KA DUH BER CH-7

 

||KA DUH BER CH-7 ||



Sawmi leh Zorini pawh haw turin an in siam vek tawh a, motor lo thlen hun chiah an nghak tawh.

"Bawihte, i la awm duh maw? I thiante an haw chuan i lungleng lutuk nge" ka pi chuan ati a.

"Haw duhlo, ka haw zawk dawn mi? Min nin hmel ropui si" ka ti nang nang a.

Tunlai hi eng nge ka awmzia pawh ka hrelo, ka thusawi apiang hi ka ti deuh hmuk hmuk loh leh ka ti vin deuh chiam thin a, ka thinchhe em em zui a, ka thil ei ala tuilo tluang zel nen ma cher da bei bawk in ka hria.

"Haw daih rawh se, an awm hian min duatna an dal" ka ti leh a. "Amak a!" Ka pi chuan alo ti hluk a.

"I hmel a nih chu, ka la cham zawk dawn emaw ni" Sawmi chuan a rawn ti zawm ve a.

"Sawmi kha i hawn tur, hei Zorini aw" tihpahin Rinsangi chuan sarang ah hian eng emaw a rawn khai lut a.

"Eng nge, ei chi ami ?" Sawmi chuan a lo ti a.

"Ei chi lo eng nge nise i tih vak a ?" Rinsangi chuan meng pawng hlawt chungin a lo ti a.

"I mitmu pawng anih chu!" Sawmi ati leh a, an pahnih chuan an inhnial leh nghal.

"Bawihte" ka pu chuan min lo hui a. Ka pan phei vat.

"Vawiin chu damdawi in ah kal ang hmiang?" alo ti dam dap a.

"Eng nge kan tih nga?" Ka lo ti phawk hra ringawt.

"I pum lam te hi a fel lo aniang, i cher sawt lutuk" a ti nuah nuah a.

"Ka thil ei tuilo ve mai mai anih hiii" ka ti vak. Damdawiin kal ka peih reng reng lo, Pathian zarah ka hrisel tha a, damdawiin chu sawiloh damdawi ah hian nachhawkna a awm tih ka hre tawk a, chutiang khawp chuan damdawi lam hi ka hnaih lo khawp a. La inchiu lo mah ila hriau ka hlauh khanglang vang bawk hian damdawiin hi chu ka tih deuh tlat.

"Ni e pu, khutah kan rualin rawn chhuk ve se tlaiah in haw chho dun leh nghal anga ani mai a" Zorini chuan alo ti ve a. Ka melh nghek ringawt.

"Ni tak a, a tha ang. Bawihte han insiam ve teh, i pi nge keiin kalpui che i duh zawk ?" Ka pu chuan a ti nghal a. Duhlo eng ang in tap vak vak mah ila min hruai thleng dawn tho tho tih ka hriat avang chuan "Nangmah nimai" ka ti hmuk a. Pindan lamah ka lut tau hmak.

"Zorin tinge i pa chu ava rei veee ?" Sawmi chuan a ti hluai a. Ni e, a rei ve tawh em ani. Ka rawn chhuak a tihna pawh a rei ve tawh nen hian.

"Saw alo thleng alawm" Rinsangi chuan alo ti a.

"Khawi maw..... A ni lo, i pa'n motor ala thar leh tawh law?" Sawmi chuan motor lo tlan en pah chuan a ti a.

A khalhtu hmuh tuma ka en chuan ka tumlo deuh ka va hmu a. A ni sawn hetah eng nge a rawn tih dawn? Tih chu ka rilru ah a rawn lut nghal zat bawk.

"Ka pa ani lo, U Hmingmuana nih saw" Zorini chuan a lo to fan raih a. U Hmingmuana pawh chu a rawn inkhalh thleng mai bawk a.

Sawmi nen chuan an in melh nghal deuh ralh a. Midang in an hmu ve em chu ka hrelo mahse ka hmu chiang, an inmelh dan kha inmelh satliah ani lo!!

Sawmi hi en mi a ngaihzawn chu ?! Ka va han buai ta em, ka lo ral thik ngawih ngawih chu ka thiantha ber hi maw? Ka lung te chu a phu dup dup a. Ka thil ngaihtuah avang chuan ka tah a chhuak nghal tun a.

Ka laka a lo inlakhranna chhan chu ka thiannu vang lek!!

