D-BLUE CH☆11 by Sammy♤

 D-BLUE 11

by Sammy♤

Ch☆11



Ka û hmel ka hmuh chuan ka rilru a no zual a, "U" tiin ka țap țiau.


"Enge awmzia ?" tiin ka û chuan min en ang he haw a, a hmelah chuan thila hrethiam vat tih hriat tak hian a thaw hak.


"Lo kal teh" tiin min rawn kuah a, chutia min han tih phei chuan ka rilru a no zualin ka û chu ka țah khum chiam.


"Lut phawt teh ang" tiin inchhungah chuan min kai lut a, ka vahte leh ka û nupui Muanpui chuan min lo en țhap.


"Muani" ka û chuan a han ti zauh a, Muani pawh chuan hrethiam takin "Bawihte ka pua ang che aw..... Sarah room ah i chapal va la la, apu Hminga te inah kan leng dawn nia" a ti a, a fapa te zawk chu pua in a û zawk Sarah-i chuan phur zetin roomah chuan a chapal chu va la in a bun a, an nufa chuan an inchhawm chhuak vat.


"Țhu teh" tiin ka û chu sofa ah chuan a țhu a, la inhnit faih faih chung chuan ka țhu ve leh.


Eng emaw sawi tum in a ang zuau tawh a, mahse ka hmel a hmuh vang chuan nge tawp leh rih in min en vang vang a, keiin ka mittui chu ka lo hru leh zauh țhin.


"Țap thawl phawt teh" tiin a tho thurh a, kalsan chuang lo chuang a ding reng.


Ka țap a, țap chung chuan ka û pawh en chuang lo chuan "Kan inhau a..." ka ti țuau a.


"Chuan ințhen ka sawi a...." ka inhnit leh hraih a, "Ahma zawnga ințhen duh khan a duh ta lova....." ngaihthlak a hreawm a ni ang "Sawi tawh rih suh" ka û chuan a ti a, ka bulah chuan rawn țhu thlain min kuah a, "A tir ațang reng khan he hun hi chu a thleng dawn tih ka hria lawm" a ti sap.


Zorema nen kan inneih dawn pawha min duhpui lo tu kha a ni a, mahse a farnu neih chhun tak meuh ka ni a, kan inneih dawna ka hlim em avang khan engmah a sawi buai duh ta lo kha ania.


"I room ah lut la, va intifai rawh" tia min kuahna chu thlahin a ding leh thurh a, a kekawr ipte ațanga phone phawrh chhuakin biak tum nei awm hian a sik neuh neuh a, a beng bulah a dah zat.


Keipawh ahmaa ka room ni țhin lam chu pan in ka lut a, ka bungrua leh sulhnu chu a ngai ngaiin a la awm vek.


Khumah chuan ka țhu a, ka țap reng chu duh lo in chunglam ka melh ran.


Ka hmangaih che min ti ve bawk a, mahse a sawi zawh rual zel khan min hmangaihna kha a tawp nghal vek zel a ni ang.


Kan boruak a țha a, inngaih taka kan awm ve theih tawh kha ka ring a, nupa hlim tak nia inhauh leh inhmuhthiamloh awm tawh lovin. Mahse ka rilru ang chu pu ve in kan inkar chu țha reng tur pawn a duh lo. Azualtei a thlah chuan lo va, min zahderna nei lek lova an khawsa zui anih dawn phei chuan kei hmeichhe derdep ve lutuk maiina kan nupa kar chak lo lutuk  ka vawn nun tum reng bik nachhan tur ka hre lo.


Ka hmangaih zia inhre tu a ni a, hetianga min la awm khum ngam anih chuan anih nih nih ni ila pawina engmah a awm tawh lo.

Ka thaw hawk a, hetiang em em a hmangaihna kawnga vanduai han nih bik hi, mite hian an hmangaih takte thinlung hneh tur hian enge an tih bik țhin a, hmangaih te thinlung hneh dan formula te hi a awm em ni? Eng method ber hian nge an thawt kual a an rilru leh thinlung zawng zawng an neih sak theih bik ni.


Mi thinlung hneh dan formula leh method hrang hrang chu lo awm pawh ni se, kei a chhiarkawp thiam reng reng lo hian engtikahmah chu formula leh method chu ka hmang dik ve thei chuang lo ange....


