BETWEEN US CH-12

REMRUATSANGI POV.

 

"Ilo va haw hma ve" choka ka luh chuan ka nu chuan alo ti vat a.

"Nia, kalna tur kan nei iti sia ka rawn haw hma mai"

"Aww, anih chuan inthlak lo law law mai la. Heng hi ka'n ti zo lawk anga kan chhuak dawn nia" ati zung zung a.

"Nu Muanpui, tukin a ka cake ei ang kha ala awm em ?" Ka hnung lam atanga rawn ti tu chu ka hriatchian em vangin hawi pawh ka hawi let peih lo.

"Thawmhnaw ka lo va pho ang" tiin kal daih ka tum a. Mahse ka nu chuan, "awm lo, mahse Remruati siam kha nia. Bawihte i siam leh lawk peih em ?" Ka nu chuan arawn ti a. Peih lo tih chi ani bik bawk silo ka lu chu ka bu nghat a.

"Zuala lo nghak mai rawh aw, keiman puan chu ka va pho nge" tiin ala chhuak daih zui.

Ka che zui mawlh mawlh a, Simon chuan chair ah thuin min lo en ve reng bawk.

Fridge ah artui ka lak lai chuan ka hnung atangin min rawn kuah a. Ning zet hian, "kal teh, ka hmanhmawh nia" ka lo ti hlar bawk a.

"I thinrim hian ka ngai zual che a, i duhawm zual hian ka hre tlat thin. I thinrim laia tihbuai che hi ka chak zek zek zel" ka beng seh pah chuan a ti a. Kei lah teng tung chung hian, "Min  thlem pawh tum lo, min tihbuai ringawt chak" ka ti tum luau a. Per thet thet in ka thil tih chu ka chhunzawm a, ka hnung atang bawkin min rawn kuah leh.

"Ka thlem dawn che a i duhlo zel a lawm"

"Ka..." Ka sawi dawn lai taka âw rawn thian kharh ri vang chuan choka kawngka lam chu kan hawi a. Hmeichhia la valai tak hi alo ding reng a, mizo a ang lo viau. Kamis var leh pawnfen dum hi a inbel a, eng form emaw ni tepawh a ang zawk. A hma in ka la hmu ngai miah lo bawk.

Simon chu ka nghawk a, mahse awmze awm lo tak hian ani lah chuan min la kuah reng.

"Rena ilo haw tawh a ?" Ati a, Rena atih chuan alu a bu zauh.

Choka lam pana Simona nu a rawn au tak lawng lawng ah chuan Simon chu a inla hrang ve hram.

"Rena i chawlh hman chu eng nge a an ?" A rawn ti lut a.

"Lo va kal daih rawh" Simon chuan ka beng bulah arawn ti ru sar sar a.

"E bawiha, ilo va haw hma ve ?" A rawn ti tel ve luam bawk a. Mahse an in chhan zuina ka hre tawh lo. Kan room lam pan chuan ka chhuak ta daih a.

"E bawihte, ka inthlak ang a kan kal dawn nia" ka nu puan pho zo chuan alo ti bawk a. Ka lu ka bu zauh.

__________________

"Nu tur dawr nge? A va lian ve" kan hmaa dawr en chung chuan ka ti deuh hluai a.

 

"I hre mai ang, lut ang" tihpah chuan min kai lut a. A pawn landan ang chiahin a chhung pawh anuam.

"In lo thleng maw ?" rawn ti nghal var tu chu ka en a. Hmanni deuh tawh a ka pa thlana ka hmuh kha ani.

"Aw, duh aiin kan rawn thleng har a" ka nu chuan alo ti ve bawk a.

"In hmanhmawh duh kher anih kha, Nubawihi pawh ala rawn thleng lo" a lo ti ve bawk a.

"Nu" khawngkhar lam chu kan hawi phei a. Deniz-i kha nui ver ver hian alo ding a, kan lam arawn pan.

 

"Ehe Remruati te pawh, in bazar em ni ?" A rawn ti var a.

 

Chhan tumin ka kâ ka âng hman zuau tawh mahse anu chuan, "Nubawih in inhria em ni ?" A rawn ti a.

