KA DUH BER CH-3

 

||KA DUH BER CH-3 ||

A rawn thleng phei ve te te a, "Eng nge ?" a rawn ti chhum hmuk a.

"Khawnge i len a ?" a ban a kaikuah pah chuan ka ti zang vah a. Min en run run hian, "ka leng" ati leh hmuk a a duhtawk der.

"La haw suh rawn leng tlang mai rawh" ka ti leh tawl a, ka rilru sir thei ang ber ah kan sir mi chu dah ve reng chungin leh mit sir reng chung chuan ka ti a. Ka tawng chu uluk zetin min rawn en tih ka hria a, mahse ka awmdan a ka hnar na chu hrethiam se ka ti ngawih ngawih a. Mi a ani lo bawk a, a hrethiam turah ka dah tawp a.

Aw a rawn thian karh a, "Helai thleng hi nimai rawh se" arawn ti a. A lam hawi pah chuan ka bu nghat nghat a, han biak zui duhna kha ka nei tlat tawh lo.

"Anih mangtha u", tihpah chuan Zonuntluanga arawn melh deuh hrek a. A kal zui ve mai a.

"Khawmaw mi kai reng suh" tihpahin Zonuntluanga chuan ka ban chu a thing thla a.

"Amak ee, a vawh tawh em hi. Kei lo kuah tu tur che pawh ineih loh kha awm mai mai rawh" tihpah chuan ka kuah kal nawk nawk a.

"Eng nge inlo tih ?" A ti leh deuh hmuk a.

"Aww kha i hmuh reng kha, ka thlah." Ka ti ve nghut.

"Chuan !?"

"Chuan eng nge ? Ka hmu che a ka lo ko che nih kha" melh deuh khui pah chuan ka ti a. Ka dar ah chuan a ban chu arawn kham phei zuak a, ka melh rawm rawm chu "i va han hmeltha tak em! Zep lo ah chuan kan khaw nula hmeltha hi chu ini ve chiang lawm" tihpah chuan min melh kual vel a. Eng hria ni maw kan pahnih te a kan awmloh hi chuan a mize uang zet hi a chhuah duh ngai eih lo a, kan awm dun erawh in zahpuiawm khawpin a tawngthei in mi chhaih a paih lehnghal

"Tikhan mi melh khui khui suh, min melh vak hi chuan chhiat ka tawk dawn tlatin ka hria" a rawn ti leh phei chuan melh rum tak hi ka ni.

Awm hla deuh hrut in a khap fuk fuk a, a kut rawn phar chhuak da da hian, "hawh i mit kha hup daih ila" arawn ti a. Ngei tho si lai tho si chuan ka en a.

"Tun ah alo nui ang, Tung Tu Rung Tung Dris!" arawn ti a. Ka nui ve nghal hak.

"Tih nuih i har  lo e" tihpah chuan min rawn kuah leh a.

"Hmela" tihpah chuan ka nui hawk hawk a, kal pah chuan kan in sik phei leh nawk nawk bawk a.

________________________

"Hruaii !" Chiang fek fawk mai hian U Mapuia chuan min rawn ko a.

"Eng nge ?" Ka lo ti chhum hmuk.

"Khawnge i kal a ?" Ka bula rawn kal pah chuan ati dam leh diai ang lawi a. Zonuntluanga'n ka hnunglam atangin min rawn kuah nghal thak a. Khawi kawi atangin nge maw arawn per chhuah ni a bal berh  hrep lehnghal a. Ka lo melh nghek ringawt.

"Tahsawn Zonuntluanga nen kan kal lawk a" ka tihzawm hmiah a. Dawt sawiah ka inngai miah lo, kal bo vat se tih chiah ka rilru ah awm.

Amah hi keimah ah hian a thawk hlawl lo ti ila ka sawisual pawh ka ring lo. Amah hi ka hlau ti ila ka sawisual pawh ka ring lo. Mi hian an duhlo deuh in anduh deuh tlat a, an hel kual an hel kual hian an ning leh an lo ngei tlat pawh hi ka dem tawh lo. U Mapuia hi chutiang em em chuan min tibuai lo mahse ka hnarna pawh hrethiam lo niawm taka a awm a awm hian amah min ngei tir a. A chang leh Pi Hriati dawrah U Siami leh U Puii bul ah eng eng emaw lo sawiin thil  eng eng emaw ka tan alo dah a. Amah hi a huihphai deuh ti dawn ila a rawn len thin lai kha chuan  a pangngai bawk sia. Duh vang ni miah silo hian ka ngaihtuahna chanve hi chu alo luah veleh zel tho bawk sia.