Inchhung ah ka lut daih a, ka pu hnenah, "Pu hetah in entir mai ang" ka va ti ngawt.

U Hmingmuana leh Sawmi bula awm chu ka chak hlawl lo ani ber e.

"Aw a pawi chuang hlei nem" ka pu chuan a lo ti mai a. Inthlak tumin pindan ah ka lut zui nghal a, thawmhnaw hak nuam deuh a inthlak in ka chhuak leh a. Thutthleng ah anlo thu deuh hmur a. U Hmingmuana chu ka melh zawk a Sawmi nen bawk an lo inmelh leh tak avang chuan ka hawisawn nghal daih a.

Ka pu bula thut thlak pah chuan, "Pu engtik ah nge kan kal dawn ?" Ka ti a. U Hmingmuana chuan aw a rawn thian kharh a, ka mit sir chuan min rawn en a ka hriat avangin ka awm pangngai vat a.

"Hei, thingpui te in law law se la chuan kan kal dawn nia" alo ti tha ve mai a. Ka lu bu nghat nghat in ka phone chu ka enzui daih.

U Hmingmuana leh ka pu chu an inbia a, ka ngaihsak zui lem lo.

Rimsangi'n pawn lam atang chuan min hui zauh zauh a, ka va chhuah chuan Mpa te ho nen an lo awm dul.

Tlangban ah uai pah chuan, "in va kim ve ?" ka ti hliai a.

"I haw dawn emaw kan tia i haw leh dawn silo a" Sangkima chuan a rawn tai aa.

"Haw dawn nang, min lo ngai nghal hlawm ani maw" tihpah chuan ka nui kur kur a.

"Kei tak chuan ngai lo che e, Mpa hian a ngai dawn che a" a rawn tih leh chuan.

"Nang hi i kimlo tak tak anih hi, Mpa te chuan Zorini lawm" ka lo ti veleh a, Mpa'n "Chutiang pawh ani lo" tihpah in a tukkhum a tuai vut vut a. Kan nui ho dar dar.

Eng eng emaw sawi a kan nuih ho dar dar hnuah an haw a, thatchhe zetin tlangbanah ka la uai a. Sawmi te pawh chu haw an tum ta lo emaw tih mai turin an thawm a reh.

"Hruai, tunge lo kal saw ?" Rimsangi'n a rawn ti a.

"U Hmingmuana anih saw" ka lo ti puat.

"Sawmi sawi ziah kha ani maw" atih chuan ka en phawk hra a.

"Ani em, Sawmi khan 'duh deuh anei a, mahse a duh a hian a hrethiam lo a' tiin min hrilh a" a tih zawm leh a.

"Ka hre bik lo, U Hmingmuana ani tih ka hre ve tawp a ani mai" ka lo ti ban chuap ringawt a.

"A duh deuh nu pawh chu ka hria sin" a rawn ti a, ka meng deuh awk chu ka pangngai vat a. Ka zawt zui lem lo, zawt lo pawh ni ila a rawn sawi leh vat dawn tho.

"I hre duh lo mi ?" Ka rin ang chiahin a rawn ti a.

"Immm" ka lo ti tawi tak.

"Sawmi....Saw alo kal" a ti chul a. Ka melh chho ha ringawt.

Ka rindan chiah, Sawmi anih kha ka ring reng ani. Ka hnual nghal rawih rawih a, tlangban ah chuan ka inbang hi ani ringawt tawh, a hrui chu chah tum ni awm takin a ri hruih hruih a.

"I uai chat dawn!!" Rimsangi'n a rawn tih rual chuan a ri thawt a, ka hma lamah ka awn nghal vek a, mahse ka kawr hnung lam atangin min pawt let dawrh a, a taksa ka va si dawt.

"Fimkhur thin rawh" ka beng bulah chuan a rawn ti sup a.

"Ka hria" tihpahin ka awm sawn a. Ka chet dan chu min lo en deuh ngur.

"In chhuak dawn tawh em ?" Ka ti ngawt a. Ka zawhna mil lo deuh a chik zet a min en in, "I va cher ve!" A rawn ti a.

"Nia" tihpah in luh mai ka tum chu min pawt let a.

"Dawr ah min lo kalpui teh, tui thianghlim ken tur te pawh ka duh a" a ti a.

"Ka kal peihlo emai, Sawmi kha sawm mai rawh" ka tih pah chuan kawngpui atanga min rawn auh na chu ka chhang nghal a.

