KA DUH BER CH-11

||KA DUH BER CH-11 ||

"Sawi ta che" tiin amah chu ka melh ngawt ngawt a. Ka rilru natna leh ka mak tihna chu a inzat reng ang ka ring.

"Chaw ei ila ṭha deuhin kan sawi dawn nia" a hma nen a in anglo tak chuan a rawn ti dam dap a, min kaih tum awm takin a ban a rawn phar zuau chu ka lo vai per sak a.

"Engmah hi ṭha taka sawi ka duhlo, Mapuia fa ka pai a chuan...." ka sawi zawm theilo ka mittui chu a sur in a rawn sur a. Insum tum zet chuan ka biang chu ka hru tawk a. Thaw hak in ka en a, "Mapuia fa ka pai a mahse ka hrelo maw! Engtik nge anih theih?" Ka ti sep a. Ka rilru na lutuk leh ka thluak a zawhna hrang hrang awm khawm chu bun chhuah dan ka hrelo ani ber.

Ka biang chu ka hru leh tawk a, "Ka haw duh, hetiang anih chuan kan inkawl reng nachhan tur a awm lo" tihpah chuan kawngkhar lam chu ka pan a, hnunglam aṭang chuan a taksa lian zet chuan min rawn kuah hlun in, "Ka tihpalh, ka hrilh loh che vangin. Mahse khawngaih takin ka bulah awm la, tlakchham i nei lo ang. I tello a hei leh chen hun ka hmang tawh hi min khawngaih la ka bulah awm hram rawh" a rawn ti a. A thusawi mal tin te chuan ka thin hnun hi a vit sawk sawk nimai in ka hria. Mipa dang fa ka pai tih hrechung pawn a bula awm turin min ngen ania, hetiang em em a tlawma awm tir tur hian eng ka nih loh nen. Hmeichhia, azahawmna laksaktu fa pai mai mai hma ah hian chapona pawh anei zo lo chu  ania!

"Nang hi i â takzet anih hi! Engtin nge hetiang chung hian i bula awm tura min tih theih ?" Ka tih chuan min kuai her a, ka biang tawn tawn vuan in, "A pawilo, ka bula awm la engkim hi...." a sawi zawh hma chuan ka lo pawt chat a, "Engtin nge hetiang chung hian i bulah ka awm theih ang, ka thianghlimna ka pek theihloh che  pawh ka tan a thil hreawm anih nen midang fa ka pai ani a, hmeichhe zaktheilo tak anga i bula la tal hawrh hawrh thei ka nih loh hi" ka rilru na nen U Hmingmuana rilru tur ngaihtuahpuia hriatthiampui tho si bawk nen ka hriatna tha zam te hi a chawl duk nimai in ka hria.

"Ka ngaihtuahna phiangsen kha kawl reng lo khan pai bo rawh!" inlak hran deuh pah chuan a ti tuar a. Keipawh ka tawlh hnung deuh hrat.

"Ka tihpalh" inthiamlo hmel zet chuan min rawn pan hnai lehnghal vut a. Ka lu thin khum nar nar pahin, "Aih, awmdun tur kan nilo; Kei ai ṭha i phu" ka ti hnual raih a. Ka bul dawhkan inhnung chu a chunga pot inhung nen a let nghal ṭhuai.

 

"Khawiah mah i kal dawn lo a, tu fa pawh pai rawh ka pawisa lo! Nang ka bula i awm chuan a tawk. Kei lo mipa dang nena hun hman i ngaihtuah anih chuan chu ngaihtuahna thai bo tur chuan chumi nen chuan ka dahṭha ang cheu. A chiang em!" chiang fiah fai fahran hian a rawn ti khawl khawl a, a thusawi chhung zawng thawk ka lo ip ngar ngar thung. 

