KA DUH BER CH-1

||KA DUH BER CH-1 ||

           Awle ti veleh thawr mai ila 😂 *Perfect Stranger* kha ka'n ti ve na mahse a kalhmang ka thlak nuaih a *Ka duh ber* tiin ka thlak leh ta zawk a, a pawilo turah ngai ang. Chapter 1 up veleh thawr a, sei pawh a sei vaklo. A ngaihnawm dawn leh dawnloh te kha comment lamah lo sawi leh ula maw....

            Chuan thu hman diklo te kha comment lamah sawi pawp pawp tur aw. 

________________________________

"Awiii ka hne ee he kawng hi, khawchhiat loh pawn a diak kawi tehreng nen khawchhiat phei hi chuan chirhah kan cheng hi ani ringawt zel" Sawmi chuan ati hlawih hlawih a. 

"Phun phun lo khan kal mai mai teh. Saw ta saw bike alo tlan ania, a rawn thlen hmain kal vat vat rawh" tihpahin kan khaw kawng chhe zet ah chuan hmanhmawh tawkin kan kal a. 

Kawng ringawt ka en lai chuan ka ke velah chuan chirh chu arawn per chhuai a.

Min chil pertu pawh chu a ding ve nghal. Sawmi pek chuan, "i va â ve, mi kal lai te chuan lo tlan lo ve ta che" alo ti nek a. 

"Ka tihpalh lutuk" arawn ti sap a. A inthiamloh ve hmel lutuk ti ila ka rindan, a chhan chu helmet a khum tlat avangin ahmel ka hmu theilo a,  mahse hetia en hian a palian a, a aw chhuah dan nen phei chuan val senoir rorum zet hmel tûr zet nen  ahmel landan tur chu ka hmehbel tawp a, a aw chhuah dan hmek hmuk nen phei kha chuan a inthiamloh hmel tehchiam lo. 

"Aww, aho lutuk. Kalna kan lo en lo anih kha" ka ti tha mai a. A tlan liam ve nghal mai bawk. 

"A mawl e, amawl danah khan khawpui mikhual hawihai lo deuh ani dawn sa" Sawmi chuan min thlek kual du du pah chuan ati bui bui a.

"Khawpui a awm apiang an fing in an smart vek kher hleinem...... Ka pawnfen hi a bal tel anih hi" tih pahin ka pawnfen hmawr chu ka pawt chho a. 

"Ti kha chuan kal pawh i kal thei tawp nang, i bal vek anih kha" 

"Nia, ka kallo mai ang. Nangmah in vawiin chu kal mai rawh, school i thlen veleh letter min ziah la min lo pek sak mai dawn nia, anu hming sign dan kha chu ihriat tawh em kha"  ka ti nghal mawlh mawlh a. 

"Ka van peihlo tak, i kalloh chuan school hi anuam lo vek zel. Khapa kha ka van ngei e aww" tih pahin a tlan liamna lam chu a thlir leh vung vung a. 

"I ho kal mai mai teh, inhlawhna hun ka nei zawk tihna nimai" ka tih leh chuan hmel pe chhe tawk hian, "anih sawlai thleng saw min lo thlah rawh" ati hram a. Kan inzui phei hnak hnak. 

"Tinge i rawn haw leh a ?" Ka nu chuan alo ti nghut a. 

"Sawlai kawn ah khan bike in chirh min chil per a, ka bal vek alawm" ka tih chuan, "Aw kha, i kal duhlo ta ro ro buh kha thlei fai rawh" ati leh nghut a. A chhuak zui daih. 

Engmah pawh sawi zui bik lovin ka inthlak a, buh te chu ka thlei a. Ka thlei zawh ah ka form pawnfen te chu su leh in thlengsil loh ho te chu ka sil leh a, ka nau zun cheh puan te ka nuai leh nawk nawk hnu ah kawng kham thumin ka ding chhuak a. Tukverh vel kalh fel sawk sawk in kawngkharpui ka do a, Pi Hriati te dawr lamah ka liam nghal. 

"Tluangpui Khawnge i kal dawn a ?" Ka nu thingpui dawra lo thu chuan arawn ti a. 

"Pi Hriati te dawrah" ka ti ringawt. 

"Chhuak chhuak mai, han rei suh ang che. Haw ila i sulhnu chhui ngai hlir ani leh nga" ati zui tawn tawn a. Chhang lem lo chuan ka kal veleh mai bawk a. 

"Api Hriat inbuai em ?" Ka ti lut a. 

"School i kal emaw ka tia" alo daih a. 

