KA DUH BER CH-2

 || KA DUH BER CH-2 BY||

"A sa viau em ?" Zonuntluanga chuan rawn ti deuh sup in ka dul vel keu chu arual a. 

"Aih.... Tlem a sa" tihpahin ka lo tawlhhnung deuh hrat a. Diktak chuan asa lutuk hi tunah hian thih daih ka chak. Ka ke nen tuivawtah min hmim burh se azia maithei tiang chauh tur chuan asa ani. 

"Sir...." Tihpahin apa chu a en a. Ka la sawi tel leh lo bawk chu kan school principal hi Zonuntluanga pa ani. 

"Hruaii khawilaiah nge akan ?" arawn ti ve sap a.

"Aaaa, min kang lo. A kawr hi a huh deuha nimai" ka ti a. Muanawmi zawk azawh loh vang chuan nimaw Muanawmi lah chuan min la melh khui khui zui a. 

"Muanawm Miss Sangpui bulah khan va kal la i kuta hnawih tur damdawi kha iva dil dawn nia" ati a. Zonuntluanga lah chuan ngawi rengin min kaichhuak a, apa scooty chu rawn nawr pheiin, "Chuang rawh" arawn ti ringawt a. 

"Maw! Khawnge kan kal dawn ?" Ka ti vat a. Ka hnunglam tang erawh chuan, "Zonuntluanga nen khan zuk haw mai ru..... Sir Hruaii te damdawiin ah an kal dawn", Sawmi chuan ati deuh lawng lawng a. 

"Haw... Haw angailo. Min buak hnem ve vak lo" ka ti vat a. 

"I dul te kha asen vek kha!" Min melh deuh rawn rawn paha Zonuntluanga'n arawn tih vang chuan tim deuh dui chuan ka chuang a. 

Kan school hi tlanga awm nih vangin, awichhuk a tlan kan nia, ka tan deuh tung a alo hria nge ni rawn tawlh hnung deuhin arawn thle deuh bak a, "Min rawn kuah rawh" arawn tih chuan a ka kuah nghal vat a. A hnunglam atang chuan, "Kan in lamah kal rawh aw" ka va ti a, alo bu ve nghut. 

Kawng pangngai tlan hnu ah, "Invuan nghet rawh" arawn ti a, ka inrin hmain a tlan nghal fua a. Rak deuh thatih a kawngah ka kut ka suih nghet zual a, a hnungah ka hmai ka phum nghal kak. 

"Bawihte iva chuang tui awm ve ?" Ka pa in nuihza aw lek lek a arawn tih chuan kan in kan thleng tih ka hre ve chiah a. Ka hawichhuah chuan kan thenawmte insakna inhlawh lo ka hmu vat a, chirh min chil per tu pawh kha ka la hmu tel zui.

Ka pa lam chu ka hawi a, ka pa ka hmu tak vang nge ni scooty atang chuan ka chhuk a. 

"Pa ka kang!" Ka ti deuh tuau a. Ka pa nuihza hmel chu rawn inthlak in mangang hmel zet hian min en a, "Enga! Khawi laiah !?" tiin min rawn pan a. 

"Tuisâ in a intihbuak palh a, na lutuk chu anilo ang Pa Zual" Zonuntluanga chuan alo ti a. Ka pa chuan inchhungah min kuah lut a. 

"Alo haw leh tawh! Tinge !?" Ka nu in min hmuh chuan ahmel zawng zawng nen hian alo ti a. 

"Hei tuisâ a intihbuak ani awm e. Han en pui teh" ka pa chuan alo ti a. Ka nu chuan, "Engtin nge i intihbuak theih a ?" tia rooma min nawrh luh lai chuan Zorini leh Sawmi an rawn lut veleh hlawl a. Ngaihven hman lovin room ah chuan kan lut a. 

"Khawmaw i kawr kha hlim teh. Engtin nge i intihbuak theih re re a?" Tihpahin ka nu chuan drower chu ahai nghal rawk rawk a. 

"Eeeee..... Ava han sen nasa ter tuar ve! Engtin nge i intihbuak!?" Ka dul a en chuan ati deuh hlut a. 

"U Zual,,,,,,, Damdawi va en teh, a kang nasa lutuk alawm!" Ka nu chuan ka pa chu a au nghal vat a. 

"Eng damdawi nge ka lei ang ?" Ka pa in arawn tih chuan. "Ava hahthlak zuk kal la, kang damdawi izuk tia nga anlo pe mai dawn che lawm"

"Nangpawh tap per pur suh, tlem va inleih la ipa lo haw hunah damdawi kan hnawih dawn nia" ka puitui parawl deuh pung ahmuh chuan atih zawm deuh zat a. 