 

"Aw, hrelo tih ngawt dawn aia inhria ani mai ang chu" ati a.

 

"Umm a lawmawm nasa nih chu, tir'u saw lam ah sawn i va thu ang u" a tih zawm zat a. Coffee table lamah kan inzui phei tham tham.

Kan nu te pahnih chuan eng eng emaw an sawi a, Deniz-i'n a zawm ve zeuh zeuh bawk. Mahse an sawi han zawm va mai turin engmah ka hrethiam ve tlat lo.

Ka theitui in chu hak in ka khuh nghal that that a, "engmaw!! Deniz leh kei unau. Chuan Deniz-i nu hi ka nutei maw?" Ka ti nghek a.

"Aw bawihte" ka nu chuan arawn ti a. Ka awih hlawl lo, ka nu hian pianpui unau hi pahnih chiah anei a, Putea kum hmasa lama min boralsan ta leh Nukimi chiah ka hriat theih leh hriat ve phak chinah midang an awm ka hre ngailo.

 

"Dawt sawi suh u" ka ti thlawt a.

 

"Bawihte, dawt kan hrilh lo che sin" tih pahin Deniz-i nu chu a insut hraih a, Deniz chuanin akuah vat.

"Bawihte, he thu hi engtin nge i dawnsawn ang tih ka hrelo a, mahse hei leh chen engmah hrelo in i awm tawh a, i hriat ve ahun tawh ani" Deniz-i nu chuan arawn ti a. Ka nu zawk chu ka en nghal vat a, ani pawh mittui tling piau in Deniz-i nu chu alo en.

"Eng nge in awmzia hi, tinge intah a. Eng nge ka hriat ve loh chu ?" Ka ti chiam a. Deniz-i chuan, "I hming ang hi unaunu ka nei ve ka tih kha ihria em, kha kha nangmah hi ini. Nang leh kei hi unau kan ni!" a rawn ti a. Ka nu lam chu hawiin, "nu kei lo midang fa inei mi ?" Ka ti tiau a.

"Nilo, ani kha nilo in kannu chu ka bula thu zawk hi ni" Deniz-i chuan arawn ti leh a. An thil sawi leh an awmdan vel hian min ti mangang zo vek tawh.

Ka ding thut a ka nu chu pawtin, "nu haw ang" ka ti nghal chul. Ani lah a thu tlat bawk si.

"Nuuu haw ang ka tih chu" tap chung chuan ka ti vak a. Ka mi pawh mek hi ka nu nilo tur atan chuan adik lo, a dik hlawl lo. Ka nu chuan mitsen ram chunga min rawn en hian, "bawihte, engkim hi hre law law vek rawh" arawn ti a.

"Engmah ka hre peihlo, nang lo nu dang ka nei lo. Deniz-i nu chu ka nutei ania nang chu ka nu lawm inih haw ang" ka ti chiam a.

"Remruat thudik ihre ringawt dawn alawm. I nu lak atang khan lakhran che kan tum lo" Deniz-i chuan alo ti dam dup a. Thin phu dup dup in an thusawi leh tur ngaichang chuan ka ding ran.

"Bawihte, min ngaihthla rawh. Kei leh i nu hi phir kan ni! I nu ai hian ka upa zawk a, darkar pawh tling loa upa zawk ni mah ila ka theih tawkin i nu hi ka duat ve thin a. Kan lo upa zel a, phir ni si ah chuan kan hmel leh pian zia chu in ang lo tak ani a. Kei ka san em em laiin inu hi chu a thau khal tuk a. Kei ei mah inu hian mipa ah a luck zawk a, mahse a pawi lai ber chu kan mi duh kha mipakhat ani tlat. Chumi chu i pa hi ania. I pa nen hian kan inkawp char char a, chutih lai chuan i nu hian a rilru alo pe ve ang tih ngaihna reng ka hrelo. Mahse duh deuh chung si khan i nu hian kan inkarah engmah buaina leh harsatna a siam ngai lova, kan pahnih inlaichinna hlimpui ber tu te zingah a tel thin.