Tawng tuma ka kâ ka àn veleh chuan chirh min chil per tupa niawm tak kha dawr ah arawn lut hlawl a. A hmel chu hrelo mah ila a thawmhnaw hak ah hian ka la hre thei. 

"Ka pi ka lo tibuai lawk che u" arawn ti a. 

"Aw eng nge nita ?" Pi Hriati chuan alo ti vat bawk a. 

"Pu Nghaka te in hi khawilai velah nge a awm le, min hrilh theih em?" A rawn ti bul bul a. A âw chu a thum ka tih tawh kha, kei aia nau deuh phei chuan an hlauh hial ania ka rin ni. 

"Aww, khu kan dawr rawn thlen hma chiah in hnihna khu" 

"E aw, ka lawm lutuk e" ti a chhuah tuma a inher chuan min lo ve chiah nge ni, a ding deuh chut a. Laih hmel takin a tukhum a hiat nauh nauh a achhuak zui mai a. A hmel chu nichin maia a landan tur ka lo hisap ve nen khan a in ang lo hle mai lehnghal a. 

"Ava hmeltha ve tiraw Hruaii" Pi Hriati chuan arawn ti a. 

"A tha pawh ka ti vak lo e a" ka ti a. Dik tak chuan atha ka ti ve reng, mahse upa deuh te hnena tiang sawi hi chu awmho ni khuaah mi chhaih an ching si a, zah ai chuan ngawih theih kha ka duh zawk. 

"I lerh lo lutuk hi i pà deuh emaw te hi ka tia. Lokal teh helam ah hian, naktuk ah bungraw rawn thleng tur atama henglai hi siksawi kual angai" tih pahin thawmhnaw akhai tlar diat lam hnungah chuan kan inzui phei a. Vawiin lamah an sem chhuak tih hriat reng reng in alo thawl deuh hawk tawh. 

"Api Hriat mikhual chhelo tawk mai Pu Nghaka te'n an nei sin" Thil kan rem mawlh mawlh lai chuan Usiami chuan arawn ti a. Upuii'n lo zawm ve zatin, "A hmelthat dan chu ah! Bialnu anei ngem le ?" Arawn ti leh nghal tawng a. 

"In va han za hawr hawr tak, nang ni kara nui bal thei deuh deuh kha a duhlo ang cheu" Pi Hriati chuan fiamthu tih hriat reng reng hian arawn ti a. An pahniha nui khek uar uar chung chuan Upuii chuan, "Hmm, kan nuih dan vanga min duhlo tu chu kan hnawl nghal. Tiraw Siami ?" Arawn ti a. A nui leh nghal uar uar. An nun han nawm dan tur bik em em hi, Engto nei hmachhawp nei lemlo in tihian an han nui uar uar thei mai bik hi chu an awhawm thlawt. 

_________________________

"Teh u, kan vengah hian mikhual an awm mi a" Zorini chuan note lak lai chawl meuh chuan arawn ti a. 

"Ka hre bik lo, an awm mi Hruaii ?" Sawmi chuan min rawn zawt veleh. 

"Awm aniang. A ho e, mi mikhual neih lo sawi vak vak. Vawiin ah in test em ?" Ka ti daih. 

"Aih, i lo kallo a sir in test lo mai ang u ati tawp lawm" Sawmi chuan ati tha mai a. 

"Ka nuih aza, kan vawkpui ang deuh deuh te pathum saw an za leh ang chu aw. Mikhual an lawm si" Zorini chuan nuih then thaw pah chuan arawn ti a. 

Sawmi pawh chuan nuih ve vak pah hian, "I sawi a ka hrechhuak chiah. A chhiatloh phei chuan mikhual pa te chu a khawngaihthlak ee" a rawn ti ve a. Keipawh an thusawi chu ka nuih pui ve tho. 

Kan khua hi thingtlang khaw lian ve pangngai ani a, ka hmuh ve dan mai mai chuan district hming kan put loh vanga thingtlang tih kan la ni ve mai mai in ka hria. Mahse khawpui emaw thingtlang ani emaw mi chanchin sawi leh in hmusit hi chu engkhua pawh hian a keng tel ti ila ka sawisual pawh ka ring lo. Zorini'n 'kan vawkpui ang deuh pathum' atih te kha kan venga ah chuan mi pangngai chunglam daih kan veng pa hausa fate anni a, an unau thum hian mikhual hi an han lawm em em khawp ah! Kan veng hi sawithiam dan chuan rual kan pawl ka ti mai. Kawng engkim ah hian, athen changkang tak an awm a, athen la hmanlai ve em em te, mi ngei khawpa mi rel leh sawi peihte bakah min a inti fel antih tur khawpa tlawmngai leh khawtlanga inhmang te, Hna hniam ber atanga tha sang pangngai tha thawk thlengin kan awm a. Rual kan pawlin kan kim ka ti mai. 

