SIALI CH-8

 

SIALI CH-8 BY RAMDINI JAHAU

Chawl rei viau mah ila comment leh ads click kha minlo tih sak hram ula aw 💖

__________________________

"Pathlawi te chu an lerh a" Hlimi chuan a ti deuh hluai a. Henu thil hrilh ve lah hi 'min fuihpawrh rawh' intih na ang vel ni.

"Khatiang lo te khan sawi ve la" ka tih deuh hmuk avang chuan min en thaw thaw hian, "Ania lawm mawle, ngaihtuah la a a pianzia en reng reng hian hmeichhe duh chi nia. A lerh loh hi ka ring lo reng reng" arawn ti a.

"Ninawm, mi lah hi i thlamuan hlawl lo"

"Lo intawng thlamuan vak pawh anilo. Dawt a, 'eng mah ani lo ang' lo intih ai chuan then hmak rawh. Ka ngei tlat, a fate i awmpui a, a nin hmeichhia alo han lem kual vel mai mai ania tih pah chuan a chhuak zui daih a. A inti thinrim ringawt nia mawle.

Puipuia te unau Hlimi leh Bawiha ten an chhuahpui a, kei erawh ka room ah ka thu tum bur a.

Ka ngaihtuah neuh neuh a Hlimi sawi ang deuh khan pathlawi hi chu an lerh thei bawk sia, a nilo lam zawng hlir in ka ngaihtuah tawh. Mahse lerh viau tur chuan a hmel bawrchhawr danah khan anih ka ring bawk silo. A nupui hlui te nen lam lam chuan ka ngaihtuah chhuak a, rinloh lam daih hian an lo zuk khawsa emaw te ka ti. Aaaaa, thlakhat tha erh awrh bak kan la inkawp lo a, chutiang em em a chhia a han ngaih pawh chuh! Mahse ka ngaihdan lehlam ah chuan kan la inkawp reilo ang bawkin a mizia zawng zawng leh amah hrim hrim chuti tehlua in ka la hrechiang bik bawk silo a. Ka va han nikhua lo tak, thli thawk na lam lam a rairuang a thle kual vel ang mai mai a Lalhlimpuii thusawi vang mai maia ka lo khuk vak le. Duh leh lo inngaizawng mai mai rawh se, a nupui hlui annih loh chuan atha vek.

Inti thawveng zet chuan zai rat rat in inbual tum chuan ka in ruahman a, ring zeta hla thunawn lak ka tum lai tak chuan kawngkhar pawn lam atangin, "anu" Awmawma âw chuan arawn ti a.

"Yes, Bawihpui" tihpahin ka va hawng a, ka rinloh tawpin Jacoba alo ding khawng lurh mai a. Bawiha uite min pek ala pawm zui a, Bawihpuia an min rawn ban avang chuan ka lo pawm kang a.

"Na... Nang hetah eng nge itih ?" Ka ti bah deuh nawk a. Ka rilru ah chuan chawp leh chilh in ka thinrim emaw atia nga arawn haw nghal angah ka ngai nghal tawp a. Ava sweet tak!

Inhnuai lama ka û in, "Eeee! Siampui pawh. Inhmuh ava khat vang vang ve" a ti deuh hluai ri chu ka hria a. Chhang let tu aw ka hriat avang chuan Jacoba chu ka melh ralh a, inhnuai ka pan thla ve nghal.

"Nia, in dam maw ?" Chunu chuan ati a. A aw chu 'babe' lo ti tu kha niin ka hria. Mahse ka û nen an inhriat hmel viau sia, Jacoba nupui hlui tihna mi !? Jacoba lam hawi chuan inherin rum zet chuan ka melh a, kei ai rum maha rum zawk chuan min lo en ve lehnghal zui a ah!

"Bawihpui" Chunu chuan Bawihpuia ka pawm chu rawn ban mai a tum a, Bawihpuia an alo duh tlat lo.

"Hi, Angela ka nia. Bawihpuia te nu hi em ni inih ?" Ka tih chuan nui vur vur a bu zauh hian, "Aw ni e, Siampuii ka nia" a rawn ti a. Za lo zet chuan ka nui a, tunah tak hian amah hi phin darh vek a, ka hnunga ding pa saw sah sawk sawk ka chak ber. Hlimi sawi kha adik chiah anih dawn hi.