Ṭap chungin ka melh ngawt ngawt a, ngaitheilo ni awm takin a awm ah min kuah bet hlun a. Ka chhipa fawp zui tawkin, "Ka bulah awm la, min ring la engkim hi a fel vek ani mai" a ti zuai raih a. "Mahse.." ka tih dek dek chuan, "Shhh, min ring tawp rawh" a ti leh sap a. Engmah sawi zuilo chuan amah kuah chungin ka ṭap chhuak ta hawk hawk. 

Tunah hian ka rilru hi ana nge engtin nge a awm pawh ka hrethiam lo. Vanduai bik riau ah chuan ka inngai a, hetiang ka nih hnu pawha nau leh zel ka lo keng tel chu ka fa lo piang tur mah nise a hreawm ka tiin ka lung hi adam thei thlawtlo. Ka pa in palai alo hnar zel nachhan pawh kha an hre tawh ani ngei anga, kan khuaah chuan engtiang takin ka chanchin lo sawi tawh ang maw! 

U Hmingmuana lakah chuan namen loin ka inthlahrung a, a hma pawha ka ṭit sa nen tun thil thlengah phei hi chuan a bula ka awm pawn thawk pawh ka la ngam dawn em ni? Engmah hrelo in a bulah ka lo pangchang ṭhin a, ani chuan ka raino nghawng ani a hrethiam ngei awm si. Hetiang ka ni chung pawha min neih aduh chu ka tan chuan thil hlu tak ani a, mahse kei tleirawl mai tan chuan a chezia engkim chu a zahawm in ka zah ngawih ngawih tur in a che tlat tawh a, midang fa nen phei chuan ani hi ka phu lo ngawih ngawih. 

Ka ṭah ban tawh hnuah pawh a hmel ka hmuh ngamloh vang chuan kan la ding reng a. Thil eng emaw tal ei teh ang a tih pawh chuan ka ding lui tlat. "Anih leh" tihpahin min pawm kang a. Nghet zetin a nghawngah ka kuah nghal ṭai. 

A pen pawk pawk lai chu ka zawhna vang chuan nge a ding chawt a, a thaw deuh hawk a min chhang lem loh avang chuan tal deuhin, "Min chhang rawh, nau ka pai tih hre rengin tinge sex min hmanpui kher" ka ti leh a. A ai mawihnai zawk a zawhdan ka hre lo va, mahse ka rai tih hre sa si a min mutpui chhan ka hre duh tlat ani. 

"i rai tih ka la hre hleinem, chuan i hrethiam em i nau pai hi ka fa anih theihna chance tam tak a awm tihna nih chu" a ti hniam sut a, zawi viau mahse ka bengah erawh a ring hle thung. A mah leh a mah pawh dawt a inhrilh duh ania! A hnungah chum ṭawkin nghet zetin ka kuah zui a. 

"Mimawl pa, engkim hi i dawt sawi vang vek" ka ti ṭuak a. Ka hnunga chulin min thlem leh rih. 

Mipa hetiang taka a tlawm leh chapona pawh dahṭha hmak thei  khawpa min hmangaihtu. A ṭawngkam in sawilo mahse min hmangaih tih ka chiang a, ka lak a chetphung zawng zawng hi a mipat pui ten hria se mawl tih a hlawh ngei anga. A chhan chu hmeichhia, hmeichhia ah pawh hlutna nei tawhlo min hmangaihin min tuamhlawm a. Hmeichhe ṭhenkhat chuan mipa induhtawkna pawh neilo, hmeichhia te duh huam huam angin ngaiin an hmu ngei anga, an hmuh nep phah viau bawk a. Mahse kei chuan ka duh zual phahin ka hmangaih nasat phah hleuh si. 

Mi ṭhenkhatin a love is blind anlo tih hi, ka tawngin ka hrethiam chiahin ka hria. Mi ṭhenkhat ngaih danah chuan kan chhiatna lai hmuh kana min hmangaih chuan love is blind ani a. Mahse ka love is blind ve ah chuan ka chhiat leh mawihlohna lai engmah hi a hmuh hmaih lo a, kei ai pawha keimah min hmu chiangtu leh hre ber tu ani. Ka chhiatna lai chu a hmuh kân ani lova, hmangaihna mit a min en tawh miau avangin a hmu mawiin min thuam mawi zawk alo ni. 