"Hruaii, puan pho i seng em ?" Ka nu chuan arawn ti lawng lawng a. 

"Aihh, ka la kai zo tep" ka lo ti let ve bawk a. 

"Khawi ah nge i pho ka lo seng ang" Sawmi chuan arawn ti a. "Pal thlang lamah khuan" ka tih chuan achhuak vut a. A rawn lut leh chuan, "Vanlalhruai, inau hian zun ala cheh law? A len tawh nen. A sazu kha thui pin sak rawh u" a rawn ti leh tawn tawn a.

"I ti rapawm lutuk thinchhe hleihlawi nu" Zorini chuan alo ti a. 

"Eng nge ania lawm. Ka nau te chuan kum a tlin hma in a cheh tawh lo" a ti hmuk a. 

"I nau nise a cheh reng nang, i nau anih loh vang lawm a cheh " Zorini'n alo ti ve leh. 

"Ani ka tih kher loh kha" Sawmi'n a ti veleh a. An inhau leh ringawt dawn.

"Ninawm, hmelchhe ho ngawi reng khan awm rawh u" ka ti vak a. Zawi te te in an la inhnial hram. 

"Teh vawiinah maw, Zonuntluanga inla cool rap" Sawmi chuan arawn ti a. 

Ka note lak kai mawlh mawlh pah chuan, "Chuan engtin ?" Ka lo ti a. 

"Chuan engtin nge ni nga ?" Amah zawk chuan arawn ti let daih. Ka thil ziah lai chu chawlin ka en a, "i mawl thin ami" ka ti nghek. 

"Amak ka ti kei chu" Zorini chuan arawn ti hluai a, Sawmi chuan, "Asawi mak leh ang chu aw !" run tawk lek hian alo ti a. Zorini chuan ahnar a tum deuh dat. 

"Tinge, note siam kher lo pawn i own word thei tho sia" Sawmi chuan ka note lak rawn bih du du pah chuan ati a, "Ka hawrawp hi tihmawi ka duh lawm, hawrawp te pawh hian mark apu ve thin sia" Ka ti mai a. Zorini chuan kan thusawi nena inperhsan zet hian, "Sawmi amak iti ve lo mi ?" A rawn ti a. Sawmi lah hmek hmuk chuan, "Amak eee,,, i sawi mak ber chu ka hria mi?" Alo ti a. 

"Aw ka sawi te chu Zonuntluanga hi mawle. Ka ngaihtuah ka ngaihtuah hian Hruaii hi a duh chiang" arawn ti a. 

"I hre har ka ti" Sawmi chuan alo ti a. Zorini chuan nam buklawp pah hian, "Engpawh hi sawi ila, i hriat loh pawh hi 'ka hria lawm', 'i hre har ka ti' lo ti hman vek zel. Nakinah chuan thil awmlo ka la sawipui che nga, i hre leh tho ang" ati vak a.

"Eng nge tun ami hi chu ka hrechiang ve em asin! Mahse Hruaii hian aduh lo a, bakah Hmingmuana hi Zonuntluanga hian ahlau ve deuh a" Sawmi chuan ati liam puat a. 

"Tinge Hmingmuana chu a hlauh a ?" Zorini chuan ati a. 

"Aww, i thluak hi hmang ve thin la.  Hruaii hi luck asin! Kan veng pa hausa fapa neihchhun a duatsual piangthar da leh thin sawn Hruaii hi ngaizawng lawm" arawn ti duah a. 

Ka nu chuan kan tawng chu alo hria nimaw rawm hui huah huah chung hian, "Zorini chu an va ti khawngaihthlak che ve, engmah pawh anhrilh ve na che nge? Hmingmuana pui sawm inthiannu kha rawn ngaizawng nasa lawm" arawn ti a. Ka nu meuhin chutia arawn tih ve vang chuan ka lo ip chawih chawih thei. 

"Chutiang engmah pawh ka hre ve lo, mahse keichu Zonuntluanga hi ka duhpui zawk tho tho. Tette atangin kan inkawm ho a, kan inhrechiang hlawm a, amah pawn i mizia engkim hresa vekin a duh che nia" Zorini chuan arawn ti bui bui a. 