"Nu!" Kawngkhar atanga rawn ti thawm avang chuan kan hawi deuh thap a, Puipuia chu mak tih hmel zetin alo ding.

"Bawihte" tihpahin Siampuii chuan a kuah a, Puipuia erawh in alo nawr sawn thung. Siampuii chuan, "min ngailo mi bawiha ?" a'n tih chuan, "Ngei e, mahse tlangval chuan mi an kuah mai mai ngailo" arawn ti reuh a. Ka nui huk tep, mahse Siampuii hawihai lutuk chu ka khawngaih reuh.

"A inti tlangval ve tawh lutuk anih kha. Ka bulah chuan asawi reng zel che, Ujacoba phei chuan a sawi nasa thin che lawm" za vak lova nui chung chuan ka ti a.

"Awii, ka hah lutuk. Lalpuipui tinge i tlan vak" Hlimi'n thaw deuh huam huam a arawn tih chuan keini lo ding thap min hmuh bawk si vang chuan ading deuh chawt a, "Mikhual kan nei dawn elaw ?" arawn ti tha ve mai a, a hnungah Bawiha leh Muanawna an rawn lang ve nghal zat bawk a.

"Aw, hei Usiampuii anih hi" ka tih chuan Lalhlimi pek chuan a kawchhung thlenga en vek atum emaw tih tur khawpa chiangin a'n en a, Usiampuii pawn a rap hmel lutuk. Chutah nui then thaw in, "Hlimi ka nia" ati tawi tak a. Choka lamah alut tlang nghal daih.

"Bawiha ka thil chah che kha ilo keng em ?" Ka tih chuan alo abu zauh a, Muanawma nen chuan choka lamah an lut phei nghal daih.

"Angela, han inti fai rawh. Hei anu a awm tawh lawm" ka û chuan alo ti a. Tun tum a thu rawn chhuah hi chu ka va han hnial lo chiang tak.

"Aw, Bawihpui anu bulah kal rawh aw" tihpah chuan ka Usiampuii chu ka pe a, Bawihpuia chuan duhlo tawh lo in a ban ve mai bawk a.

Putar hmelchhe khir khawroa lam chu ka hawi a, nui deuh sen sen hian, "Ujacob inchau'h viau chu ka ring na a mahse cake min eipui phawt ula inhaw dawn nia" ka ti a, inchung lam ka pan nghal a. Step ka rap tan chauh tihah chuan Bawihpuia chu arawn tap a, "anuu" tih pahin min lo thlek ngawih ngawih a. Ka hawi buai deuh nak a, chutiang bawkin Usiampuii pawh chu a buai deuh tih ahriat theih.

Usiampuiin a thlem chhunzawm avang chuan inchung lamah chuan atlan in ka tlan chho a.

______________________________

"Naktuk atang chuan class i rawn zawm thei ang chu tiraw ?" Bawiha chuan arawn ti a.

"Aih, ka la peih lo" ka ti mai a. A lu a bu nghut nghut a.

"Rinfela tiin ko tawh che ila atha ang. Bawihpuia te unau nen kohdan in ang chu abuaithlak emai" ka ti a. Min chhang lem lo.

Engmah pawh ti ve lemlo chuan ka thu ngawi reng a, chutah Rinfela chu en he haw hian, "Lalrinfel, i uite min pek te kha tuam mawi ve ta che" ka ti deuh hluk a.

"Tikhan a that em kha, bakah i duh vak lo niang mi nau i pe daih bawk sia" arawn ti veleh hmuk a.

"Mi nau ani lo, bakah ka pe lo. A haw duh loh phah sia ka hawntir tawp alawm. A thu hrim in tuam mawi ve tur che nia" ka la ti tum hmuk a.

"Awi awi awi, tunge uite tuam mawi ngai. I thinrim mawhpuh tur hrelo in engmah mawhpuh suh. Pathlawi lerh ngaihzawn vang maia lo thinrim" Hlimi chuan min ei lo hmel zet hian arawn ti ve a. Keiin ka melh thip ram bawk a.

"Angelai chu tiang hian anui thei lawm" tihpah chuan Rinfela chuan ka nak velah chuan min rawn dèk chiam a. Kei ka lo nui nghal uar uar.

Chutia inpawmchilh deuh ti tih a kan awm lai chuan Rinfela chu atawp thut a, choka kawngkhar lam hawiin a hrawk a thian kharh a. Ka'n en ve chuan. Putara alo ding a, ala meng rum em em zui.