Zanah ah ka pu ten min rawn bia a, ka pu chuan dam dap hian, "Hreawm ti reng reng suh, I u Hmingtea kha ring tawp la. Rilru hahdam tak khan awm la, i pa emaw, midang ngaihtuah na ngailo. Rilru hreawm lutuk vang khan i lo damloh phah ange, vanduai bik riaua i inhriat chang chuan ti hian ngaihtuah la; heng hi thleng lo tase i u Hmingtea a anga miṭha leh fel i tawng kher angem. Panngai takin nun hmangchho  in Mapuia nen khan inneih pawh ni ula i hlim hauh lo ang. Chunglam hian kan tana ṭhalo tur leh kan hlimloh na tur in engmah a rel ngailo a. Nangchu i tan a ṭha leh hlimna a tawntir dan che a danglam mai ani" a rawn ti dap dap a. Min hmu theilo mahse ka lu ka bu nghat nghat. 

Rei ve fe kan inbiak hnu chuan kan dah a, mu tur in pindanah ka lut a, khuma U Hmingmuana lo ṭhu ka hmuh chuan ka tawi hret hret a. Min hmuh chuan khum chu a beng thuk thuk a, "Ka... ka,... ka bulah i mu dawn ami ?" Ka ti nawk nawk a. A beng leh thuk thuk takah chuan ka va pan a, ka lawn fel veleh puan chu minlo sin ṭhat tir nghal a. A hma anglo in a bula ka awm chuan ka tim leh dui tawh. 

"Mu la" a tih chuan ka mu thla nghal suai suai a. A bawpa min rawn khan in a kut pakhat chu min rawn kham tir a. A kut lehlam chuan ka hnute a rawn hum ran mai. A thaw chhuak suai suai a, ka en chuan a mit chhingin ka lam a rawn hawi a. Ka en lai tak chuan a rawn hnai sut a, ka meng awk thung. 

"I thluak ah hian engmah dah suh, brain rawh" a rawn ti chuan ka en  leh a. A mit a chhin tlat bakah a nui miah bawk silo nen ka nuih aza tlat pek a. Nui ring ngam chiah silo chuan ka nui put put a. Ani pawh chu rawn nui hawkin ka biang chu a rawn hmer a, ka hmuiah min fawp zui tawkin a mu ṭha leh a. Ka awma a kut dah chu ka dul a sawn thla in a chul nghal a. "Muhil rawh" a rawn ti hniam sut a, ka dul zawna a kut che kual che kual chu ka zuk vuan a ka kut chu man betin ka kut ṭang karah a kut chu a rawn rawlh a. 

"Ana ania" ka tih chuan a phelh vat. A kut kha a lian bik lutuk a ka kutkar vel kha akam na vek thei. 'Hmm hmm hmm' dut dut in ka dul chu a  chul a, keimah hi ka thawl huai huai in ka hria. 

Zing ka harh chuan ani pawh ala tho bik lo a, a muhil tawh sak sak chu ka en reng a. Hetiang em em a rilru thlamuanga ka awm hi ka hre ngailo, nimin kha chuan ka rilru a kal diklo in mahni pawh ka inthiamlo hle a, mahse a thusawi tawi te te tehian min hnem in ka thla ati muang em em si. 

A hmai chu ka tuai a, a bek leh khabe vela a hmul rawn ṭo siar siar chu ka khawih a. "Mu leh rawh ala hma" meng siar siar a atih chuan ka kut chu ka la sawn a. Tawlh thla hrut in ka awm zawnah a hmai a rawn phum a. A thaw deuh ham ham.