"Chutiang ngawt anilo, hmangaihna hi maw a awmloh chuan induhna hi atawk lo. Chutia tih ah te chuan keini pawn tette atangin kan kawm a, a mizia zawng zawng hrechiang in kan hmangaih em hi!....." Sawmi'n asawi lai mek mek chuan Zorini chu akut phar vakin arawn au a, "Malsawmsang i â thin mi!? Enge hmeichhia leh mipa ilo tehkhin ?" Meng phawk hra hian arawn ti a. 

"Aww, mipa leh hmeichhia lam anilo. Hmangaihna anih chu ka sawi! Eng ang pawn lo inhre rei mahse inhriat rei ringawtna kha apawimawh lo, a pawimawh ber chu hmangaihna. Chutah pawh amah hmangaihtu mai ala nilo, mi hian kan hmangaih te aiin min hmangaih tu anhlu an ti ziah a, ani awzawng lo. Min hmangaih mahse kan hmangaih ve miauloh chuan a hlim theihloh, kan hmangaihte pawh min hmangaih ve miau loh chuan ahlim theih chuang loh. A awmzia ah chuan mipahnih inhmangaih te kha anpawimawh tihna nih chu maw! Hrethiam em!?" Akut zaizir meuhin a sawi a, a tang hle niang. A tan hle hi chuan a practical thlap hian a ti thin a. 

"Ngawi mai mai teh u, pawl 12 inzir ve dek dek a 'hmangaihna, hmangaihna' te intih. Lehkha kha zir hle hle ru" ka tih chuan Zorini chu kut ikuangkuah thanin a thu deuh hmak a. 

"Ka ning a! Mawl si, thian mawl deuh neih hi hreawm" Sawmi chuan arawn ti a. 

"Keimah maw !?" Ka'n tih chuan, "Ni mai mai lo, hei ka bul ami hi" Sawmi chuan ati thla rawk a. A bula thu lah chuan, "Sawm thawveng ka mawl hlawl lo, nangmah fe kha i mawl luatah hmeltha pianthiama pawn aduh tawhloh phah che kha" arawn ti tawn tawn a. A sawi zawh vek tawh hnuah ahmui chu Sawmi'n a'n hupsak leh a.

"tumah pawh anilo nia..." Zawh pawh ngailo in arawn sawi zo nghal vek a. Zorini nen chuan kan nuih nghek. 

Chaw kan ei lai chuan ka pa chuan, "Lalhruai engtik ah maw in exam dawn ?" Tiin min zawt a. 

"Kumthar ah niang" ka ti ve mai a. Ka nu chuan, "Hostelah te hian i awm duh lo mi? Inah hi chuan inhlawh hi iti ve khanglang ziah a" ati a. 

"Duh pawh ka hrelo, Sir Maruata khan ahar vaklo ang atia" ka mai a. Engmah sawizui tawhlo chuan kan ei mawlh mawlh a. 

Ka la sawi loh chu tuna ka nu hi ka nu tak anilo a, ka nuhrawn tihna nih chu. Ka nu tak hian kum 6 ka nihin min boralsan a, ka pa chuan  kum 13 ka nih thlengin amah tawp hian min enkawl a, tuna ka nu nen hi chuan an inneihna la reilo. Kum 5 tha vel an inneih tawh a, mahse nau erawh pakhat chiah anla nei a. Ka nu hian, 'ka nei teuh teuh peihlo. Mipa leh hmeichhia pakhat ve ve in awma tawk" ati deuh hmak a. A fa tak nilo mah ila ka nau nen hian min enhranna aneih ka hrelo a. Keipawn ka nu tak angin ka ngai. 

"Hruaii, vawiinah school kan ti fai dawn" Zonuntluanga chuan arawn ti lut hlawl a. 

"Ani maw, Sawmi te khan engmah min hrilh lo a" tihpahin ka pheikhawk tihfai mek chu ka dah a. 

"An theihnghilh aniang" tihpahin thutthlengah chuan arawn thu thla dat a. 

"Umm, eng nge ken ngai le ?" 

"Cement bag chhiah inneih chuan keng rawh, basket ball court tur kan siam dawn"

"Kan tifai dawn iti maw tia"

"Aw, ka sawi awmzia chu kan tifai anga kan siam bawk dawn chuan...." Ka lo en kar avang chuan ading hluai a. 

"Aaa keng rawh ka tih chuan keng mai rawh. Min en keu kuau suh" ati bul mut a. Mak deuh chu pa deuh tak ni si hian en lai(h) a awl lutuk a, hei hi a lawmawm ve na nia. 

"In zirtirtu te pawh hi an mak. Chutiang te chu hlawhfa chhawra tih tir tur ania" ka nu chuan arawn ti a. Zonuntluanga chu abu ve nghut nghut. 

