nen hian midang aiin kan inkawm nasa zual a, zana hostela rawn len zeuh zeuh pawh a nei țhin. A pawi ka ti lo a, kawm tak tak tur ka nei tawh lova Ruatfela lah kumthar lama nupui nei tur a ni a, tun ațangin in la fekfawn nghal em em a, Hriatrenga lo awm ve hlauh chu a zia phian zawk.


"Ka ril țam, campus bul cafe ah khan va kal ang" Feli chuan ding hluai hian a ti a, "Hriatrenga chu nghak lawk ila" ka tih chuan "Ninawm lutuk... enge rawn kal ve zel ngai ni" tiin a rawn țhu leh.


A phone a rawn ri a, a biak mawlh mawlh lai chuan "Tak tak maw ?"  a rawn ti hluai.


"Ka kal angai... Hriatrenga chu lo nghak mai rawh aw Duati" tiin chhan hman hma chuan a tlan nghal dawr dawr.


Ka thaw hawk a, ka nun hi a la thawveng famkim thei lo.


Ka hahdam viau emaw ka tih laiin pik taka ka thawkchhuah chang a tam a, enge ka la vei ber a, ka lungkham ber pawh ka hre thiam lo.


Hriatrenga lo thlen hnu chuan kan kal a, enge min zawn chhan ka zawh chuan "i bulah ka kal ve duh" tih zawngin min chhang a, a hahthlak țhin khawp mai.


"Outing na hmun tur an thlang tawh a" a tih chuan "Khawiah nge ?" tiin ka lo zawt vat.


"Reiek tlang leh khuangchera puk luhchhuah vel kha an sawi a, nakinah information chiang zawkin a la awm ang" a tih chuan "Khuangchera puk chu khawilaiah nge a awm a ?" tiin ka lo zawt a.


"Ailawng ah, vawikhat ka lut tawh a, ka infit loh zia ka inhre chhuak nasa sin aw" a ti a, kei ka lo nui.


Campus bula cafe ah chuan kan kal a, kan pahnih chauh kan nih vang chuan nuam ka ti lo deuh.


"Kan inkawm tam tawh nen i mizia hi ka la man hleithei lo" ka thil ei laklawh lai chuan a lo ti a, țhial zo te te in tui ka in a.


"Ka englai nge phawk chhuah i duh a ?" ka ti let a.


"I engkim hi ka hrechiang chak, mahse hriatchian hleihtheih lohin i awm a, i inhawn viau rual hian hnaih tak tak i har" a tih chuan ka chal ka ti chuar nang a, chutianga ka awm ka hre ve reng reng lo.


"Kan la inkawm tam lutuk lo a ni mahna" tiin ka ei zawm a. "Hriatchian che ka duh a, college kan chhuah hma hian. Nakinah chuan kawng hran zawhin kan peng diak anga nang phei chuan min hre reng tawh lovang" a ti leh a, "Ka theihngilh mai mai dawn hleinem che....."


"Mahse Zorema i hmangaih em em pawh i theihngilh tawh a" a tih chuan ka tawp hmak a.


Ka ngawih vung vung hnuah "Ka theihngilh hleinem......A hma angin ka ngaihtuah reng tawh lo mai zawk a ni" ka ti a, ka awm a nuam nghal ruih mai.


"Anih amah ah khan enge i hmuh  bik ?" a tih leh chuan ka en a, thutak hmel zet hian min lo en.


"Engkim ka hmu!" ka ti tawi tak.


Kan bul mai dawhkana rawn țhut tum te ka en chuan ka hawisawn leh vat a, Zorema leh Prof.Zira te an ni.


Ka thil ei lai chu midang ngaihtuah lo chuan ka ei zawm a, Hriatrenga pawh chuan min be zawm ta bik lo.


"Duatpui" tih leh mipa rum nghut in zawm chu zat chu ka hria a, Zorema te dawhkan lamah chuan zawi muangin ka hawi a, Prof.Zira chuan min nuih var var.


Ka nuih let a, Zorema ka en chuan en pawh min en lovin waitress hnenah chuan order a pe a, Prof.Zira chu en leh in ka nui ro hak.