"Anih chu, keipawh hna ka bang chiah a. Haw rual hlawm i la" hmel hmuh nuam zet hian a rawn ti a.

"Aih aih aih...." Ka ti nghal nawk nawk a, ka sir ami chuan ka dar a arawn hmer deuh salh chuan ka tawp chut a.

"Kalna tur kan la nei a" amah chuan ati fiah fak a.

U Mapuia pawh chu bu nghat nghatin a kal veleh mai a.

"Dawt sawi miah lo in..." Tihpahin ka sir ami chuan min rawn melh chhuk run a.

"Tinge dawt i sawi ?" Arawn ti leh a. Min kuahna chu thing thla nawkin ka phar hliai a, "I thusawi hi a awmzia lo thei e" ka ti vak.

"Khawnge i kal ?" A ti leh hmuk a.

"Chhe hmek hmuk pa, ka duh duh na ah ka kal ang. Rilru hah nak lai a" tihpah chuan ka kal hlawk hlawk a.

"U Mapuia khan engtin nge a tih che ?" Tihpah chuan min rawn um a.

"I hmu velo mi engtin mah min tih loh kha" ka ti let hlar a.

"Tinge maw tunlai hi i pawr theih em em le ?" a tih chuan ka ding thut a.

"Tluanga, U Mapuia hnenah khan khawngaih takin min tibuai tawhlo turin ti teh" ka ti thlawt a. Ka sawi zawng chuan ka tap dawn ten ka inhria.

"Tinge! Engtin nge a tihbuai che a ?" Min melh run pah chuan ati a.

"Ihmaw ka sawi thiamlo! Mahse sawi la ka duh lo ani tawp" ka ti leh tawp a.

"I chhe per pur, mi'n an ngaizawng ve che a" tihpah chuan min rawn kuah a.

"Ka chhe per pur pawh anilo. Hmana ka koh zan che khan ka bialnu ni rawh ati ringawt a, ka duh thlawt lo" Ka ti deuh pur a.

"Aw aw aw, tap lo la. Ka pua ang che i duh em ?" Tihpah chuan a thu hniam nghal a. A hnunga lawn kai pah chuan, "Hmela Sawmi leh Zorini hrilh ve suh ang che" ka ti a.

"Ka duat che e, i ti ve em ?" hnunglam rawn thlek deuh pah chuan ati a. Ka ke then leuh leuh in, "Imm...... Ka pa leh nangmah chiah hi mipa ah chuan hnaih cheu ka duh. Hna ineih hunah inneih daih ila ?" Ka tih zawm a.

"Mawl suh, bialnu ka nei" arawn ti nghal vat.

"Ka fiam che nih kha" tihpah chuan a nghawnga kuah nghet sauh pahin a darah ka khabe chu ka nghat a. A bialnu chungchang hrechak viau mah ila ka zawt chak rih thlawt lo. Keimah hi a mood ah ka cheng lo.

A ngaite bawkin school kan kal leh tauh tauh a, mimal taka inkawm hman pawh kan awm meuh lo. October thla tawp lam chauh ani a, Christmas chawlh te pawh la awm dawn mahse Hostel vela awm tur kan nih loh vangin kal theih chhunga subject cover hman vek chu kan tum niber in ka hria.

Vanneihthlak takin ka ti dawn nge, thawventhlak takin U Mapuia chu a reh hmak a. Zonuntluanga bula ka sawi chu fuh ka ti takzet. A hma khan lo sawi tawh zawk ila ka fi hlim hma ani mai awm sia.

"Bawihte, vawiin chu i nu leh i nau nen an hnah tlem lak tur awm hi rawn la ula keiin hlawhfa pakhat chhawrin hlo kah thenfai loh kha kan lo thian ang nga" chaw ei lai chuan ati chuar chuar a.

"A mak nge awm tha rawh" tihpahin ka nu chuan ka nau chu alo hauh mawlh mawlh bawk a.

"Umm..... Kan kal dawn nia" ka ti ve mai bawk a.