Min hui deuh lauh lauh chuan min vawnna chu thlah turin ka ti a.

"I kal peih loh kha" a tih chuan, "Dawr kal leh sawlai kal a in ang hleinem" tihpah chuan ka in pawt let a. Kawngpui lamah chuan ka kal nal nal.

Ka thleng phei tep tihin ka pu in min rawn au a, "hei i thiante an chhuak dawn" a rawn ti a.

"Aww Sangkim nakinah lo leng mai ru" tihpahin ka tlan let a.

"Aw, khawi inhlang zung zung ang u" ka va ti lut phawr phawr a. Zorini pa, Pa Thuama ka tum loh deuhin ka va hmu a.

"Aaa pa Thuam engtik in nge i lo kal ?" Ka ti hu a.

"Hei tunah ka lo thleng chiah, kan kal leh nghal dawn anih hmel" a ti nui vur vur a.

"Mahse U...." Ka sawi dawn lai mek mek in Sawmi'n min rawn kuah a, "Kan ngai viau ang che, min lo en liam rawh aw" a rawn ti a. Min kuah lai lai chuan an lo chhuak nghal duak.

Sawmi pawh chu a chhuak a, U Hmingmuana chuan min rawn kuah vei hlun.

"I thiante chu va thlah ang le" a rawn ti a.

"Mahse nangman...." Kawh paha ka sawi dawn lai chuan min kuah chhuak a, ka kal mawl tawp.

Sawmi te tlan liam lai chu ka thlir reng a, ka rilru ah an awm em ka hrelo, mahse ka bula ding pa hian ka ngaihtuahna a luah khat vek.

"I lung a leng nghal em ?" a tih chuan ka lu ka thing nawk nawk a. In lam panin min kuah phei nghal a, hrechhuak thut in ka ding a, min en let nghal haw.

"Haw ve ta che!" Ka tih chuan chal ti nuar nang hian min en a, "Ka la cham ve dawn lawm" a ti a. A cham ve dawn maw? A la cham ve dawn anih chu !! Nichin khan tui thianghlim in tur te kha ati ve zawt zawt sia. Bakah eng nge rawn tih a tum ve re re, Sawmi ber a haw tawh bawk si.

"I haw ve dawn lo maw ?! Chhungte in nei ve mi ?" Ka tih chuan a lu a bu nghat nghat a.

Min rawn kuah leh pah chuan, "I pi leh pu hi ka pi leh pu anni ve mai lawm" a ti thawr mai a.

"I mawl ami!!" Ka lo ti vak.

"Lo lut thuai tu" ka pi chuan a rawn ti a. Min kuah phei nawk nawk.

"Pu in inhria mi ?" U Hmingmuana kawh pah chuan ka ti a.

"Kha ti khan, i thianpa ania kan hria chu ani mai lawm" a ti a. "Ka thianpa maw?" Ka lo ti sep sep ringawt.

"Naktuk lamah damdawiin chu in kal mai dawn nia" ka pu in a rawn tih chuan "Min kalpui dawn emaw ka tia" ka lo ti hliai.

"Muanpuia khan a kalpui zawk dawn che nih hmel" a tih chuan U Hmingmuana chu ka en a, ka pu lam hawiin naupang fel deuh ang hian a lu a lo bu deuh nghat nghat.

"Muanpuia ani reng reng lo, U Hmingmuana lawm" ka tih chuan, "Awwww Muanpuia pawh a tih theih tho lawm. Naupang tih takah hian i buaina hi ho thei lutuk" ka pi chuan a rawn ti a.

Naupang maw!! Kei hi ka a deuh tak tak in ka hria. Nge vawiin hi ka mawl hrim hrim pawh ka hrelo.

U Hmingmuana chu ka pu te in ah chuan a lo thleng ve tak tak a, a fiamthu emaw ka tih kha a lo fiamthu lo nasa. Ka pi leh pu lah chuan an la ngainat hmel em em zui.

"Hruaii dawr ah kan kal lawk dawn mi ?" U Hmingmuana chuan din deuh uaih pah chuan ati a.

"Nakin ah kal mai ang, in leng te ka la neih ve hi" ka tih chuan inti bengvar zetin Rinsangi chuan, "Va kal ru, Mpa te mai mai inleng satliah annih hi" alo ti a. 'Eh' pawh ka tih hma in min kai chhuak zui nghal dawr dawr.