"Nu bag chhia kan nei velo mi ?" Ka tih chuan, "neilo niang, i pa hian hunah a hnutchhiah zo zel a. Kha Zonuna ta kha intawm mai ru" ati mai a. Zonuntluanga pawh chuan, "Nia zawn tur ani dawn tho a, kan zawn dawn nia" alo ti ve mai a. School kal tur chuan kan inzui chhuak nghal. 

Kawi khat vel bak kan kallo ang tihah Zonuni leh Sawmi chu, "Min lo nghak ru" tiin an rawn au tial ruai a. Kawngsir ah chuan kan lo ding ve mai bawk a. 

Sawmi rawn thleng chuan engdang sawi hmasa lo hian, "Zonuntluang mikhual innei tiraw ?" thaw deuh huam huam hian arawn ti nghal thawr a.  Ka bula ding chu alo bu nghut. 

"Aawiiii, a chhelo lutuk an tia min lo biak rawh aw" a'n ti thla veleh rawk ringawt a. Zorini chuan, "Ve ngawt zela ache, a upat tawh hmel em kha. Naupang hi enga tan nge atih ang che" alo ti ve thung a. 

"Naupang ka nih loh hi, ka duh chuan ka rai thei tawh" pakhatnu chuan alo ti. 

"Zak rawh, rai duh mah la rai tu tur che i hmu zo lo" Zorini'n atih leh a, pakhatnu in chhan alo tum leh chuan, "ngawi teh u, nakinah abul tangin in inhnial dawn nia. Kal phawt ang u" ka ti a. Min chhang zui lo chuan kan kal nghal hnak hnak hlawm a. 

Kan school hi kan veng thenawm deuhah anih vangin ava hla ve deuh hlek a, ke a kal chang chuan thlan ngah tan hi chuan thlan hluamna chi ani. 

School tlang pawh kan hmu thei tawh tihah ka zawn kawngpui ah hian ka hming lam pahin motor hi arawn ri vut vut a. 

"Hruaii ka lo thlah dawn cheu mi ?" U Hmingmuana ani. 

"Aaa...." Ka'n ti fan raih a. 

"Ka  tlanna lam tur tho ania. Lo chuang ula" atih leh chuan, "Aaa,,, a hnai tawh tho. Kan lo chuanglo mai ang" ka ti a. 

"Chuti maw, ka kal dawn tho sin. Inchuang duhlo tak tak maw ?" Arawn ti leh a. 

"Aw duhlo, kan thleng tep tawh. I kalna turah chuan va kal vat rawh" Zonuntluanga zawk chuan alo ti vat a. U Hmingmuana chuan amit ti zim deuh sun hian min en a. 

"Aw anih, inlo chuang duh silo" tihpah chuan a tlanliam a. 

"Eiisss" Zorini te pahnih chuan anlo ti fan raih a. 

"Kal ang u" Zonuntluanga chuan alo ti deuh hmuk.

"Hey, Hruaii zawnna lam saw azang bik. Ka ta hi alian bik lutuk" Sawmi chuan ati nang nang a. Sir Sangpuia chuan alo la fuh lutuk. "Malsawmi ta lian bik anih chu" atia, anrawn nui nghal huk. 

"Hmmmmm, chutiang zawng pawn ka sawilo. Zonuntluanga hi maw Hruaii a star vang maiin a zawnna lam saw adah tlem bik a, ka zawnna lam hi adah rit bik lutuk" ati vak a.  A ai nasa chuan anrawn nui nghal huah huah hlawm. 

"Malsawmsang ben chawrh iduh loh chuan kal mai mai rawh" Zonuntluanga chuan alo ti hluk a. Sawmi chua tum bar in akal tau nghawng nghawng a, hnunglam atang chuan ka nuih tawp. 

Zirtirtu te intur thingpui kan lum a, a so hlim  Zorini'n no a arawn thlit chu tray chuan ka chawisan vat a. Ka fimkhur ve tehreng nen, Muanawmi ka hmaah arawn lang thut a, ka tray chawi nen chuan kan inpawm chilh a. A sa lutuk chu kan rak dun nghal chiam a. 

"Hmeli, kawng en ta che" arawn ti that a. Amah nilo in keimah intihbuak zawk ka ni reng sia, "A buak ve loh che kha" Zorini chuan alo ti a. Kan thawmah Principal arawn tlan lut a. Muanawmi chuan tap tuau hian, "Sir, thingpui sa min tihbuak vek tihpahin aban tlem abuak ve chu a hmuh a" Sawmi chuan ka beng bulah, "Vawkpui a an zia saw" alo ti hmanhmawh.