 

Hun akal zel a, i pa nen kan chesual ta a. Ka vanneih nge ka vanduai ka ti zawk dawn ka rai ta hlauh mai. Tichuan i û hi ka pai ta a, eng nge ka hriat tehreng ka hrelo. Raipuar chung khan ka chhungte lakah hel tlatin ka tlanbo ta a. Kum 3 hnu velah ka lo let leh a, i nu leh i pa hi inneih tum anlo ti tawh. Mahse ka va tibuai a, i pa nen chesual lehin nang ka pai ta che a. Ka nei che a, mahse chutah pawh eng nge ka hriat ni, damdawiin pawh kan chhuah hma leh i hmel pawh ka la hmuh hma in ka tlanbo leh a. I û hi fahrah inah ka dah a, pasal nei pangngaiin ka dinhmun ka siam rem hnuah i û hi ka hruai haw ta a.

Tun hnu ah hian khang ka thiltih te kha ka inchhir a, ka fanu ti ngam tur che pawh ka nilo. Ka hriat danin i nu hian a enkawl seilian che a, i pa nen pawh khan an inneih ta niin ka hria"

A sawitu pawh ka en lo, ka nu en chung chuan, "tinge chung chu engmah ka hriat veloh" ka ti tiau a.

 

"Achhan chu i nu emaw i pa emaw dem zawnga thu engmah sawi ka duhlo. I pa kha ka hmangaiha mahse a hmangaih chu midang ani a, chu chu nangmah hringtu che hi ani. I pa khan...." A sawi zawm theilo a tap a.

Awmngaihna ka hrelo!

 

Ka tihngaihna hrelo lutuk che awmdan tur thiamlo lutuk chu en kual vut vut in ka tlanchhuak a. Ka mittui te chu hru tawk tawk in ka hmalam chu ka pan mawp mawp.

"Hey, hetah eng nge itih ?" Tih paha min kuaiher sawk tu chu ka en a, kuah pahin a awmah hmai ka phum a ka tap nghal hlawp hlawp. A tirah hriatthiam loh hmel zet chuan min pawh hran a'n tum a, mahse ka tha hmang ve meuh a ka kuah vangin athei bik lo. Min hrethiam ta ni awm chuan ka samah chulin ka hnungah chuan a beng zui thek thek bawk a.

"Le min hrilh tawh rawh le, eng nge thleng a ?" Tui intur min pek pah chuan ati a.

 

"Engmah ani lo, chuan hei vang hian ka lawm e" tih pahin tui chu ka lek kang zauh a.

"I chiang maw, khati khawp khan i tap ania. Engmah a nilo tih chi ani dawn mi? Min haw viau mahla itan chuan ka awm reng ania"

"Aaa chutiang....."
"Hetah ni maw ilo awm ka zawng nasa lutuk che lawm" tih pahin Deniz-i chu ka hmaah arawn ding a. Ka sawi tur pawh sawi ta lo chuan ka en a, "aw tinge min zawn a?"

"Bazar vel mai mai iduh ka ring a" min be mahse Sawmzuala chungah amit afu tlat thung.

 

"Aw, keimah pawn ka kal thei lawm"

 

"Remruat in inhria em ni?" Sawmzuala chuan ati a.

 

"Ila hre velo anih hmel, Remruati nen hian unau kan nia lawm" Deniz-i chuan ati a. Sawmzuala chu ameng phar awk mai.

"Kan kal phawt ange" tihpahin min kai nghal dawr dawr a. Engmah pawh ka sawi hman ve lo.

"Tinge Sawmzuala kha i hmuh a ?"

 

"Aaa kan inhmu fuh mai mai"

 

"Awle, atha e. Chawhnu lam chu ka awl tawh viau a kan bazar dun dawn nia" tihpah chuan motor chu akhalh chhuak a. Ka aw liam ve tawp mai.

Ka thu hriat zawh chiah nen chuan abula awm pawh chu nuam ka ti hleithei lo. Inkhai bawr luk chung chuan a car lam chu kan pan a, kan thil ken vel kan dahluh fel hnu chuan ka ding deuh tut a.