"Atap vel a! A zaklo ve a, school ah kha chuan ana lo kha ati vei zawt zawt a" Sawmi chuan arawn ti a. 

"Awii kal teu kal teu, in indaihzai lutuk. Eng nge inrawn tih ve ?" Ka nu chuan alo ti deuh hluk a. A hnungah Zorini'n Sawmi chu alo nuih veleh. 

"Kan lo haw" Sawmi lah chuan ati deuh hmuk mai lehnghal a.

"Bawihte kal tawh lo mai rawh aw. Kha i dul zawng zawng nen i ke nen, aaaaaaa Zonuna pa kan phone mai dawn nia" arawn ti hlut a. 

"Ni e, Apa Zual 'Hruaitei te thianho hi' ti le hrem Principal chuan 'aw aw aw' alo ti zawt zawt mai ang" Sawmi bawk chuan arawn ti leh a. 

"Aaaa Hruaitei chauh tihpawn aphal ang a" ka pa chuan ati a. Zorini bawk za zetin alo nui leh. Sawmi hi atawngduh ber sia, ka nu nen hian ti dawn tho mahse amah hnial hi nuam anti ve hrim hrim a. Pakhatnu lah hi atang nasa thei mai si. 

"Phal dawn lo nasa,,,,,,,, Zonuntluang nangchu lo han kal leh tawh rawh" ati deuh hmuk a. Zonuntluanga lah chuan alo melh rawm rawm. 

"Aaaa ka van ning tak. Apa Zual pawisa min lo pe dawrah ka va kal teh ang" ding deuh hluai chuan a'n ti leh thawr a. 

"Kha va kal rawh, eng nge in ei dawn ?" Tihpaha ka pa'n a wallet aphawrh chhuah chuan a'nlo phur khawp ah! 

"Ka hrelo, Zonuntluanga nen kan va kal tawp nga. Nangni chuan in ei ve duh dawn chuang lo a Spicy ei ang u" midang rawn ve deuh reuh, mahse thu pe deuh reuh hian ati a. Ka pa in pawisa apek chuan Zonuntluanga apawt chhuak nghal dawr dawr. 

"Zonuntluang in mikhual kha ava han thing tak" Sawmi bawk chuan arawn ti ringawt a.  Zonuntluanga chuan 'enga ?' tih melh hian amelh in ka hria. 

"Eee taka, Hruaii chirh chil per tu kha tiraw ?" Zorini chuan alo ti ve a. 

"Ni e, ka hre hrechhuak zawka  ka lo sawi mai mai. Mahse a mawl ka la ti tluan parh tho " Sawmi chuan ati leh hlawk hlawk a. 

"Eeee,,,, nichinah pawh khan min hmuh. Kan intawh dan hi zahthlak thei ee" Ka lo ti nang nang a. 

"Eng nge i zah? I duh ve deuh mi ?" Zorini chuan mitmeng pakhat zet hian arawn ti a. 

"Aww, duh emaw duhlo emaw chhelo deuh bula chet chukchu reng te chu zahthlak ve tho lawm" ka ti a. Ka sira thu Zonuntluanga chu atho thurh a kan en zui thap. 

"Leng ang u" keimahni min en chuanglo chuan alo ti hmuk a. 

"Ve leng ru, inah hian ka lo awm ang" an thil eina plate khawm pah chuan ka ti a. 

"E tak a! Ka paw mai ang che!" Zonuntluanga chuan arawn ti mauh mai a. 

"Puak ngai ka nia mi!? Ka kal thei reng lawm" ka ti deuh hu. 

"Rawn kal veloh itum a" min melh deuh khui pah chuan arawn ti a. Ka tih ngaihna hrelo lutuk chuan Zorini leh Sawmi chu ka'n melh ringawt a. 

"Zonuntluang mawla!...... A thawmhnaw hak theih hi chhuahpui chi anih loh hi" Sawmi chuan arawn ti hluk a. 

"Anih chuan hetah eng eng emaw ti mai ang u" tihpah chuan athu thla leh daih a.

"Aaa.... Bazarah kal ka ngai tho a min kalpui nghal ang chu ka lo ti rilru hman vek sin" Zorini chuan arawn ti a. 

