KA DUH BER CH-4

 

|| KA DUH BER CH-4 ||

Nizanah ka pa in hostela awm mai turin min ti deuh a, mahse ka hnial ve tang tang. In lama tha taka zir theih hmun danga pawisa senga zir a thiam tum kher kha a tulna ka hre ve miau lo ani.

Ka pa sum lakluh dan ka hria a, tunkum buh kan thar that vak loh bakah kuhva huan lah lei min in kuhva kung ala ve hlek bawk si a. A hek zawng kher a thiam tum kha a tul lem lo.

Khua a vawt vin tuk tawh a, school chawlh pawh a hnai viau tawh . Christmas kan hnaih telh telh a, boruak rawn thleng tur erawh ka huhphurh tulh tulh thung. Awmzia pawh ka hrelo, tun kum kan Christmas thleng tur hi eng emaw ni tak hian min ti tuilo vek a, kum danga phur ber ber ka nih thin nen. U zawk te'n a 'christmas chu naupan lai hian anuam ber, kan upa telh telh a a nawmna a bo telh telh' an tih ang hi ka ni ve dawn tan ta mai emaw ni te ka tia.

Darthlalang ah ka in en ka in en a, ka hmai thu lutuk chu ka tuai tuai a. Ka pa chuan alo ning deuh nge ni, "hmelchhia i va han inti awm em em ?" A rawn ti a.

"Ti e, i hmel ka en ngat phei hi chuan chhia ka inti ngawih ngawih" ngaihtuah hman lek lo in ka kâ chuan a sawi chhuak nghal vek a. Ka sawi hmaih chu ka pa nen hian kan inchhun fuh lutuk a, kalna hmunah hian ka pa fa ka ni tih hi a chiang bik ngawih ngawih a, mahse kan awm dun hi chuan in chhun viau e tilo chuan ka hmel hi a hrang leh ang hlak lawi sia, inchhun pafa mak tak kan ni.

"I hmelchhe hleinem, i nuih vak vak hian i hmelchhia a. I'n nui vak vak a, kei te chu ka nuih seih hi maw" tihpah chuan a'n nui seih a. Ka pa huat dan deuh chuan ka'n dak vak a, a vankarak zawng chuan ka'n nui chiam a.

Ka nu chuan, "i pa hi chu nuih lamah hian Pi Mawii nen khian unau an nia. A nui hawk hawk hmuh tur sawi loh a nui seih hmu tur pawh hian en ngawr ngawr angai. Kan naupan deuh lai, an ni an tlangval ve deuh tawh si lai hian thiante fiamthu thawhna ah hian kan han awm ho a, kan nuih dur dur laiin 'hehe' a tia a duhtawk ve em em zel" a rawn ti a. Ka pa hmel ka en leh chuan a hmel tak run alo pu leh tawh.

Ka nau a rawn tlan lut puat a, "apa artui...." A sawi zo hmanlo a inchhuih thlu tawp.

"A khai aw, lo kal teh" a tap tur chu ka pa chuan alo pawm vat a. Sawmi'n min rawn au thawm ka hriat chuan ka bag chu la in ka chhuak zui daih.

"Enteh.." a thaw deuh hlawp hlawp a, kal ngai chuan ka kal mawp mawp.

"Enteh !"

"Aww...." Tihpah chuan ka inher a, Zonuntluanga chal chang lutuk nen kan intauh ri nghal chawrh.

"In hau chhunzawm lo ang" tihpahin ka chal chu arawn tuai vut a, min pel fua in a kal nghal nal nal.

"Engmaw en tur !?" Sawmi en raw raw pah chuan ka ti a.

"An sawi kha, U Hmingmuana'n nupui anei dawn an ti" a rawn ti a. Ka rilru a awm hmasa ber chu 'ka tan tangkaina a nei em tih ani'.

"Ngawi reng khan kal rawh, mahni tana tangkailo an buaipui buaipui ngailo" ka ti hmuk a. Ka in rin hmain ka sawi nge ka aw pek dan a dang tlat.