Thawklehkhatah ka rilru chu ka siamfel vek.


Ka thei tawh hlawl lo, a tak rama a mi duhna leh ngaihsakna ka nghak chhuak dawn lo tih ka chiang a. Awmze nei lova pawngpaw nghak ve tawp nih ai chuan kan kawng ve ve zawh hrang tawh ila a țha zawk.


Ka inngaihtuah rauh rauh lai chuan ka bag a ka ah ka phone chu a rawn ri a, la duh chuang lo chuan ka ring kuit tir țhak tumah biak ka peih rih lo.


Mahse a rawn ri leh a, ka bag ațang chuan la chhuak in ka en a Zorema a ni tih ka hmuh chuan ka phone chu ka silent nghal hmak.


Tho in thawmhnaw khaina lam chu ka pan a, a hmaa ka thawmhnaw hlui te vek an ni a, hak tlak deuh tur chu ka en kual.


Inbual tur chuan room ațang chuan ka chhuak a, ka room ah hian bathroom a awm ve lova, choka bathroom hmang turin ka chhuak mai zel.


Muani te nufa chu an lo haw ve chiah a, Muani chuan "Tuilum te i duh em Duati ?" a rawn ti var a, mahse a la hma deuh tho avang chuan ka duhloh thu in ka chhang.


Ka û inah, ka û thlazarhnuaia awm ka ni tawh tih ka inhriat vang nge ka hahdam em em mai a, tunah tak hian indopui pathumna pawh rawn thleng se ka hlauh ka ring lo, chutiang khawp chuan ka û hi ka ring in ka thlamuanpui hle.


Room ka luh leh chuan ka û chuan bedcover chu a lo thlak a, "Ka zo țep" ka lut min hmuh chuan a ti a, khum bulah chuan ka lo ding ve reng tawp.
.
.
.

Zanriah ei zawh chuan a puitling awm te chu kan țhu țhap a, thil awmdan te chu ka sawi vek a, ka sawi chhung zawng chuan ka û chuan ngun takin a lo ngaithla tih chu ka hria a, enge a ngaihtuah ang tih erawh hriat a har.


Ka phone ka en a, Zorema call 8 a awm a, pakhat chu inbiakna a ni.


Ka inbual hlan khan ka û khan a lo bia anih ka ring mai a, ngawi reng chuan ka țhu tawp.

Chutah ka û chuan hrawk then kharh pah chuan "Zorem pawh ngaithla ve phawt la, nupa karah chuan inhauhna leh inhriatthiam lohna te chu awm ve thei a ni a. Tunah i duh ang hian ințhen a, sumchhuah kan ti rum rum anih chuan nakin zelah i inchhirna tur pawh a ni zawk thei a. Bakah nuthlawi i ni anga, kan society ah hian nuthlawi an en dan chu i hre ve ang. Nula i nih lai emaw pasal i neih laia i zahawmna ang kha i nei thei dawn lova, a pawng ataka ințhen tum ringawt pawh a dik ber lo. Zorema chu keimahin ka be leh ang" a ti dam dup a, thil sawi chu ka duh a, mahse ka û in a sawi chian em avang chuan ka ngawi a, rei lo te ka țhut leh hnuah room ah ka lut.


Ka mu a, engvang phiangsen nge maw mittui bawk chu a rawn luang leh tawh.


Ka hru tâwk a, Zorema hmel hmuh leh a a thusawi ngaihthlak chu ka duh lo. Eng ang pawn insawifiah mah se ka țhen tawh dawn tho tho a, ani biak a hmuh leh chu ka chak hlawl lo.


><><><><><><><><><><><><


College chu ka û min tirh luih vang bawkin ka kal leh hram a, amahin min thlah thlap.


Class ka neihna hmasa ber lam pan chuan ka kal nghal a, tumah chu hmuh tam ka peih lo. Ka țahna ah ka bui luk a, chuta karah mahni thawmhnaw lo ka ha a, ka confi thei lo.


Class hmasa ber chu Hriatreng leh Feli te ho nen a in ang a, kan inbe khât viau hlawm a, chutia anni ai hmaa ka lo țhu tawh chu an rawn phul hlut.


Feli chuan min en a "Duatpui!!" a ti hluai. An mahni chu en in ka nui ringawt a, han nuih bawk bawk leh țawng lang lang mood ah ka cheng rih lo.