"Va kal mai ru, Hruaii nen kan lo awm ang" ati bul leh mut a. Hmeichhe pathum chu kan inmelh hrek hrek a. Kan bula mipa awmchhun mize danglam ta lutuk hian min ti buai zo niber in ka hria. 

"Ve leng vek law law ula, engmah tih tur pawh kan nei chuanglo a ve leng rawh u" ka ti sawk sawk a. 

"Ka ning a! Hmelchhe si, len pawh min ti phur tawh hrep lo. Zochhekawi inla cool viau mahla ka starpa i tluk chuanglo,,,,,,,,, Zorin korean movie en tur ihre leh tawh lo maw ?" Tih zawm zat pahin an pahnih chuan choka atangin an inzui chhuak a. 

"Len pui ve mai tur che nia" ka tih chuan ngawi rengin min en ringawt a. Tihvak ngaihna pawh ka hrelo. 

En zui lemlo chuan ka thil sil tur chu ka khawm zung zung a. Sil hmuna dah pah chuan, "I zia zawi ve, i damlo mi ?" Ka tih chuan ka bul hnai lutuk atang "Aih" rawn ti mut ri chuan min phu chiam a. Chhanna eng emaw ber kha chu ka beisei ngei a, mahse khatiang em em ahnai ah khan anih ka rinloh vanga phu chiam ka ni. 

"Min ti hlau alawm" ka ti nghek a. 

"Awm sawn rawh, ka'n sil ang" chhan pawh chhan hman hma in sir lamah chuan min nawr sawn a. Tub chu herhhaw in a tleng nghal puat puat a. 

"U Mapuia chhelo ilo ti ve viau maw ?" Arawn tih chuan, "Maw !?" Ka lo ti vat a. A thusawi ka hriatloh vanga zawt nawn ka nilo a, a mi sawi ka hriat loh vang zawk ani. 

"Chhuanmawia nia chirh chil per tu che kha. 'Mapui' kan ti mai zel" arawn tih leh takah chuan ka hre ve leh zawk a. 

"Umm" ka ti ve leh ringawt. 

"Chuan...?"

"Eng !?"

"Chhelo iti maw ?"

"Aw aaa... Aih..... Ka hrelo" ka ti deuh nuai a. 

A nui ri deuh suk a, "Keichu a chhelo ka ti" tihpah chuan mitmeng chimawm zet hian min rawn en a, amah vek chuan "Bialpa i'nnei ve nga, 'Ka ngai lutuk che' i'n ti vel nga,,,,, awii ka lai" thlek kual vel pah chuan a'n ti leh a. Ka ngei lutuk chuan ahnungah ka'n chum tawk a, eu deuh awrh pah chuan a nui huah huah a. 

"I rilru chhungril tak chuan khatia chhaih tepawh kha nuam iti reng" arawn ti leh a. Ngei tawkin ka melh ringawt. 

Rinaiiin ka dul leh ke vel chu a dam har zek a, Karkhat ngawt school ka chawl a.  Pi Hriati dawrah ka kal deuh reng mai a.  Zonuntluanga arawn leng deuh reng bawk a, hun awl aneih apiang pawh nilo rawn leng tur hian hunawl a inpe ka ti mai.

Zan khat chu Umapuia nen an rawn leng a, Pi Hriati dawr bula hna anthawh thin avangin inbenel tawk lek chuan kan inhre ve tawh a. Ka awm lai tut tur pawh azia deuh viau mai. 

"Eee! I pa chua Mamawia maw kha(h) ? I nu leh pa an dam tha maw ?" Ka pa chuan ati deuh hluai a. An rawn luh tirh atang khan ka pa nen an la inbe char char a, Umapuia nu leh pa nen chuan an inhria ni ngei ang a nu leh pa chanchin a zawt deuh nual bawk a.Mahse pawi ka tilo zawk, ka inleng tiin ka chhiar ve deuh reuh a, inleng ka vawikhat neihna ani a. Zonuntluanga hi chu inleng a chhiar chi ani pawh ani law. Ka pa'n chutia alo bia chu a amah pawn nuam atih deuh zawk ka ring. 

"Nau kha ila neiin ka hria, a lian ve tawh em ?" Tih vel te an inzawt a. Zonuntluanga nen erawh an thusawi pawh bengkhawn lem lo chuan ka pa leh Umapuia inbe thum dut dut chu kan nuih pui vei suk suk a.

Zonuntluanga pui chuan, "Umapuia hi a fel asin. Tunah hian B.Arch a chhuak chiah a, hahdamna hun pawh awmlo in helamah arawn kal leh nghal a" arawn ti nuah nuah a. 