"Aih, a mak iti ve lo mi? Tunge a neih tur awm ang ni ang le ?" A tih chuan chhang zui loin ka kal mawp mawp a. Ka ngaithla thui chak lem lo.

Nilengin ka awm a nuamlo ti ila a sual lo viau ang. Eng emaw ti tak hian ka hnim deuh ruih a. A chang leh ka lo muthlu leh lek lek zel.

Zan lamah chuan lehkha zir peihlo in ka pa te tv en chu ka en pui mai mai a. Ka pa ngheng deuh ti tih a, ka thu meng deuh suar suar chu U Mapuia leh U Hmingmuana a rual deuhthaw an rawn luh vang chuan ka thu mar awt a.

Ka pa chu eng hria ni maw ding deuh hluai hian, "Ee Chhani a tlai chhiat tak tak hma hian i Pu Chama damlo kha ka zuk kan lawk nge" tiin kawngkhar lam chu a pan a. U Mapuia te pahnih chu hmu chiah ni awm hian, "E in lo leng ani maw, kha tikhan lo leng ula damlo ka zuk kan lawk nge" tiin a chhuak zui vut a.

U Hmingmuana leh U Mapuia chu an inthurual lemlo tih hriat zetin an inmelh deuh hrek a, an palian dun sia an ni deuh khup mai.

Kan thu deuh chawrh chawrh a, a khat tawkin U Hmingmuana'n ka thingpui hang pek chu a in ri leh hrawk thin a. An pahnih chuan atira ka melh bak melh khat pawh ka melh eih lo.

A rawn leng a te berkher hi ka melh duhtawh hauh lo leh melh ngam tawh eihlo anni a. Melh ngam ve ve pawh ni se ka melh hi ka inring chuang lo.

Ka nu chuan ka nau chu a mut luh pui a. Ka sir a thu te panhnih lah hi haw mai an tum loh hmel em em zui. Ka pa hi rawn haw vat se la, kawm se mutsan daih ania ka duh ni.

Kan thut leh deuh chawrh chawrh hnu chuan U Hmingmuana chu zung turin a tho chhuak ta a. U Mapuia lah chuan remchanga lak tum ve niawm fahran hian a che deuh hrut a, ka thutna bul arawn thleng der. Tawlh sawn deuh dawrh pahin ka melh raw raw a. Hetiang khawpa ka duh lo zia ka tilang chung pawh hian a la rawn leng ngam cheu ani a, kan hmuh tirh a Sawmi'n "a va mawl ee" a tih vawng vawng kha ka rilru chiah ani ve tawh.

Ka kut chu arawn la, pawh let tumin ka pawt vat a. A vuan pawh nilo in akut pahnih chuan alo hmer vak a, ner deuh sawk chuan ka en a. Nui vur vur hian, "ka tihpalh" ati sup a, min thlah erawh a tum  chuang reng reng lo.

"Hruaii ka bialnu ni tura ka sawmna che kha la ngai reng ania" a rawn ti sup a. Ngei zet in ka melh thung. A mawl anih loh chuan a â tal aniang tih chu ka ngaihtuahna ah awm ngawt ngawt a. Ka haw hluah hluah hi ani ber.

Ka kut chu pawh let tumin tan ka la a, ka kut pawh nawk nawk pah chuan, "i bialnu nih ka duh awzawng lo" ka ti chang bawl a. Hawihawm tak a biak a tulna ka hre tawh lo.

A hmel chu a rawn inthlak hlawk a, a lama min pawt hnai deuh hrawkin, "Thingtlang nula, hah nula ti a chhiar tham pawh ila nia mi! Min duhlo eng ang mah la kei khawpui tlangval hausa leh thiamna sang tak nei hi i chhungte hian min hnar i ring em ?!" A rawn ti deuh hrawk a.

Ngei tawh sa nen a tawng duh dan kher kher chu ka ngei zawng tak alo ni zel bawk a ka thinrim chuan a kut ah chuan ka seh sak a. A kut a pawh let dawrh rual chuan ka ding nghal at a.