"Lei teuh ang aw, chaw i ei tlem si zanah i ril tam hunah i ei teuh dawn nia" ala ti phur surh zui a. Ngaitha lo zeta ka en chu a hrethiam nge ni a tum zui hman vei leh nghal.

"Tinge i cham ve ?" Ka tih chuan "ka lung a leng a" tih zawngin min chhang a.

"Anih hma chu i la tawh em ?" Ka ti leh a.

"La tan dawn, min pui dawn em?" A tih chuan ka nui tawi tak a, arsi pe deuh un chu ka thlir zui vawng vawng.

"I lung a leng ami ?" A rawn ti a, nui hak in, "Leng nang, mahse ka ngai dawn che e" ka ti a.

"I bula awm ber min ngai a"

"Nia, nakin ah chuan nupui inei daih anga, i induh tawh dawn si. Ka tan chuan i pawimawh ve tawh em a, i nupui neih hun tur hi ka nghahhleh pui rual che in ka huhphurh" ka ti sap a. Sawi zawm leh in "A hma chuan ka suangtuah ve fo thin a, ka nula chho anga, min hmangaih deuh tu tawngin ka pa hnenah min neih adil anga. Ka pa chuan a fanu neih chhun dil tu chuan eng chaihin nge a fanu chu a hmangaih tih fiah alo tum ngei anga...." Ka nui hak a.

"Mahse tunah chuan kha thil vang khan ka pa lak atangin ka hrang a, eng suangtuahna mah ka nei ngam ta lo...... I hria em? Hlutna neilo hmeichhia chu tu in nge duh ang, khawlaia ui tei mai mai nen kan danglam vak lo sin" tihpah chuan ka nui ro leh hak a. Ka mittui chu ka khap per sak.

Ka biang vel chu nuai tawk in, "a hnual zawngin engmah ka ngaihtuah lo ania, ka ngaihtuah na a lang zawk kha ka rawn sawi zawk mai mai nih kha" ka ti vat a.

Ka dar a min rawn kuah pah chuan, "Anih chuan kan pahnih tana ka suangtuahna hi i min tawm pui zel mai dawn em ni ?" Min kuahna hmer deuh salh pah chuan a ti a.

Chhan ngaihna hrelo chuan ka en ngawi reng a, amah zawk chu rawn tawng hmasa leh in, "Keipawn ka suangtuah thin, mitthla chung che hian thil tam tak ka ngaihtuah thin a, nang leh kan fate.... Hah..... Ni e, ka suangtuahna ah chuan ka chhungpuinu ini thin a, kan fate enkawl in i buai ve mep mep thin. Mahse ka hmuh a piang che hian chutiang kan hnaih loh zia min hriat tir a, a chhan chu naupang rawn thang lian ve ek ek chauh kha i nia" a nui ro hak a. Sawi zawm leh in, "Min hlau em, naupang hmuh a hmu reng chung che hian ka lo ngaihtuah veng veng zel che a. A chang chuan dikloh na ka nei emaw ka inti hial asin. Mahse i lo lian telh telh a, hmuh hmaih theih hlek lo in i duhawm in i rawn thang tha bawk si. Pawn lam hian nawr hla viau thin che mahse chhung lam hian a pan dauh dauh mai bawk si che a" a sawi chhung zawng chuan ka en kar a, a sawi tawp lam ah phei kha chuan beidawnna a ri tel in ka hria.

Engtia han chhan let chi nge ka hrelo, min duh thu a sawina nge ka laka a beidawn thu a sawina?

Ka fate! Ni e kan fate!!

Min mitthla chungin suangtuah a nei a, kan fate buaipui in ka buai ve mep mep thin anih chu!

Ka nui ro hak a, thawh kan pah chuan, "Lut ang, a tlai tawh si" ka ti sep ringawt a. Amah pawh nghak lo chuan ka luhsan a, mu turin pindan ka pan hmak.

Ka pi leh pu inkar ah chuan ka va inthawlh lut a, ka pu la muhil lo chuan a ban chu ka kham turin a rawn dah a, ka lo kham vat.

U Hmingmuana thusawi ngaihtuah let neuh neuh pah chuan ka pu chu ka ko a, a rawn 'umm' thum dut.

"Pasal neilo in in bula hian ka awm reng mai nga ?" Ka tih chuan anui tawi tak a.