"Heta rawn kal vang chuan eng nge a hahdam theih loh ?" Ka lo ti deuh hu. 

"Aww...... A zirna zo a, hnathawk turin rawn chhuak nghal nih hi! Biakin te saw ama design anih saw. Pu Buanga in sakna ah pawh arawn tel arawn tel ve kha" arawn ti a. 

"A ho e, a fel na pawh ka hre teh hluak lo" ka lo ti mai a, sawi zui vak dan ahre tawh lo niang chek hlakin angawi daih.

A tuk zanah Umapuia chu amah chauhin arawn leng a. Keimah chauha ka lo awm chu ka chhungte awmna min rawn zawt nghal a. 

Ka pa achauh deuh vanga a mut hma thu leh ka nu chu naute awih paha ka pi te ina a len thu chu ka sawi ve mai a. 

Eng eng emaw sawi chuan kan titi ve luam a. A kum in a tlin tawh ka ti dawn nge thian kawm athiam ve hrim hrim pawh ka hrelo, thian kawm tak te hian min kawm a, chutia inngaihzawnna leh a mawilo zawnga han chet leh thusawi anei lo a, sawitur lah ninawm tur ni si lo in a hre thei viau a. Kei ang sawi tur hrelo len tawng bawrh bawrh thin mi lo tan pawh a bulah chuan tawngduh a awl viau mai. 

Chuta tang chuan arawn leng ta fo a, Zonuntluanga erawh Umapuia rawn len chinah arawn leng ve duh tawh miah lo a, School lamah pawh biak ahar talh a, Sawmi te hnena ka zawh lahin 'a bialnu in alo kawp a' anti mai zel a. Mak ka ti viau, kan inkawm nasat nen High school kan kal laia a ngaihzawn ve deuh deuh tih loh kha chu ngaihzawng aneih hi ka hre ngai lo a, bakah lo nei pawh ni se  hetiang lam hi ka la tawng ve eih loh vang nge han tih vak ngaihna hi ka'n hrelo khawp a, mahse tlai a arawn tai luh nawlh nawlh hian ka theihtawp in ka lo hnem ve thin. 

September thla tawp lamah lo zawh kan nei a, ka ni te chhung leh kan makpa leh monu te chhung nen kan ni nei nuai a, Zorini leh Sawmi te chhungin an rawn tel bawk a Zonuntluanga pawh Umapuia leh anau nen an rawn tel ve a. Kan kim bawk a, kan ri le lu mai ni. 

Kan neih hma a Sawmi leh Zorini te phur uih lutuk chu kan inah te an rawn riak vel a.

Kan khua hi a lian ve ang reng ka tih tawh kha. A cheng te pawh kan changkang chho a, lo nei pawh kan awm zeuh zeuh tawh zawk ang vel ani a. Keini thianho ah pawh hian keini chhung chiah hian lo kan nei a. Mahse  kan thlai thar ve te erawh hralh lem lo in ka pa hian a thar tem zo zel a. A thar tirh atanga a awm tawh loh thlengin a thar tem zo thak zel. 

October thla kan chuangkai a boruak chu anuam tawh viau mai. Lehkha zir lamah ka rilru ka pe thar a, thiam theilo zawk zawk chu ka nilo na in board exam ani ve tawh dawn si a, ka tang viau mai. 

Kan school bang hi thim dawn ah te kan haw thin a, ban hun pangngai hnuah hian kan science teacher hian extra class min kalpui thin a, kan zirtirtu ro ro ah pawh ani hi chu atang fal bik a tumlawk loh deuh hian kan tlai viau zel. 

Tlai dar 4 a pelh deuh thuak chuan kan tho sung sung a, zik mar pah in kan han eu kual vel a.

"A chang hi chuan ka ning" Sawmi chuan arawn ti hmuk a. 

Zorini pawh chuan, "Keipawh, kum hi thar vat vat se exam vat ila, thlamuang deuh a mut ka chak. Mut hun leh thawh hun tur bi thliah deuh thlap thlap hi ka kham ngawih ngawih" arawn ti zawm ve a.

"In tang uih lutuk anih chu, zan mu theilo khawp ten mi in lo zir bik a ?" Ka ti a. 

"Ka hrelo, mahse thinthi hian ka mu theilo. Lehkha zir tur hlir hi ka rilru ah rawn awm a. Ka mumangah te thleng thleng hian ka hmu thin" Zorini'n meng phawk vak pahin arawn ti a. Kan nui nghal ham ham. 