Rei lo ah kan țan a, Prof.Zir'an roll a call a ka lo present chuan min rawn en chho zawk a, a call zawm lehnghal.


Board lam chu mit phe ruai chuan ka melh a, class chu zo vat vat se ka ti. Zorema ka hmuh ka hlau a, engtin emaw min dan a, min hruai haw a min kalhhnan leh te kha ka duh lo.


Hmmmh... ka ngaihtuahna mai mai chu! Min kai haw lui duh dawn teuh lo.


Feli chuan min rawn kheuh zauh a, note a a thil ziah chu ka en a, "Nizanah Zoreman i awmna min rawn zawt a" tih hi a lo ziak a.


Amah bawk chuan "A zawng nasa lutuk che, in inhau em ni ?" tih a rawn ziak leh.


"Hau lo e... Hrilh lawk lovin ka û te inah ka riak a" ka ti a, a lu a bu nghat nghat.


"I kalna tur hrilh zel tawh rawh, nizanah pawh a zawng nasa lutuk che a" tih a ziah leh chuan ka nui tawp a, "Aw le" chu ka ti țha veleh mai bawk a.

Class a zo a, inkhungțha mawlh mawlh in ka chhuak nghal a, campus chhuahna lam ka pan ding nghal.


"Duati..." ka hnunglam ațanga min au chu ka hria a, Zorema ngei niin ka hria.


Ka kal chak zual sauh a, mahse a rawn tlan nge ni min kuai her lawp a hmuh pawh ka hmuh chian hma chuan "Engmah sawi ka peih lo.... Sawi tur pawh ka nei lo" ka ti nghal a.


"Heyy.... Enge a ?" ka en chuan Ruatfela zawk a lo ni a, ka thaw huai.


"Nizanah khawnge i awm ?" a ti a, ka chal ka ti chuar tap.


"Zoreman a zawng nasa che a, a buai alawm" a ti a.


"Kan ințhen tawh. Engmah a chungchang ka ngaithla peih lo" tiin min vawnna chu ka thing thla a, Zorema chuan engvang kher nge maw min ngaihtuah ber awm anga ka awmna chu a lo va zawh hlawm ni.


"Enga! Fiamthu na chi a ni lo" a ti hlut.


"Ka fiamthu lo, ka hmanhmawh deuh a ka kal mai ang" tia ka inher dawn chiah tih chuan ka mihring hmuh hlauh ber mai chuan min lo dang ta chat.


"Duati" ka ban reka vuan in min en chhuk run a, "Min thlah rawh" ka ti let ve nghal.


"Tharum thawh lo zawng in aw" Ruatfela chuan a lo ti a, "Kan nupa kar anih hi" Zorema chuan a ti nghut.


"Kan ințhen tawh. Min thlah rawh, engmah sawi leh tih dun tur kan nei lo" tiin ka ban chu ka pawt let a, min vuan nghet lutuk tlat.


"Eee Zorem han thlah phawt teh" Ruatfela chuan a lo ti a, "Kan nupa kar ka tih chu maw le!" Zorema chuan a tih khum tuar.


Kan bula vela kawngkal chuan min rawn en țhapin ka hria.


"I hma zawnah khan kal rawh u hmuhnawm kan siam lo" Zorema bawk chuan a ti leh a, min hmu lo ang chuan an hawisawn nghal țhap.


"Zorem a na ania..." ka tih chuan ka ban ațang chuan a kut țang chu ka kut karah chuan a rawlh a, min thlah mai mai chu a tum loh hmel hle.


"Haw ang" tiin min kaih mai a tum a, "A duh lo anih kha" tiin Hriatrenga chu khawilam ațangin nge rawn lan tih pawh hriat lohvin min rawn dang leh a.


"Nang naupang kha kalbo rang rawh" Zorema chuan lawmloh hmel fe hian a ti a.


"Min thlah teh Zorem..." tiin min vawnna chu tihthlak ka lo la tum ve fan.


"Thlah rawh, a duh lo che nih kha" Hriatrengan a tih chuan Zorema chuan a dinchilh ur ur a, "Duati hian min duhlo a! Ka nupui in kei min duh loh chuan tunge a duh nga? Nang naupang hi maw !?" tiin Hriatrenga chu a melh khui.