 

"Tinge, lo lut la" a rawn ti a.

 

"Aaa, ka lo zui tawh lo mai ang che" tih pah chuan ka kalsan nal nal.

__________________

"Khawnge i awm ?" Tih ringawt  message chu Simona hnen atangin ka dawng zat zat a. Ka chhang lo a, ka seen hek lo. Atawp ah chuan a rawn call ta nge nge a mahse vawi 10 chuang arawn call hnu pawh chuan ka la chuang lo.

"Call pick up rawh"

"Khawnge i awm ?"

"Call la hram teh" message arawn thleng leh zut zut a. Thaw deuh hakin ka phone chu ka la kang a, ka switch off hmak..

Mahni a awm hi ka mamawh rih ani.

Thaw leh hak in van lam chu ka thlir a, a ngai te bawkin ka thaw leh hak ringawt.

'nu' tih ringawt hi ka rilru ah hian arawn lian em em ringawt a. Ka nu, ka nu hi ka nu anih loh chuan engtin nge tiang tak hian min enkawl theih? Ka pa a hmangaihna vang mai mai lehnghalin! Ka nu ani emaw nilo emaw, anilo chu nu dang ka neilo. Min hring tu ani lo thei, mahse min hring tu aia min hmangaihna a nep bik na ka hrelo. Engkim hi thleng tawh vek ani a, thil hlui avanga kan nufa inkar tihchhiat ka duhlo. Kan nufa inkar tan dan chu hmangaihna vanga intan ani a. A bul bera hmangaihna a tel chuan engkim hi atha ani mai. Ka nu ani a, min hmangaih a, min tuam hlawm tu leh a nunna tluk hiala min ngaitu hi ti ama thusawi ngei pawh nise ka nu anihna a bang lo.

Dar 11 vel chuan in lam panin ka kal chet chet a, ka nu chu gate bulah alo vei thuak thuak a.

Min hmuh chuan min rawn pan vat, "bawihte, khawnge i kal? I va rawn haw har ve? Min ti mangang lutuk" tih pah chuan min kuah a.

"Ka leng mai mai lawm, tinge ila mut loh a ?" Ka ti mai a.

 

"Engtin nge ka fanu awmna chin pawh ka hriat loh laiin thlamuang takin ka mut theih ang. I phone i off a i kalna tur isawi silo" ati a, a tap titih.

"Ka tihpalh" tih pah chuan ka kuah a.

 

"Vawikhat mah min ti mangang tawh suh ang che" ati a.

 

"Lut ang, naktuk hna thawh i ngaih kha" a rawn tih zawm zat chuan kan inkuah lut a.

 

Choka kawngkhar bula Simona lo ding ka hmuh chuan ka tawi hrut a, "tinge i din ?"

"Aww nu, lo va mu rawh. Tui te ina intihfai lawk ka duh" ka tih chuan alu bu nghatin a lut zui a, keipawh choka lamah chuan ka phei ve nghal mai a.

Luh pawh ka luh hma hma chuan chhung lam atangin min fawp lut a, bangah min nawr bet nghal tawk a. Ka lu zawna in nemkhalh run chung hian, "khawnge i kal ?" A rawn ti fak a.

 

En chho kiau in a hmai chu ka han khawih a, ka kut pahnih chu phar chho in a nghawngah chuan ka kuah chho a, kuai kun deuhin a nghawng leh dar inkar ah chuan ka lu nghatin ka awm hle hle.

Ka chet dak chu mak ati deuh nge ni a'n awm deuh ren rawn a. Mahse harhchhuak thut ni awm in ka bawp ah chawi in min pawm kang a. A kawngah ka bawp ka khawkherh ve nghal zat a, ka hnung ah chulin  min kuah hle hle.

"I tha em ?" Atih chuan "imm" tih bakin ka chhang lo a. Engmah min zawt zui lo chuan duat takin ka hnungah chulin min kuah hle hle a.

"Hetia awm hlen daih hi ka duh, inchar bet mai ang" ka tih chuan alo nui huk a.