"Thingtlang mi i hmusit,  nula ti pawh a la chhiar tham lo in a hnar vang che buai tawk lek inih kha. Eng ang khawpui thuahhnih fa pawh ni rawh, ka nu leh pa hian nanga sum leh thiamna san vang mai khan an fanu hi min hralh dawn hlek lo. I kalna apiangah hei hi hre rawh thingtlang tleirawl duhloh inih kha!" Ring vak silo hriat hmaih chi ni miah silo hian ka ti fak fak a. Vawikhat tawng a na taka ka tawngkhum lo anih chuan a chet duhdan atang hian min zuam zel dawn tih a hriat a. A dawngtu rilru tur hi ka ngaihtuah lo mahse ka nu leh pa thingtlang mi an nih avanga khawpui zawk mi te uar leh intih hmuh mek sumdawnna leh pawisa duh vanga an fate nupui pasal anneih tir duhna rilru an pu ve tura a ngaihna avang pawh khan na taka tawngkhum aphu ka ti hrim hrim.

A rin ang ka ni vak lo nge sawi mai tur ahrelo zawk chu a ding deuh chawih a, chutah min melh khui khui pah hian, "Nang...!" Tihpah chuan min ben atum ta mai a.

"A tawk...!" Tih deuh hrawk ri chuan ka meng deuh kawk a.

Zak kau meuh a min tin  anih vangin thle sawk turin ka lo inring nghal tawp a, ka ban chuan ka hmai zawn vel chu ka lo dang ve a, mahse U Hmingmuana chuan U Mapuia melh   vak pah chuan a kut chu alo paih sak deuh sawk a.

"Engthil nge ni ?" A ti chang deuh rut.

"Engmah nilo, haw rawh u" ka ti ringawt a, a  showl bah tihtlak chu ka chhar pah nghal bawk a. U Mapuia ani emaw U Hmingmuana ani emaw tu amah hi hnaih ka duhlo.

U Mapuia chu eng sawi lo in a chhuak zui a, U Hmingmuana chu ala ding deuh run.

Thut that leh pah chuan, "Haw ta che" ka ti leh tawp a.

"Hruaii engtin nge a tih che ?" A rawn ti dut a, ka melh hrep. Kan inhnial na zawng zawng hrelo tur khawpa zung turin zun dahthatna a pumpui ah hian a awm bik hrep lo ang.

"Engtin mah min ti lo. Haw rawh ka tih kha, tinge i rawn len? Nupui nei tur nula in a len len thilmawi pawh a ni lo, rawn leng tawh suh" ka ti chhuak chiam a.

Min en vung vungin a thaw chhuak deuh hawk a, "Anih muttui aw" tihpah chuan a ding vut a. Ka chhanna nghak niawm fahran hian a ding leh vung vung a en pawh en lemlo chuan, "muttui" ka ti hmuk a. Rum deuh nghutin a kal zui a, a chhuak tur hnunglam chu ka en ve hram.

Christmas thlen nan kar khat chiahin min dang ta. School pawh naktuk atang kan chawl dawn a, U Mapuia leh U Hmingmuana chu an reh zui hmak ka ti dawn nge keimah hian ka hmu zuilo hrim hrim pawh ka hrelo, khami zan atang khan ka hmu zui lo ve ve a.

Vawikhat chu ka pa in U Mapuia nena kan  chungchang min zawt ta ringawt mai a, ka nu chu awmlo se ka pa lakah ka hmingchhe hle ang.

U Mapuia chuan ka pa hnenah kan inkawp ang leh keiman hma ka la hmasa ang ten min lo sawi a. U Mapuia ka ngei laklawh nen a chang phei chuan Zonuntluanga nena an lo in chhun avang hian Zonuntluanga zawk hi ka chum leh awk zel a, pakhat lah hiatan min ti let lemlo hian a dawh ve tawp zel bawk nen, ka hriatchhuah thinrim apiangin inhrikthlak nan ka hmang ani ber e.

Sawmi chu hnunglam hawiin arawn thaw hluai a, Zonuntluanga nena kan lo inbakaih lai chu, "Ka ning insual hi in hna mi ?" A rawn ti vak a. Thaw hluam hluam in Sawmi chu kan en nghal hra.

"Ka rilru hah" a rawn ti leh hluai a.