Hmel ti danglam eih lo in nui hmel pu reng chung chuan, "Ujacoba chu in haw tawh emaw ka tia" ka ti var a. Ani arum nghut thung.

"Inbe lawk teh ang" tihpah chuan ka room lamah a kal nul nul a. A hnung lam atangin ngei zeta melh in ka zui chho ve tho a.

"Aw eng nge nita ?" Ka ti lut nghal thawr a.

"Kha kha eng nge awmzia ?" A lo ti daih. Hrethiam lo zet chuan, "Eng chu maw !?" Ka ti let ha a.

"Khatia, mipa lo intawh tir vel kha ava nuam awm ham ham ve ?" A lo ti bung nghut a.

"Engtia mipa intawh....." Ka sawi lai mek mek chuan, "Ka tawk lo reng reng ti suh, khum chu awm se intlu nghal thei ang chu" arawn ti leh hmuk a. A thil sawi duh dan kher kher chu ka ngaihdan ani vak lo, rum zeta melh hian, "eng nge, duh leh kan tlu nge, duh leh kan tlu lo nga. I nupui fanau te chauh va ngaihtuah rawh" ka ti ve hmak a.

"Ka fate chu ka ngaihtuah, mahse annu ber hi ngaihtuah nasat ber angai anih hi"

"Annu maw, ngaihtuah angaih loh saw. I mit len tehreng nen i hmu ve lo mi, zanin ah pawh arawn zui ve che kha. A pian te kha perek a ang ropui si, ka ngei nia" ka ti nghal deuh duah a. Nuihzatthlak ka sawi loh tehreng nen a rawn nui huk a. Ngei zeta melh in, "Eng nge i nuih a, haw rawh putar khir khawro pa. Ka hmu hne che, hmelchhepa. I rawn haw hun tur ka lo nghakhlel ve em em a...." Sawi zawm theilo in ka chawl dat a, ka mittui rawn tla tur chu ka kut a tuai vut in, "Haw rawh! Lo kal pawh lo kal tawh suh. Naupang ho pawh ka enkawl pawh an ngai tawh lo ang, annu a awm tawh kha" ka ti a. Haw rawh ti tu zawk chu ka la chhuak daih zui.

Mahse thui pawh ka kal hma in, ka hnung lam atangin min rawn kuah a, "Naupangte hian nang ai upa ka ti buai e te min tia, thikthu chhe hle si" a rawn ti a.

"Ka ti buai awkawng lo che, kal teh. Ka nu te iti harh nge haw rawh" ka ti leh a.

"Ka ngai che ti phawt teh" arawn tih chuan a nak ah nghawk pawpin, "ka ngai hlawl lo che, i nupui hlui pian pereki khan a ngaih em che kha. Mi ibiak lai pawh zah zolo in a lo fawh vel che kha. Uakkk! Ka ten che u!" Uak der vel pah chuan ka ti khum nek a. A huat ka rin tehreng nen engmah ngai lo awmin, min runluih niawm tak hian, "I thik anih kha" arawn ti a. Amah hmachhawn zawnga dingin ngei zetin ka melh a, "I hmel pawrh anih chu! Haw rawhhhhhh" ka ti leh a.

"Mahse amah kha ka duh hleinem, ka inrinloh lai takin min lo fawp a" hmel khawngaihthlak zeta siamin a'n meng kual vel a. Chek hlak hlak hian, "Awi awi awi, i va han zaktheilo tak. I fate rual vel bula khatia awm kha i zak em? Putar inih kha. I inrin lai emaw rinloh lai emaw pawh nise, arawn fawp tho che a, room khata in awm dun hrim hrim pawh khan ka pawi insawi. Haw mai rawhhh!" Ka ti leh a.

"Anih lo kal rawh, ka hmui hi kan brush dawn nia" tihpahin ka room ah chuan min kai lut a, bathroom ah min tlang pui a. A ngam bawka keiman a hmui kan sil tak tak mai nih kha! A sen deuh vawt a, a mittui te a parawl theiin ka hria.