"Pasal nei dawn hnai ang hrim in" a rawn ti a.

"Anih pu min hmangaih em ?"

"Hmangaih teh reng mai, i pi te, i pa te, i nu te, i pute a leh i thiante kan vaiin kan hmangaih che a. Mahse bawihte, chhungte hmangaihna leh kawppui te hmangaihna hi thil hran daih ani aw" a rawn ti dut dut a.

"Kawppui te hmangaihna chu ka duh ve lo" ka tih chuan ka sama chul hliau hliau in, "Kawppui te hmangaihna hi khawvel a kan hmangaihna dawn thuk ber ani a, nu leh pa chuan kan Kawppui tur kan hmuh hma in hmangaih leh duat takin min enkawl thin a, kan hmuh hunah thlamuang takin an kut ah min hlan mai thin. Mahse khami avang khan min hmangaih ta lo tihna ani lova, kan khawvel ve tur atan min thlah zalen ang ani a. Pathian in chunglam atanga min thlir reng thin ang hian min thlir ve reng thin. Kawppui te hmangaihna duhlo te itih ngawt, i pi nen pawh hian pi leh pu kan ni thut hleinem, kan nu leh pa ten thlamuang taka min thlah zalen hnuah kan inhmangaihna in khawvel kan din dun a, a rah chu hei, ka bulah i mut biang tai hlur hi" a rawn ti a.

"Hummm" ka lo ti ngawt.

"Le muhil rawh, naktuk ah in entir te in ngai si a" a tih chuan thuawih zetin ka chhing nghal a, ka mut erawh a chhuak lo ngang mai.

U Hmingmuana thusawi chu ka beng ah a ti nawn tluk tluk a, ngaihtuah zui tur bik awm hauh lo in a thusawi engkim khan ngaihtuahna a ti peng kawi nuaih a.

Ka naupan lai atang tawhin min lo enzui tawh a, a nih chuan a ngaihzawn ruk em em neih ngei a tum bawk kha ka ni em ?!

Ka ngaihtuah chian poh leh mak ka ti a, midang ka hriat miah lo kha ka lo thik ve em em a, keimah ka lo ni reng si! A tak nge lem pawh hriat loh vang chuan ka nui vur vur a, mahse ka ngaihtuahna peng lehlam avang chuan ka nui tawp riai riai. Ni e, engvang in nge ka hlim vak, a thusawi dan ah khan a beidawng tih a hriat ngawih ngawih a. Hetiang ka nih vang hian ani pawh a hnual in a beidawng tihna ania, ka tet lai atang tawh a min lo chik tu pawn hetiang ka nih hnu ah min beidawn san chuan....

Ka ngaihtuahna chuan keimah leh keimah ka intihrilhhai zo a, hah zetin ka thaw deuh kawk.

"Bawihte, i mu theilo ami ?" Ka pi ani.

"Aw, pi mutna damdawi kha ala awm em ?" Tiin ka zawt zui a. A awmna a sawi ah chuan ka va en a, mum hnih chiah alo awm tawh.

A thawh loh hlau zetin a pahnih chuan ka hmawm hmak a, ka mutna ngaiah ka mu thla leh nghal.

___________________

Ka pa in maicham hma ah min kai phei a, inneih, mo kawr var thianghlim zet ha in ka nui var var  bawk a.

Tu emaw kut a min hlan hnuah thutna lamah a kal leh a, ka kut vuantu chuan mitmeng leh hmel nung sarh hian min en a, ka nuih let ve var var.

Thawk leh khatah biakin chhung chu a reh duk a, ka hawi kual nghal ruai.

Ka kut chelhtu chu ka en leh a, a hma zawnga hlim hmel em em khan thuruk tam zet pai hmel leh lungngaih hmel zet hian min lo en vawng vawng tawh.

Hrilhhai zeta ka en lai chuan ka sam hnunglam atangin min pawt dak awr a, "Zawngi, ka nupui inih hi! Ka fa pai chungin mipa dang um i tum vel amaw!" ti a inhrosa kuk kuk thawm karah naute tap rawih rawih thawm a rawn awm a.

Hma lamah min paih dawrh a, ka dul puar kawh luah chu dawhkan zumah tak ka zuk toh a, na tiin ka kun nghal tlawk tlawk.