 

"I duh tak tak chuan kan inchar bet dawn nia" arawn tih ve chuan keipawh ka nui tho.

Min dah thla a, ka sam hnawk te chu hui tha in ka beng ah chuan azep a, a kut pahnih a ka biang tawn tawn a dawm hian chiang zetin min en a, "tinge i va bui ve ?" A rawn ti hlut.

"I tap ami, i hmelchhe vek" arawn ti leh hluai.

 

"Ka hmelchhia maw !?" Ka ti vak a.

 

"Chhe lo e, i tha ber" tih pah chuan min kuah vak a kei ka te that. Aw an rawn thian ri kharh a, ri lo chhuah na kan en chuan Tukin a Rena an tih kha tui no kengin a lo ding vang.

 

"Rena anih saw, engmah anilo" a ti liam puat a, mahse min en duh danah sawn engmah ani lo tih ngawt chi chu ani lo.

"Simon mut ahun tawh viau in ka hria" a rawn ti bul nghut a, hmeichhia si a âw chu a ngainatawm loh viau mai.

"Aw kan mu dawn chiah" keimah zawkin tih pah chuan Simon chu ka kai chhuak a. Tang loin min zui ve mai bawk.

"Simon kha kha tunge ni ?"

 

"Rena anih kha, kan hnathawk ania. In rawn insawn lai khan chawlh a hman lai ania ihre lo ani mahna"

 

"Ka ngei deuh reuh in ka hria, pasal anei lo em ni a melh dan che kha apangngai lo tlatin ka hria" ka tih chuan arawn nui huk a.

 

"Thik thu chhe nu, a fapa rual hi min melh taih iring deuh ami ?"

 

"Aw, aman melh tai lo che mahse nangpawn ilo melh tai thei a"

 

"Lalpa leh!!" Tih pah chuan za zetin anui hawk hawk.

A hmui chu hup sak a,"bengchheng suh" tih leh hawi kual nghal chu ka rual a. A nuih za chu a hmui ala kawh put put. Run tawka melh in ka beng a, "nuihzatthlak ka sawi mi" ka ti hmuk.

"Sawi lo e" sawi pawh asawi tha theilo. Hmui hup in anui khur leh dar dar.

 

"Hmela" tih pah chuan room ah ka luhsan hmak.

Ka nu chu tui tih hmel takin alo muhil tawh tih ka hmuh chuan ka khum lam ka pan a, light off in ka inkhuh tha sat sat a, ka tawngtai zawh hnuah ka mu ta a. Rei pawh ala rial lo ang tih ah chuan kam room kawngkhar chu arawn inhawng dek dek a, ka thu kang nghal zat.

Simon chu arawn dak lut heu a, min la rawn then khum nasa mai zui.

 

"I room ah kal rawh, hetah tih tur inei lo" sehchilh deuh nawk chuan ka lo ti a.

 

"I bulah ka mu duh" arawn tih chuan ka melh nghek a. "Engmah sawi lo khan i room ah va kal rawh" ka ti leh a. Min chhang loin ka nu chu a'n enfiah te te a, a chezia chu ka lo thlir reng. A hmai zawnah chuan a kut te chu avai vel a. Ka lam hawi a rawn nui vur vur hian, "i nu pawh a muhil tawh" arawn ti ringawt a.

"I sawi ngailo pawn ka hre ve reng, i room ah kal rawh" ka ti leh a.

Ka lam rawn pan pahin, "i bulah ka mu duh ka tih kha" arawn ti a, ka puan sin chawp chuan min rawn delh thla nghal rawk.

"Hmela tho rawh, i rit si. I room ah ka mu rawh" tawng ring ngam bawk silo thinrim bawk si chuan ka ti a.

 

"Aih, vawiin nilengin min biruksan a ka ngaih zia che hi i hrelo" tih nghat bah chuan a hnar der nghal kuk kuk.

Khum a te si, alum si ala hnar der kuk kuk zui mai phei chu, ka ngei lutuk chuan a mal ah te ka sik a. Ka nu arawn inleh a, arawn khuh deuh kharh chuan a lu a kàn vut a, ka nu chu amu tha leh mai a.