Prof.Zira bawk chuan "Kan va inhmu khât ve" a ti a, tukinah pawh kan inhmu reng sia ka ti rilru nghal a, mahse a takah chuan "Nia" ka ti țha ringawt.


"Lunglei lamah chuan a buaithlak deuh a, mahse tih ngei ka duh bawk si" Zoreman amah biaa a rawn țawng takah chuan Zorema chu a en a, keipawhin ka en.


A sir zawng a ka hmuh vang nge a biang a lang ki deuh a, a hma aiin a cher tih chu sawikhawm dan țha ber a ni ang.


Lehkhabu ziak leh siamțha velin zan a meng rei dawn a, a taksa in a tuar pawh a ni mahna le.


Kan dawhkan in kik ri keuhah chuan ka ka hma mi chu ka melh leh a, "Min ngaihsak ve deuh rawh" a ti nghut.


"Ei rawh i plate a mi kha" tiin ka plate a mi chu ka ei zawm leh.



ZOREMA POV.


"Duatpui" Zir'an a tih chuan ka rum nghut a, midangin a hming an lam ve hian Lalduatpuii a ni kher kher hi a nu leh pa ka dem țhin.


A thil ei lai chu chawl in a rawn hawi a, ngaihsak lo ang tak chuan waitress hnenah chuan order ka siam zung zung.


Zir'an a biak leh chuan "Nia" a ti tawi tak a, Zira țawng leh tur chu ka lo biak avang chuan ka lam a rawn hawi a, min en reng tih chu ka hre reng.


Min en chu a țhutpuipa chuan ngaitheihloh hmel takin dawhkan chu kik riin amah chauh ngaihsak tur chuan a ti a, saw mihring saw vawikhat tak hnek leh ka duh.


"Hahdam țhin teh" Zira chuan a ti a, Duati ka hmuh avanga ka taksa țang țung chu thaw hawkin hahdam deuh zawk chuan ka țhu a. Duati chu ka mitsir leh zauh zauh țhin.


Kan awmhran ațanga hma a sawn dan chu ka mit ngei hian ka hmu ve. Ka enthla reng a, a chetdan leh a nunchang zawng zawngah chuan min ngai ve tawh miah lo ti pawh ka hria in ka hmu thiam ve e.
.
.
.

In ka haw a, a reh duk mai.


Ahma pawhin nui huau huau na in ni lo mah se Duati awmloh ațang in a reh zual nimai hian ka hria.


Room lutin ka intifai zui a, lehkhabu vel chu reilo te en ka tum a mahse ka rilru ka pek theih ngang loh avang chuan ka dah leh ta tawp.


Tunlai ka awmdan chu hahthlak tak a ni, ka zawi em em mai a. Ka taksa hah leh hriselna khawih pawi zawngin hna ka thawk ngai hauh si lo, nge nia hrem ka tawk ve zawk ni.


Khumah chuan ka mu a, banga kan tar kan nupa thlalak chu ka melh kar.


Ka ngai a, ka ngai lutuk.


Kuah vawng vawng a, ka hmangaih thu hrilh mawlh mawlh hi ka duh a. Chhete tala min la hmangaih leh hmangaihloh zawh a, anih loh pawha a thutiam kha hlen duhna chhete tal a nei em ka hre suh. A la nei anih chuan ka hruai haw anga, hmangaihna, ngaihsakna a dawn ngai reng reng lohin ka vur anga, min hmangaih leh theih nan van a arsi pawh khi ka la mai ang!



Mahse.....



Kei mihring hian ka tihsual ka hria a, insawifiah ve a, ka tihsuala ngaihdam dil te pawh kha ka duh mahse.... Pathian a ni bik lova, ka tihsual zawng zawng min ngaidam thei bik lo.



DUATI POV.



Hostel ka thlen chuan kan warden chuan ka thil nia sawiin parcel hi min pe a, ka nu ten thil min rawn thawn anih ka ring a, mahse ka ring chiah lo bawk.


Dorm luh puiin ka intifai te te a, muang changin ka intifelfai vek hnuah bawm chu ka hawng a, eng eng emaw eitur lam a awm nual mai.


Ka nu te min rawn thawn a ni lo tih ka hre nghal a, a thawnthu awm ang hriat tumin bawm chu ka en chiang a, engmah a inziak bawk si lo.