A tawp nana Zonuntluanga keh buk leh lawp pah chuan, "Eng nge ?" Ka'n ti hliai a. Field lam atangin ka hming pum ngeiin chiang fahran min rawn ko a, kan thian li chuan tukverha kan dak thla nghal thap.

"VANLALHRUAII!" Min au tu pa chuan arawn ti leh lauh lauh a.

"Tunge, a va mawl ve ?" Zorini chuan thlek vung vung pah chuan a ti a.

Kan Science teacher chu a zuk kal thla a, min au tupa nen chuan school building lamah an rawn kal a. Ka mihring ngei ber mai ka hmu leh ta.

"U Mapuia anih khu!" Zonuntluanga'n a rawn tih chuan Zorini leh Sawmi chuan min rawn en nghal hra a.

"Hruaii Office ah rawn phei teh"  kan Maths teacher sual zet chuan min en hraw pah chuan a rawn ti a. Zonuntluanga chu ka en nghal vat.

Office lam pan chuan Zonuntluanga chuan min kuah phei a, "Zonuntluang, in chhungte anni tak em ?" Ka tih chuan a lu abu nghut nghut a.

"Anih chuan tinge a mawl bik em em a ?!" Beidawng zet chuan ka ti a. Zonuntluanga pawh a thaw ve hawk ringawt. Sawmi leh Zorini'n engmah an hrelo a, Zonuntluanga erawh in engkim a hre vek thung.  Tunah hi chuan ka thin pawh a rim tawh lo, ka rilru hi ana tawh zawk.

Principal office a kan luh chuan U Mapuia chuan min lo nuih vur vur a, Zonuntluanga hnungah chuan ka tawlh deuh hrut hrut.

Principal chuan midang chu a chhuah tir vek a, Zonuntluanga chuan ka awm ve dawn a tih tlat avangin kan pali chuan kan awm thap a.

Principal chuan, "Mapui engvanga khulaia Hruaii hming lam a bengchheng chiam nge inih ?" A ti ro hulh a. U Mapuia chuan nui vur vur hian, "Amah hi zawt la" arawn ti ta mai. Principal chuan min rawn en vut,  Ka tihngaihna hrelo lutuk chu ka hawi kual ruai a, kun deuh lapin, "Ka.. ka tihpalh" ka ti sap ringawt a. Ka mittui rawn parawl tiam tiam chu a far mai dawn ten ka hria.

Hetiang em em a hamhaih leh chet buai ka neih hi ka hre ngailo a, hetianga mahni insawifiah theilo tur khawpa ka awm hi ka inring ngailo.

"Tihpalh pate, Hruaii hi ka ngai tawh lutuk a" a rawn tih leh phei chuan ka insut ri deuh hraih a.

"Hruaite" tihpaha U Mapuia'n min rawn khawih a tum chuan insut leh hraih in Zonuntluanga hnungah bawk chuan ka inphen leh a min rawn ban leh chuan Zonuntluanga'n aban chu alo vai per lawp a.

"A tawk!! Ka sawi tawh kha.  Awm ngaihna awmlo khawpin i zar buai anih hi!" Zonuntluanga chu a au in a au a ni ber.

U Mapuia chuan nui vur vur tho si chuan, "Keipawn ka sawi kha, amah pawh kha zawt la exam zawhah hian inneih kan tum asin" a rawn ti a. A sawi zawh rual chuan ka hma ami chu a che hrut a, U Mapuia chu a kat nghal nawk.

Zonuntluanga'n U Mapuia a hnek leh chuan ka te that a, U Mapuia chuan eng sawi set set loin a khawih let ve nghal a.

An ri nghal buan buan a, an in len hleih ropui si, insul lo tur chuan ka au deuh lawm lawm a. Awmzia erawh ava awmlo chiang tak.

Tap tuau chung a, "Tawp rawh u!" Ka tih leh vak chuan an intlah ve ta hram a. Principal chuan, "Hruaii class ah kal rawh!" A ri nghut a. Class lam panin ka tlan nghal nal nal.