"Tho teh, ka ril aṭam ania" ka tih chuan min rawn en chho a, kan inmelh kawr lai chuan ka kawr chhanah ka hnute chu a rawn seh nih chu!

"Heyyy!!" Tihpah chuan a darah ka nam vak a, min la nuih zawk zawmah lehnghal. 

"Intifai la chaw kan ei dawn nia" a tih chuan tum barin ka tho chhuak a, a hriatphak loh tura phun sep sep in bathroom lam panin ka kal tau nghawng nghawng. Ka inbual kham chuan kekawrte nena ding teuin ka hnute chu ka enchiang a, a hmur kual lai chu tlem  kak deuh. 

"Hmingmuanpui ha hriam pa!" Ka ti nghek a. Ka hnung aṭang chuan, "Ka hre pha ania" arawn ti dut. Ka bana ka awm hliah nghal chuan, "Min lo enthla ziah suh, ka haw riau che nia" ka ti khui khui a. "Inha vat mai teh" tihpahin khuma ka kawrfual dah chu la in min haktir zui nghal mawlh mawlh. "Keimah pawn ka ha ve thei reng" tihpah chuan inthing nawk a. Ka inha ṭha zui mawlh mawlh. 

Keimah hi ka inhrethiamlo, nimin boruak nen ngaihtuah phei chuan amah bia a thinrim khum ngam tur ka nilo tih ka hria. Mahse chhungrila thlamuanna awm hian min ti ngampa a, thil thleng ngaihtuaha ka lo thlamuang bik riau pawh hi ka ngeiawm ang ka ring a, ka vei zui lemlo nen a ruk tak a min chhiat min chhiat khum ania ka rin ni. 

Rawng kan bawl phawt dawn emaw tih laiin bawl sa vekin alo awm a. Mak ti zeta ka en chuan a dar alo chhin ak a, ka harh hmasa khan ka hre reng sia, rawng a bawl hnuah a rawn mu leh ani hrim hrim. Sangha kan hmeh a, a ruh ka then pawh phallo in aman a duhtawka a then hnuah min pe chauh a, nimin tlai a thil min ei luih tir bak engmah ka ei mang silo a, ka ei hnem kher mai. 

Chhunah kan pahnih tehtlawng chuan kan awm a, tihtur a vang viau. Kan ṭhu chawrh chawrh ringawt a, ka mawng kham lutuk chu ka ding hluai a, "Thil tih tur ngaihtuah teh" min lo en chho kur tu hnenah chuan ka ti ngawt. A malpui beng thukin a rawn tho chhuak a, pindana min kai lutin wordrobe a hawng nghal zat a. "Bazar mai mai ang aw" a rawn tih chuan mit zim sunin ka lo en a, "Pawisa i nei ngawt ami?" Ka tih chuan arawn nui hawk hawk. 

"Kei tlangval Senoir hian ke neihloh i ring deuh ami ?" A tih chuan a hnung a ri zui awk a, "zak rawh, tlangval pawh ini bawk lo" ka lo ti hmuk. A nuih lah chu ala za ang em em zui a. 

Bazar ah chuan inzui chhuak ve pauh a, teikual bak tih tur kan va han hrelo dun chiang. Bazar mood ah ka chenglo nge ka duhzawng engmah hi ka hmu theilo. Dawrtê hmaah hian min dinpui a,dawr kalthei hawker ang hi nimai. An clip zawrh ho chu a mipa zawk chuan a enkual dun dun a, ka zuk bih pui ve chuan ka mit la deuh ka zu hmu nghal a, ka la chat. "Hei mawi" tihpahin ka kilh a, ani lah chuan, "Hei amawi zawk" tiin a mawi tih chu min lo kilh tir a tum ve a. "Hei amawi ka ti lawm, lei ang" tihpahin ka kal sawn daih a. Hla fe aṭang chuan ka en a, aman an inpe fel ta niang ka lamah a rawn pen phei pawk pawk a, ka bul arawn thlen chuan ka lu ah akut fu nghal chat.