Hriatrenga chu Zorema aia a tet deuh zawk vangin Zorema chu a melh chho ve khui bawk a. An insual mai ang tih hlauhawm tak a ni.


"I nupui hian a duh miau bawk si lo che a" a tih chuan a ri no chawk a, Hriatrenga chu a pai nghal chawt chawt.


"E.... Zorem.." Ruafela chu an inkarah rawn ding nghal a, "Naupang anih hi Zorem"


"Naupang chu puitling buainaah inrawlh suh se...." Zorema lah chuan a ti nghut.


"Hah.... Hmeichhe pakhat pawh hmangaih zo lo kha puitling tiin i inchhiar ve mi ?" Hriatrenga lah chuan a la rawn ti a, Zorema chuan a sawisa hrep mai ang tih ka hlau. Hriatrenga chuan a hneh dawn lo nasa mai si a, an intihlum thei mai ang.


"Kal ang... Zorem" tia țap țepin Zorema chu ka pawt a, Hriatrenga la melh khui khui pah chuan a kal ve mai tho bawk.


"Duati" min pawt ding a, ka biang tawn tawna vuanin min en a, a hnuah min kuah vawng vawng.


"Zorem ințhen ka duh" ka tih chuan min kuahna chu thlahin ka dar tawn tawna vuanin min en a, "Tinge i duh duh hunah hian ințhen hi i sawi ?" a ti. Engmah tihsual nei lo ang hrim in a la țawng thei nih chu.


Ka nui a, "Ka peih tawh lo, ka nei peih tawh lo che. Ințhen ka duh" tiin ka tawlh hnung dat a, min rawn khawih leh a tum chuan ka tawlh hnung leh.


"Duati!"


"Ka duh tawh lo che. I bula ka awm hian ka na reng a. Keichuan ka thinlung zawng zawng in ka hmangaih țhin che a, nang chuan natna bak min thlen ngai lo. Kan kawng  ve ve zawh ila, Azualtei nen pawh in hlim thei tawh ang. Țhian hlui ang chauh... ni lo hmelhriat satliah ang chauhin inhria i la, chutiang chu kan inkara thleng tur diktak zawk pawh a ni" ka ti a, a hamhaih lutuk hmel chu ka en a, ka nui hak. Ka damchhunga a tih hreawmna hnuaia awm turin min lo ngai tawh lutuk nge ni chutiang thu ka sawi ta mai chu a ngaithiam lo a ni mahna.


"Anih phawt le" tiin ka inher a, ka hma zawnah chuan ka kal mawp mawp.


Hmangaih neih chu thil duhawm ber a ni a, mahse min hmangaih let lo tu hmangaih erawh thil runthlak tak a ni. Hmangaihna vanga vawikhat kan nat tawh chuan kan na reng mai țhin.
.
.
.

Class pawh kal peih tawh lo in ka haw a, Muani chuan min lo be luam a, mahse ka awmdanah chuan a hrethiam nge mu hahdam tur chuan min ti a. Hnial lovin room ah ka lut a, khumah chuan ka bawk thlawp.


Hmangaih tawh lo ka zir a, duh lo ka tum a. Mahse ka hnaih telh telh a, ka hriat loh karin ka lo hmangaih telh telh a, ka lo vei em em țhin.


Ka hmangaih tawh loh vanga țhen ka ni lo, nat ka inhuam tawh lo. Ka tawrh zawh mai ka ring a, mahse a natna thlen hian tawp ni a nei bawk si lo.


A hmangaihna ve lah Țau mei chher ang lekin a lang a, hla tak ațangin ka hmu ve a, mahse belhchian a dawl hauh si lo.




ZOREMA POV.



Ka en liam a, ka rilru chu a buai nuai mai.


Min hmangaih a bansan tak tak em ni?


A na a, heta mi hi. Amah lo hmangaih ve em em tu langchhuak thiam si lo hi! 

A thusawi mal tin mai te khan ka lak ațanga hran a duh zia a tilang a, kal se engtin nge ka lo awm ve anga ka rilru tur a dawn hlek lo tih ka hria.


Ka sawi a, ka hmangaih thu kha! Mahse a tlai lutuk em ni?


😒Exam a hnaih tawh vang aniang, feel har ka ti 
☆comment☆