Hnathawh thawmhnaw leh iptepui ak a, silai pu va chunga rawn lut chu ka en haw a. Engmah chu ka sawi zui lem lo, a sa chang tur rawn tai lut anih ka ring.

Buh nei an awm ve deuh duah a, zu va lak ah a him vaklo ani mahna. Silai nen a inpu chhuak hmuh tur an awm leh nulh zel.

"Apa Hmingmuan khawnge i kal dawn ?" Huan kan thlen thleng a kan ruala a kal ve zel vang chuan ka zawt ta tawp a. A pawi ka sawi nge pawh ka hrelo min melh ngur ringawt a. Meng kual deuh zak zak in ka pa ka au a, a hma lamah ka lim thla nghal puat.

"Pa, Pa Hmingmuana khian eng nge arawn tih ve dawn ?" Ka pa chu ka be ru sar sar a, ka hnunglam ka hawi leh zawt a. Min melh kur tu vang chuan hma lam ka hawi lehnghal.

"I va â e aw, a lo inhlawh dawn. 'Pa' ma ta che, 'U' rawh" a ti zui a.

"Ka u rual ani mi a senior tawh si" ka tih chuan hnunglam tangin an rawn nui hak a, mi ngai bawk chuan a biangsum lang kalh khawpa mawia nuiin min lo en a, ka lo entui lutuk nge mau bung ah ka inchhuih bawkkhu nghal thup.

"Ava mak khut khut" tihpah in ka èm lum chu ka pa'n a um thla a, U Hmingmuana chuan min rawn kaitho a, a hnung atangin ka nu'n, "Keini zawng kan la nau deuh ani" a rawn ti a. U Hmingmuana chu ala nui suk suk zui a, ka va han zak tak.

"Khatia ding reng lo khan rawn chhuk ta cheu" ka pa chu a rawn au lauh a.

"Kal hmasa ula Manu, hnung ka rawn dawl ang" tihpah chuan ka nu te kalna tur chu a kian a. "Kal la" a rawn tih ve chuan che hrutin ka kal ve nghal puat. Ka kalna enlo lutuk bawk chuan ka'n in pal thlu leh dawn a ka hnung ami chuan min rawn man hman hlauh.

"Kal na en tawh la" a tih sup chuan ka bu nghat a. Ka kal veleh nghal mai.

Ka kalna chu uluk  ka en a, ka hnung ami nuih tur in ka awm leh ang tih chu ka hlau em ani.

"Lalhruai i period ami ?" Ka nu chuan arawn ti a. Ka kun kut kut lai chu ka ding a.

"Aih, tinge ?" Tihpah chuan keimah chu ka'n in enkual a. Ka mal dinglam ka mawng thlang chiah ah chuan thisen alo val deuh kalh.

"Vangvat ani ang a" ka nu'n a tih chuan ka te nghal chel chul a. Ka pa chu thlam atangin arawn dak chhuak in, "Eng nge ?" A rawn ti a.

"Hei vangvat a kai a nih hi" ka nu chuan alo ti a. Kei chuan tim ru deuhin hmun danga ka kai leh kai loh ka in enkual nghal vat.

"Han in en sak teh u, tuikhur ah ka va kal lawk nge" tihpahin ka pa chu a kal zui daih a.

"Thlamah han chho teh" atih chuan rilru nuamlo zetin ka nu chu ka melh a.

"Eng nge kha tia mi en, han insil la i pa vaihlo lekha kha han bel rawh" a ti a.

"Min chhoh pui rawh, U Hmingmuana awm si ka zak" ka tih chuan.

"Zah tur awm lo han kal rawh, val senior lutuk khian melh pawh a melh peih lo ang che" a ti a. Zum dak chuan thlam lamah chuan ka kal a.

U Hmingmuana chu tlak deng lam tukverh ah chuan a ke hlang thla in a lo hawi veuh veuh a. Be lem lo chuan ka che mawp mawp,  ban harsa tawk lekah min zuk bawk sia inbuaipui a har zek.  Ka pa vaihlo lehkha ka'n zawng ngial a, ka hmu miah lo. Kawngkhar atang chuan ka nu chu ka zu au a.

"I pa lo let hun lo nghak mai rawh" atih chuan chhang zui lo in ka ding tawp a. Vangvat min zuk na lah chu ala a thi duh em em zui.