"Ahh... hei hi ila bun char char elaw?" Tiin a ban bun chu ka khawih a, a lu a bu nghat. Ka kut chu a rawn hum nghal hmiah a, kan kal leh zui mai. Ani chuan ka banbun bun tir pawh ala bun char char bik a, kei ve chu a barbie min lei pawh khal pawh ka khal hman lo.

Bazar e tilo chuan chawhmeh eng eng emaw chiah leiin kan haw a, in kan thlen chuan Rosalyn-i kawngkhar bulah alo ding vang mai. 

"Hi, kal leh mai ka lo tum a. Ka phone tlang theilo che a, ti tur a min tih kha ka ti tawh aw" alo ti zat a. U Hmingmuana chuan lu abuk khum ringawt. Chutiang teh tawpa chhan loha han awmtir chu a ni thei nganga ka hriat loh vangin keimah chuan ka bia a, thingpui in tur te chuan ka sawm vel luam a, mahse rawn in taktak lo se ka tih kha a hre ru a ni chiang ang nidang ah tiin a a kal ta a. A hnunglam aṭanga ka thlir reng lai chuan, "i rawn lut dawn lo em ni ?" A rawn ti dut a. Lut tur pawha sawm loin pawnah ka lo be char char tih ka inhre ve chiah. Ka nuih chu aza ru ang reng,inchhunga lut tur pawha sawm lo khan thingpui intur ten ka lo sawm vel ania a.

Hun akal ve bek bek a, ka naupai pawn thla nga hmel a hmu tawh. U Hmingmuana chuan duat leh ngaihsak namen loin min duat a. A chang chuan min duat lutuk chu ka ngaih te a ṭhalo rum rum dawn ṭhin. Damdawiin a checkup tura kan kal hmasak ber khan thla hnih alo pum ṭep tawh a, zep leh phat theih rualloh in Mapuia fa ani tih a chiang. Mahse chuti chung chuan U Hmingmuana hian mitmeng danglam min hmuh anei ngailo a, keiin naute pian hun a huhphurh nen ani erawh in zan kan mut apiangin ka dul chul chungin lo piang vat vat tura a duh thu a sawi ṭhin. 

Pastor in kan in a rawn kal hlawl lai khan mak ti zetin ka lo en a, mahse U Hmingmuana khan alo ko lek chu niin. A hnu ah a ṭhiante ho kha an rawn kal a, rawn leng mai mai tur emaw kha ka lo tia mahse Pastor khan min inkutsuih tir a, hriatpuitu ah atan anlo kal kha ani reng sia. Ka bulah chuan, "I pa alo kal hun hunah emaw i pa hmu tura kan kal hun hunah i man chu ka pe ang" ati mai ṭhin a. UMuankima (a ṭhianpa) phei chuan, "Hetah in awm hlen dawn sia hmeichhe man a tlawm nen nang phei chu man neilo ini ringawt sia aw" min tih khum ṭhin a. Midang annuih laiin ka nui ṭha ve duh der lo, man neilo nih kha tumah hian anduh bik hian ka ring hlawl lo. A changin U Hmingmuana hnena ka innei thawt thawt chu ka vui a, a ṭhiante an lo leng zing si anlo len apiang in man neilo ka nih ziah a. Lehlamah chuan Pastor kohna chang kha hrelo in thep kual thep kual ta ila chuan mi hnen aṭang 'hetiang te chu, thu hretu pahnih khat nen inkutsuih mai ta cheu' hetiang lam thu ka dawng ka dawng a, kei raipuar nen min duhlo a tiin ka inkhap kual anga min hmangaihlo chan ka inchan tir leh ngei anga! Mahse ani hi zawng a kum hian a chaldelh tawh hrim hrim nge engkim mai hi a zei in a famkim thlap mai ni. 

Ala tawpp theilooooo 🌻🌻🌻