"Ana mi ?" Ka tih chuan "Aw" a rawn ti hmuk a, "Aw i chawh, i hmui midang i fawh tir man anih kha, i hmui chu sawiloh i biangah pawh hian inupui hlui pian pereki sawn a fawp leh anih chuan ka nawt belkang vek ang" ka lo ti sak hmak a. Rap hmel tawka min en in, "ka hmelchhe vek dawn sin" a rawn tih chuan, "chhe mai mai rawh, ka mita i that chuan atawk" ka ti leh a. A hmui ah chuan fawh sak zeuhin ka ding chhuak a.

"Haw rawh, pathlawi zaktheilo lutuk. Mi ìna len chintawk te hi hre ve ta che" ka ti ta daih a. Nui deuh suk hian a tukkhum hiat neuh neuh chuan arawn ding a. Kan inzui chhuak ve mai bawk a.

Putara ka thlah zawh chuan thawveng zet hian inah ka lut a, "in haw dawn ami ?" Rinfela leh Muanawma kawngkhar lam rawn pan ka hmuh chuan ka ti thuai a.

"Aw kan haw mai ang, min ngaihsak lo emai" Muanawma chuan ati bui bui a, a tukkhum rawn ri nghal fawk in, "Chheban, innu chiah ngaihtuah rawh" Hlimi chuan arawn ti khui khui a.

"Ninawm, kut ram nu!" Muanawma chuana tukkhum tuai pah chuan ati hmuk a, achhuak tau nal nal.

"A tlai ve tawh sia kan haw phawt mai ang" tihpahin Rinfela pawh chu achhuak zui a. An hnungah ka zui ve vat a.

"Inhaw hma thei si. Aw anih, naktuk ah kan inhmu dawn nia" ka ti a.

"Class i kal dawn lo emaw ka tia ?" A bike start pah chuan ati a.

"Ka kal leh si dawn lawm" ka lo ti chuan a bu ngauh a, keimah vek chuan, "Anih muttui mangtha u" ka ti a. An tlang liam nghal vang vang.

____________________________

Karkhat aliam leh meuh chuan Putara nen pawh kan tha leh hle tawh a, ka duhlo atia. Ka rinloh sak buai peih lo, mahse a nupui hlui hi a haw har tawh hi ka'n ti khawp a, a pian zia thlerh thlawrh te hian min ti hlauthawng reng, a chhelo sia, inkhat ah an cheng dun bawk si, tih loh loh te hi anlo tia nga, a rai leh kuk ang tih mawlh te hi ka hlau a. Thikthu chhe viau e tilo hian an inah hian ka kal duh tawh thaklo lehnghal. Anlo haw zan khan Nu-i pawh alo hruai ve reng a, a zia hlauh zawk. Ani lah hian eng hria nimaw ka cctv ka ti mai, a rawn report hnehsawh thei lutuk mai a. A chang chuan Jacoba leh Siampuii an inneih lai khan Siampuii hian a duatlo thin anga, chuvangin a ngei anih ka ring tawp.

Ka hnung arawn ri thum dut a, ka eu nghal awl awl mai. "Hlimhadar i mawl ami !?" Ka ti nghek a, amah lah chu ala nui vak vak zui.

"Hmeli, min chum hnang tep anih kha" ka ti bui bui a. "Ho e, enteh Rinfelan ngaihzawng anei an tia" thutak zetin arawn ti a.

"A nei ani mai lawm, i pawi alo sawi mi ?" Ka lo tihsak hmak.

"Sawi lo e, i hriat ve chak ka ring a ka lo sawi mai mai nih kha" arawn ti leh ringawt a, kan ngawi zui daih.

"Vawiin hi ava han reh em em, class an va han nei rual hlawm em em ve" canteen a hawi kual vual vual pah chuan ka ti a.

"Ka ti keipawh, class ila nei mi ?" Hlimi chuan arawn tih zawm ve zat bawk a. "Nei nang, i nei zawk lo mi ?" Ka tih ve chuan, "neilo, i nei emaw ka tia" a rawn ti ve vat a. "Nei mai mai nang aw, class nei silo nge kan thut reng. Haw Felfai-i dawr nghak va nghah pui ang" tiin kan inzui chhuak a.

Dawr pawn atang chuan kan han thlir deuh vang vang phawt a, dawr chhunga Siampuii lo chetla vel ka hmuh chuan ka thaw deuh hawk a. Kal leh lo mai ka tum ut ut a, mahse ka lut lui ta tho a.

"Ee, lo leng ru" Min enchiang hleilo chuan alo ti vat a.