Apple chu la in warden bulah chuan ka va kal a, tu lo dah nge tih chu chîk tak chuan ka zawt a.


"Tlangval senior anih loh pawn fa a nei tawh maithei. Ngo ving veng cher ve lam lek lek" tia a sawi chuan ka û anih ka ring ta a, apple chu pe in "Kha ei ve rawh, a thlum tui ania" ka ti ngawt a. Warden lah chuan "Kan mit te hi uihlit ange" a lo ti fiamthu a, "Ka û min lo pek anih kha" ka tih chuan a la ve leh mai bawk a.


><><><><><><><><><><><><



Class zawng zawng off vek niin hall ah chuan kan phu suau suau a.


Kan college damdawiin pakhat a damdawiin hming ka hre ta lo. Chumi damdawiin atan chuan kan pe dawn a, pek tum ho chu thisen test hmasak phawt angai a, nurse 20 leh doctor 2 an rawn kal a, kan college medical team te nen țhahnem viau mah se thisen pe tur kan țhahnem ve tho a, an indaih lo hle.


Professor țhenkhat chuan min vil reng bawk a, ka thisen test hun chu ka nghak ve ran.


Ka hun a thlen chuan ka test a, result nghakin ka țhu ran bawk.


Ruatfela chu ka bula rawn kalin "Nang chu i pe ve thei lo" a rawn ti a, "Tinge hlauthawng tak chuan ka lo ti nghal" natna hlauhawm emaw nei turin ka fimkhur ve viauin ka hria a, thisen pe thei lo a țan te chu ka zak ru nghal chem chem.


Min en a, "Awih harsa ka ti" tiin a lu chu a thing mat mat.


"Enge... sawi teh. Tinge ka pek ve theih loh? HIV te hi...." ka tih țap țuau tawh lai chuan "Ni lo ni lo...." a rawn ti hluk a.


"Counselling room ah lut la, an lo hrilh mai ang che" a tih chuan a kawrah chuan ka pawt a, "Ka duh lo..... Ruatfel HIV ka positive a mi ?" ka ti țap par mai a, midang ho pawh chuan min en țhap.


"A hahthlak țhin emai,  eng natna hlauhawm mah i kai lo. Lo kal rawh ka hruai ang che" tiin Counselling room ah chuan min hruai a, ka lut ngam lo chu Ruatfela chuan min nawr lut nawk nawk.


Nu zaidam hmel zet doctor coat ha hi a lo awm a, chhuah leh mai te chu ka duh.


"Lo țhu rawh hetah hian" tiin țhutna tur chu min kawhhmuh a, khur ru der der chuan ka va țhu a. Mi tamtak zinga chutia koh hran ka ni hi ka zak a, thisen ka pe thei lo tur te hlei hlei chu ka zak lutuk.  Chuta karah thil duhawm lo tak ka hmachhawn mek bawk si.


"Țap lo la, in pa nghak lawk ang aw" a tih chuan ka en a. Kan pa a? Kan pa Zorema a tihna em ni? Zorema chuan hetah enge a rawn tih ve dawn?


"HIV ka positive em ni ?" ka tih chuan nui chungin "Ni lo e, thu lawmawm lam a ni e" a ti a, a sawi zawh rual deuhthaw in Zorema chu a rawn lut ve a, min hmuh chuan lawm loh hmel zet in rum nghut.



"Chibai u, Doctor Estheri ka ni a. Chuan ka lawmpui a che u innu hian nau a pai a, chuvang chuan thisen a pe ve thei lo ni" Doctor chuan ka rin loh lutuk mai chuan a rawn ti a.


"A rai maw.... Duati hi" tihpah chuan Zorema chuan min kawk a, Doctor chuan "Aw.... harsatna in neih loh  chuan ka clinic ah rawn kal ula checkup leh a in enkawl dan te ka lo hrilh ang che u" Doctor chuan a ti a, Doctor chu ka en tawp.


"Kan lawm e, ka lawm lutuk...." Zorema chuan a ti a, eng eng emaw Doctor chuan a sawi hnuah kan chhuak a, kan chhuah rual deuhthawhin Zorema chuan ka kut chu a rawn vuan nghal chat. 

☆Comment☆