"Pass chang chang chuan tawk mai lawm" ka ti ve tak na  ka rilru chuan pass chang chang chu atumlo nasa. Ka thian te tih zia deuh nan a ka sawi mai mai ani. 

Kan kal deuh hnak hnak lai chuan kan hnunglam atang hian U Hmingmuana'n amah nghak tur chuan min rawn au a, kan lo nghak ve mai bawk a. 

"Ehe in bang chiah a? In va tlai ve ?! a rawn ti nghal bawrh bawrh a. Sawmi te chuan an lo chhang a, kan kal zawm veleh mai bawk a. 

Zan ah Umapuia arawn lang hlawl a, kan inhmuh khat zia ka hre chhuak chiah. 

"Kha i buai loh lai ka rawn nang fuh ve ta ni maw ?" nui deuh pah hian arawn ti a. 

"Aww lo leng rawh, i va induh ve ?" Ka lo ti deuh luam a. 

"Induh ami.... Nang alawm ka rawn len in min tawm bosan daih zel a" ati a. Ka chhan dan tur hrelo chuan ka nuih tawp. Ani ve reng bawk a, a rawn len ve pawh hian lehkha ka lo zir san daih zel a, ala rawn leng rawn leng peih zawk tepawh ka ti deuh reuh. 

Zan dang ang bawkin sawitur a thawh deuh reng a, a bula awm pawh nuam in ka tawng duh barh barh viau. 

Dar kua velah Sawmi leh Zorini an rawn lut hlawl eng eng emaw an rawn khai lut tel teuh. 

Sawmi'n Umapuia ahmuh chuan athil khai chu ahnung lamah a thukru a pawr fe hian, "Chhuanmawilopa min dil ve mahla ka pe dawn lo che" a ti nghal phawr phawr a. Ava han vanduaithlak thei! 

Umapuia lah chu nuih pahin a hawi ang vung vung ringawt a. 

"A mawl thei nia aw.... A ti mai mai nih kha Umapui ilo awm ve dawn tih kan hre lo a, kan rawn keng tlem deuh a kha va lei mai ru in pahnih khan" Zorini chuan arawn ti zat a. 

"Aaa tih ho tur innei em ni ?" A tih chuan Sawmi bawk chuan, "Nei nei nei, haw rawh tlangval pui si haw hun hre ta che! Thlasik lai phei chuan zan arei hma a" arawn ti leh hlawih hlawih a Zorini'n a nak a asih na lah chu pawr fe in, "Ana enge mi sih vak a ?" Ala ti pawr huam zui a. A phungzawl ta emaw ni ?!

"Ava kal per per ve" tihpain Umapuia chu a nui sun sun a. A huat hmel loh em em mai lehnghal. 

"Nia, a tlai tawh ang reng sia ka haw mai ang. Hruaite pawn thleng min thlah la" ati a. A tir a ka chhan mai loh vang chuan, "Hruait" arawn ti leh a. 

"Ee aw engmaw.... ?" Ka ti buh nuai a. 

"Min lo thlah la" arawn tih leh chuan la leng ve rih turin ka sawm na Sawmi kha a tawng ve em a, awmzia a awm lem lo. Sawmi chu ka melh nghek ringawt a. 

Kawngpui thleng chu ka thlah a, a kal mai dawn maw ka tih lai chuan a ding deuh vung vung a. 

"I kal dawn lo mi ?" Ka tih chuan arawn lehhawi thut a. Naupang fel zet ang hian ka hma ah a kut hma suih in arawn ding tat a. Ka lo en phawk hra. 

"Hruaite" tih deuh sup pahin min rawn en a. Chhang lemlo chuan ka lo en kiau. 

"Sawi la" a ngawih leh tak vung vung avang chuan ka lo ti deuh sup a.

"Inkawp ang! Oh ka tih inngaizawng ang! Nilo... I duh leh duhloh pawh ka zawt hmasa lo che, ka bialnu ni rawh!" A kut hma suih a min en chung reng chung chuan arawn ti nawk nawk a. Ka khap fek fek ringawt. 

Ka ngawih tak reng vang nge ka kut chu rawn la in a hum deuh vang vang a, "Ka  ngawihzawng nih chu i duhlo em ni ?" A rawn ti a.  Eng nge ka sawi ang tih ka ngaihtuah lai tak chuan Zonuntluanga phone bih chunga a kawng kal hi ka hmu fuh a, ka kut chu pawt let nghalin ka au vak a. Min rawn hmuh chuan min rawn pan phei vang vang.

_______________________