Ka hmai zawn a vaihlo lehkha rawn lang va kengtu chu ka en a, "bel rawh" ti hmukin lehkha chu min pe a, ka ban ve mai bawk. A thutna ngaiah bawk a let leh.

Vaihlo lehkha rawn phawrhchhuah mai tur anei chi mak ka ti ang reng hle a. A ni ang chuan vaihlo chu sawiloh cigarette ah pawh a man to chi ngat a zuk ania ka rin. Mahse a lo nei hlauh a, ka tan chuan a tha leh hrim hrim.

Lehkha chu ka'n bel ve ngei zel a, mahse a tla zel mai si. Ka tan ban a har deuh bakah zuk melh tawk tawk angai a, ka nghawng ati na vek tawh.

Ka nu auh tum chuan ka ding mar awk a, mahse ka mala kut vawr thler a rawn khawihtu vang chuan a ai chiang zawk a mar chuan ka ding a.

Ka puan veng chu tlem hlim kang in vangvat min zukna laiah chuan ka eng emaw hi arawn bel a, "I nu auh a ngailo, tikhan a dam mai ang. Thak pawh a thak lo ang" a rawn ti zawm zat a. Ka hamhaih lutuk vang nge chhan pawh ka chhang lo. Ka ding khawng luah tawp mai ni. Kawngkhar lam a pan tih hriat zetin ka ding lam pang chu a ri nghal rep a.

Ka mit sir a kawngkhar lam ka en chuan a chhuak tawh tih ka hrethiam a. Ka hmui chu hupin midang hriat hlau zetin ka au nghek.

A zahthlak bawn bonus let tawp tawp. Ka zak, ka zak, ka zak! A bak sawi tur ka hrelo. Tlangval ani chu thuhran U Hmingmuana berkher, Zonuntluanga chu nise ala zia. Vawiin hi U Hmingmuana laka ka hmingchhiat ni anih dawn hi! Rapthlak zawk hian.

Thlam a ka lo thu ngawi reng chu ka pa chuan, "Khawiah nge a zuk che" a rawn ti thluam a. A bula a mi pa hre reng chung chuan, "Ka malpui ah" ka lo ti zawi sup.

Ka nu rawn lut ve chuan, "Vawiin i vangvat kai chu i va rak lo ve, a hlau vak tawh nange ?" a rawn ti lut a. Ka hlauh zia leh kan zinga awm ve pa kerkawr laka zan nawn zah nawn ka duhloh vanga  au lo mai mai ka nih zia a hrelo a tin ni.

"A vangvat ka hmu hleinem" ka ti hmuk.

Haw turin kan insiam a, ka pa khan 'a inhlawh dawn' kha ti tak na hlo an then reng reng ka hre lo.

"Kal ru le" ka pa chuan em min chawi pah chuan ati a. U Hmingmuana haw tum lo awm taka a la thu chu zuk en in, "Apa Hmingmuan i rawn haw ve dawn lo mi ?" Ka ti a. Ka pa chu alo nui hak.

"Aw, sa chan ka tum deuh a. Lo han haw ru" a ti ve mai a. Bu nghat chuan ka chhuak zui a.

"Lalhruai i va â mai mai tak, eng aiah nge i 'pa' deuh tlat a. Kei ai in kum hnih bakin upa lo. Pa tawh suh a lungawi lo nasa viau mai ang" ka nu chuan ati a.

"A hmel hi maw ka u rual ani theilo hrim hrim. Kum engzat nge inih reng reng" ka tih chuan min nuih in a kal nal nal. Hei hi ka nu ka ngei ve na...

Thil hi han sawi ila min chhang dawn lo maw tih hnuah te min chhang a, min chhang dawn emaw tih lah hian a nui vur vur zel. Min run zawnga awm kher hi nuam ati tlat ten ka hre thin.

_____________________

  [ Tih sei viau ka tum pawn ka mit hian a tlin hlawl lo. Tuikhur dung zawh chho in Tlangramah buh kan han la vang vang a, ni sa nen ruah sur nen, a sur a sa hnuaiah takzet hna ka thawk ve a. A hma a la ti ngailo na na chuan ka la na khawp mai a. Taksa a chau a, zan meirei pawh ka ti hleitheilo. Tawi hle mahse min lo chhiar sak leh ula. Buh lak ta kan zawh hunah chuan regu lo lutuk pawh a zia ang.