Ka lehkhabu vel chu khung tha mawlh mawlh a, Zorini leh Sawmi chuan "Tinge ?" anlo ti ve chul a, chhan pawh ka chhang hlawm lo. Ka bag chu lain ka tlan chhuak nal nal a.

School tlang atanga kawngpui pangngai ka thlen hma deuh chuan ka ding vang vang a, ka hnung mai atang a, "Hruaii" an rawn tih chuan phut nasat lutuk vangin ka kat dawrh a.

U Mapuia chuan min lo nuih vur vur a, ka tihngaihna hrelo lutuk chuan a hma ah chuan ka thingthi chhunzawm nghal a, "U Mapui khawngaih takin min tibuai tawh suh" ka ti ta tuau a. Chek tlak tlak hian min kaitho a.

Ka mittui te chu tuai faiin, "Tinge i tah? Ka bialnu hmeltha te hi a tah ka phal hleinem" hmel ner nung nung paha a tih chuan hlauna ka nei a.

Inthing deuh nawkin ka tawlh hla hrut a, chu chu duhlo niawm fahran hian ka dar tawn tawn a rawn vuan in min rawn fawp ta nawk nawk mai.

Ka dar na zeta a hmer na chuan ka chhungril thleng hian a fan theiin ka hria, a mi fawhna duhlo lutuk chuan ka euh deuh awrh awrh a. Tha kan in ngah hleih chu sawiloh, kan pumrua en pawn a ka hneh lo tur tih chiang reng in a thapui thawh meuha min han beih chuan a lakah chuan vaihmite ang lek bak ka nilo.

A awm ah chuan nghet zetin min kuahbet nghal a, ka tan han tan leh han tal ngaihna reng a awm lo.

"Ngun deuhin ngaithla rawh, tun atang chuan nang leh kei hi inkawp kan ni. Bialnu leh Bialpa kan ni tihna nih chu!" A rawn ti chang bawl a.

"Min hnial chak viau mah la vanduaithlak takin min hnial anih vaih chuan in chawbel ber, i pa huan leh zawng zawng saw ka laksak vek thei che tih hria la ka thusawi hi awih la. I tan atha ani mai" amah bawk chuan arawn ti leh a.

Ka la tal dehh aih aih chu a ai chiang chuan a awmah min kuah bet leh a.

"I awihlo ani tiraw? Saw ram saw i pa ta ani reng reng hleinem. I nu ram kha ania, mahse i nu chu a thi tawh a, i pa in nupui dang anei bawk a. Engkim hi dan anga ka rawn phawrh chhuak vek anih chuan i pa sawn kut a dawh mai ang" tihpah chuan ka samah chuan a rawn fawp a. I hmusit na nge a awmzia ka hrelo.

Eng chiah nge anih he mihring hi?! Ka nu boral tawh leh ka pa ram thleng thleng a a rawn sawichhuah tak hi.

A thusawi hi a tak nge a lem ka hrelo, mahse kei hmeichhia, hmeichhia a zawng a mi rin awlsam leh hma hun thlir lutuk thin mi, naupang rilru la peih fel lo hian hlauthawnna ka nei lian nghal hle a. Min nawr hla deuhin min en a, ka hlauthawng hmel chu a lo hmuthiam nge ni. Ka sam chu ka bengah a zep tha a.

"Ka bialnu hmeltha te hlauthawng mah ta che. Ka thusawi ang apianga i awm anih chuan engkim atha vek mai ang" a rawn ti a.  A hmeltha ka tih theih tehlul nen a hmel te chuan ka awm ati nuamlo ngawih ngawih tawh. Kan in melh deuh ngur lai chuan a bek chu arawn ri nghal chawk a, a tlu thal nghal tawp.

Zonuntluanga chuan thut in a hnek zui nghal bawrh bawrh a. U Mapuia chuan arawn hnek let a, a vawikhat hnekah pawh Zonuntluanga chu a thal nghal der.

U Mapuia chu a rawn ding chhuak a. Zonuntluanga'n khawih leh a tum chuan tap chunga kuahin khawih tawh lo tur chuan ka ti a.