"I chhuak leh tawh lo ang" tihpahin kawnghren chuan min rawn vuak a tum a. In dan tum a ka kut ka phar chiah chuan ka meng deuh kawk mai.

Ka chung seiling var vek chu ka melh deuh ruai a, ka thi ta emaw tiin thil dang hmuh tum chun ka hawi ruai.

"I tha em?" Ka sir lama rawn ti thum dut ri avang chuan ka sir lam ka hawi vat a.

U Hmingmuana chuan rilru nat hmel zet hian min lo en.

Tawng mai ka tum a, ka tawng thei awzawng lo. Ka kâ leh ka hnar thleng a khuhtu thil chuan min ti buai nak a, kei chu khawnge ka awm?

"Hahdam rih rawh" tihpahin ka kut a vawn lai chu a fawp vang vang a. Ka lo en kar ringawt.

"Bawihte" tihpahin ka pu chu ka sir lemlamah a rawn thu a. Tukverh a khaw eng atang chuan khua avar tawh tih ka chiang viau.

"Hlau suh aw, damdawi in ah i awm a" a rawn ti dam thluam a. Doctor lo kal in min rawn en nghal bawk, Doctor chu U Hmingmuana nen an inzui chhuak nulh.

Darkar tam fe hnuah min rawn chiu a, hriau ka hlau si nen min chiu dawn lai chuan mangang zetin ka hawi kual ruai ringawt a, awmzia erawh a awm lo. Min chiu hnu reilo te ah ka muhil ani lehnghal mai.

Ka bul a phun ri deuh mur mur avang chuan ka harh a, ka harh chu hria niawm in U Hmingmuana chuan min rawn pan leh vat a. Tinge ka men apiang a ka mi hmuh hmasak ber anih ziah ni.

Min thut tir a, ka pi leh pu leh Rinsangi te an tawng bawrh bawrh a, a khat tawkin ka pu chuan min rawn be leh zeuh zel a, U Hmingmuana erawh in min thutchilh ran.

"I mu leh duh tawh em ?" A tih chuan ka chhang lem lo na, min mut that tir a. Ka kut bawk chu a vuan leh ran.

"Ka damlo ami ?" Ka ti tham deuh chhal a, zawhna mawlmang tak ani. Ka awmna hmun atang hian ka damlo tih a chiang viau a, mahse heta ka awm theih dan ka hrelo a, ka hriat chin ah chuan damtha tak ka ni miau a.

"Damlo lo e, i taksa a chau deuh mai ani" a rawn ti ve sup a.

"Mahse oxygen...."

"I thawk tlem a buai deuh bawk a, mahse i tha vek tawh. Hlauh tur engmah a awm lo nia" tihpahin ka sam a rawn chul a.

"Mahse i that hmel loh" ka tih leh sap chuan a nui hak a, "ka hlim lutuk zawk anih hi" a ti sap a, awmzia erawh ka hre lo hle thung.

Damdawiin khumah ka mu mek ani a, chuta hlim viau nachhan tur kha ka hre ve miau lo ani.

Damdawiin a ka awm dan chu hriat mai tumin ka han ngaihtuah a, hriat mai chu sawiloh nizan mutna damdawi ka ei zawh a ka mut bak kha ka hriat zawm ka nei hauh lo.

Kei hi!! Ka damdawi ei vang kha ani ngem? Ka mut theih loh hlau lutuk khan mum hnih kha ka dawlh ringawt ani a, nachhawkna chuan na a chhawk thei tih leh mutna damdawi chuan min mutthilh tir thei tih chiah hria hi damdawi in awm ngai khawp khawp in ka awm a, ka zawi vek te chuan min ti lunghnur vek mai.

"I dam veleh i pa te hnenah palai ka tir ang" ka sir lam atanga a rawn tih dut chuan ka melh kawk a.

"Ka sawi tawh kha, ka nei dawn che. Ka suangtuahna ang chiah khan kan inchhung ah ro i rel anga, kan fate buaipui in i buai mep mep dawn" a rik danah chuan a hlim hmel viau na, mahse a hmel ah sawn hlimna ka hmu tel ve lo.

Ka mittui chu a rawn luang thla ringawt a, ka bula thu pa hmel chu inthiamlohna in a inthlak nghal.

"Tinge, na i nei em ni ?" A rawn ti chul a.

"Inneih ka duh lo!" Ka ti deuh sap.

💦💦