"Ehem, thawmhnaw rawn thleng thar a awm em ?" Hlimi chuan a'n ti deuh lawng lawng a. Siampuii chuan min rawn en chiang teh e.

"Awm e, nimin ah arawn thleng a. He lamah hian lo kal ru" tihpah chuan apen sawn zui a. Hlimin min rawn zui ve emaw ka tih kha hmun dangah alo peng kawi daih a.

"Hei hi han ha chhin teh, i inhmeh viau ang tih pahin tank top pakhat chu atawn khai chhuak a. Awih loh hmel zeta en in, "I uang ani lo maw !?" Ka ti thlawt a. A thil kai chu en in, "A tha iti lo em ni ?" âw dam dap si, ne zeta min melh chung si hian arawn ti a.

"Naupang size kha ka hak theih i ring em ?" Ka ti ve hmuk a.

"Oh! Naupang size ani em ni? Size kan neih lian ber ania"

"Ummm, nang chuan i ha thei dawnlo anih hi! Kei chuan ka lan mawi pui viau thei ang mawle" tihpah chuan min en kual a, rum zetin ka lo en ve.

"Hei pawh hi i ha theilo ang" tih pah chuan naupang size hlir chu arawn khai chhuak a.

"I mit adel ami ?" Ka lo tih deuh hmuk chuan, a nui hak a, "Teuhlo, i pian ang nen kha chuan eng thawmhnaw mah i mawipui ve dawnlo tih hriattir che ka tum mai mawle" nui deuh sang chungin amah vek chuan arawn ti leh a. Ka ngei leh thinrim lutuk bawk si chu ka khur titih thei hialin ka hria.

"Thil sawipui hrim hrim che ka duh a, ilo kal hlauh hi atih zia. I hria em, hetia ka pasal fanau te ka rawn awmpui ve theih tak ah chuan ka pasal lo hel lo hel kual hi sim theila tha ka ti khawp mai. I hria nga, fa pahnih lai kan nei ve tawh a, hetia mipa lo ngaihzawn chu itan pawh a zahthlak. Nang ang nula nalh leh hmeltha te chuan tlangval hmeltha leh hmangaih deuh tu che aruk in i nei em em ang........." Hlimi lo kal a hmuh vang nge sawi zo loin a thawmhnaw khaina lam chu a hawi leh daih a. Kei thinrim lo inhrosa chi Hlimi chuan, "Tinge a ?" A rawn ti a. A thil ken lai chu eng nge anih pawh hrelo in Siampuii lo hawi leh chiah hmaiah chuan ka theh nghal thawt a. Siampuii au vak leh Hlimi'n, "a sa ania !" a rawn tih ve thawt chu a inrual chiah a. Khawi atang in nge arawn chhuah tipawh hriat loh in Putara pawh arawn chhuak ve nghal a.

"Eng nge thleng !?" Kei min en si Siampuii ngaihven pah si chuan ati a. Siampui lah chuan, "Ka hmai, ka hmai" alo ti ve ruai bawk.

An in buaipui vel chu zawite a, "hmelchhe ho" tihpah in kasan mai ka tum a, Putara chuan ka banah man in, "La kal suh, thil awmzia sawi fiah rawh" arawn ti bung nghut a. A ban leh lam a Siampui a kuahna chu en in, "Ka tawngthei tawh lo. Biak pawh min be tawh suh" tihpahin a ban chu ka vai thla hmawk a. Ka kal nghal vang vang.

"I va han kal chak" tihpahin Hlimi chuan min rawn um a. Ka kal lai chu ka ding deuh thut a, Hlimi chu ka bulah arawn ding vat bawk.

"Ka tih luih pawh anilo" tiin tap deuh pur chuan Hlimi chu ka en a. Ani reng bawk a, ka thil thehna kha asa tih ka hre lova. A nat dan tur ka ngaihtuah pui hian ka khawngaih ve tho bawk sia. Ka inthiamlo bawk nen, amah ngeina rilru pu tho siin ka tah a chhuak ve tawp.

"Eee, eng nge itah ringawt? A phu tawk anih kha, lungngai suh, asa vak hleinem. Tlem bak asa lo, mahse Ujacoba hnenah mark score nan a hmang dawn anih kha" tihpah chuan min rawn kuah a, min tawng thlamuan a tum ve nalam ah hian ka huatthu hi a sawi tel ve ziah.