U Mapuia hian duh ni ngat se chuan Zonuntluanga tleirawl rawn nula pawh la rim phalo hi a khum bet in a siam thei ang. Mahse a nau anih ve vang nge chutiang pui pui chuan a che lo a, Zonuntluanga zawk hi a hnehloh tur cho in a buai abuai zawk lehnghal.

U Mapuia chuan rum deuh nghut in, "Kha nau kha hrilh rawh" tihpahin a chil a chhak phurh a, a kal nui nul nul.

Zonuntluanga chu tap pur chungin ka en a, "mawla engvanga insual ngawt nge inih a? I û anih kha" ka ti nghal chiam a.

"Engtin nge a tih che ?" A rawn ti daih.

"Engtin mah min tilo. Vawikhat mah insual tawh suh ang che" ka ti leh a.

"VANLALHRUAI!! Zawhna ka zawt che?" A rawn ti thawt a.

"Min vin suh, inngaizawng te tih thin danin kan awm ani mai" ka tih chuan, "Maw?!" A rawn ti sup a.

"Vawikhatmah insual tawh suh" ka tih chuan, " 'Inngaizawng' Vanlalhruai ka duhlo tiin i rak i rak ani lawm ni ?" A rawn ti a. Amah ka vawnna chu a thingthla nghal hmak bawk.

"Haw ang" tihpah chuan ading vut a. Pawr pheng phung chuan kan inzui haw ta hna hna.

U Mapuia chu zantin a rawn leng a, ka lo be chhe lo a, ka lo lawm hek lo. Ka pa'n engmah min zawt lo chu mak ka ti a. A chhan chu min zawh hmasak khan ka phat nasat tunah lem a rawn leng zantin ani a. Nge ka nu hian a lo sawi leh vek tawh zawk pawh ka hrelo.

_________________________

"Mahruaite" a rawn tih chuan tui bottle chu ka pe a, U Puii leh U Siami chuan, "Mapui kan nula-i chuan engtin nge maw alo dawihat bik che ni. Keinin neih tum che a that tawp kan chhuah laiin ani ve a nui seih a, ilo tawlhthlu fel der hman bawk si" an rawn ti a. U Mapuia chu a nui huah huah a. Kei erawh in ka thil tih lai ka tih chhunzawm leh hmiah hmiah.

"Mahse i lung a leng dawn mange, Hruaiteii'n khaw dangah mas a hman san daih dawn che sia" U Siami'n a tih leh rual chuan U Hmingmuana arawn lut hlawl a. Ka melh zawk bak ka en leh tawh lo.

"Pi Hriati a awm em ?" A rawn ti nghut a, U Puii'n an in lama a awm thu a sawi chuan chhuak tur chuan a inher leh nghal mai a.

"Hmingmuan engtik nge mo hruai hun tur chu ?" U Siami chuan arawn ti a. Ka chhanna nghakin ka beng ka lo dawh ve nghal vat.

"Kumthar lamah aniang" a ti mai a. A sawi zawh rual deuhthaw in U Mapuia chuan, "lungleng dawn nang, api leh pu lakah mark ka han score dawn mawle" a rawn ti ve hluai a. Mak tiin ka en reng, ka pi te hnena Christmas hman ka tum thu hi vawikhat mah ka la hrilh lo a, hrilh chu sawiloh a hmundangah Christmas ka hmang dawn tih pawh ka la sawi thawi eih lo.

Zan a rawn len chuan a sawi chhuak ta chiah a, "Tinge engmah min hrilh loh?" A tih chuan, "Hriat ve kher a ngai hleinem" ka tih chuan a thinrim em em mai lehnghal.

"I bialpa ka ni a, i tello hetah hian eng nge ka lo tih ve ang ?" Ati ta bul bul mai.

"Ka awm tih i hriat hma in nilawm ni irawn kal, ka chunga thu neih hi tum viau suh. Tihluihna hmanga i bialnu mai mai ka nih hi" ka tih chuan a hma ai mah chuan ka ti thinrim in ka hria.

"VANLALHRUAI!!"  tihpah chuan min ben a tum ta mai a.

____________________

A changtupa a lang leh hman ta lo 🥺