Min rawn en hian, "nangpawh muhil rawh bawihte" tihpah chuan ka biangah arawn fawp tawk a. Aban min kham tir in kan hmai insi chet chuan min kuah hnai a. A hnar der leh zui hmiah.

Sai sir ngar ngar a kan mi chung pawh chuan single bed  na na na chu nupa inngai leh inthlahlel ngawih ngawih lo tan chuan a te lua ani.

 

Tui tui hmel tawk hian ahnar kuk kuk a, a hnar ring mai bawk si ka nu chu aharh ang tih te pawh ka hlau. A mal ah te chuan ka sik leh ngar ngar zel a. Awmzia lah anei thei der lo.

A rei deuh hnu chuan a tho chhuak a, aning anga a room ah a kal dawn anih ringin ka lo thaw huai. Mahse khum bulah chuan a'n ding leh ren rawn a, "i roo..." Ka sawi zo hman lo ka dar leh ka mal zawn rawn zen tlangin min pawm kang nawlh a rinloh lutuk thil ani bawk si nen ka rak that a. Ka hmui ka hup leh nghal vat.

 

Ka nu mutna lam chu kan hawi rual a, vanneihthlak takin a lo la muttui khawp mai.

 

"Min dahthla vat rawh" ka ti hmak a.

 

"I khum chu a te sia ka khumah insawn mai ang" a rawn ti dut dut a. A chip sama kek in, "mi â min dahthla vat rawh" ka ti hmawk hmawk a.

 

"Ana, i bengchen chuan inu iti harh mai mai. Tha deuh khan awm rawh" tih pah chuan min pawm chhuak nul nul.

 

"Min let pui lehnghal rawh" tihpah chuan ka ke ka leng vak vak a, tha kan inngah hlei em a awmzia anei lo ngei mai. A ban puamah chuan ka seh a, a rawn rak ve tuar. Keimah zawk ka hlauthawng leh si chuan a kâ chu ka'n hup sak leh a. "I va ava hriam ve" tih melh hian min rawn melh in ka hria.

Khumah min theh thla tawp a, puan chu la in ka lu thlengin ka khuh vek a ka mu nghal hlun.

"Zawhte note inih hi" tih pah chuan arawn inthawlh ve a. Ka lo saisir khum ngat thung.

"A lum pawh iti lo mi ?" Tih pah chuan min rawn kuah a.

 

"Nangpawn lum iti bik em ni ?" Ka tih chuan anui hawk ringawt.

"Catty, min seh na hi athi nia" arawn tih chuan ka thu chhuak hluau a. Ka'n en chuan alo thi tak tak.

"Detol i nei em ?" Ka tih chuan a drawer kawk in, "tahsawn ka dah vek" ati a.

"Lapua i nei tel lo em ni ?"

 

"Hetah hian ka dah" tih pahin a khum bulah drawer chu a en ve nghal a.

"Hetiang em em a seh nat che pawh hi ka tum miah lo" inthiamlo rilru tak chung chuan ka ti nuah nuah a.

"A na viau em" ti a ka'n en chauh chuan min en lo ngur a. Ka lai lutuk chu tho tharh in, "kha nangmah in inhnawih rawh, ka mu dawn" tih pah chuan khumah chuan ka inthawlh tha leh ngawt a.

Rawn nui hawk hian arawn inthawlh zui ve a, "inhnawih ta che" ka tih chuan, "nang anga pum lian pawh tlukpui lo a ka vei theih che chuan i seh na mai mai hi chu ka tuar thei ang" arawn ti sup a. Chhang loin ka mu ngawi ta reng.

"Le min hrilh rawh le" tih pah chuan ka mutdan chu min siamrem a. En chho kiau in, "eng maw?" Ka ti haw a.

 

"I tap a"

"I ho, thil sawi hun pawh anilo. Mut hun anih hi muhil rawh tihpah chuan ka kuah nghet talh talh a.

"Nilo, I tap a chuan achhan ka hre lo"

"I hlimna leh i tahna i nun, i engkim, nangmah a thleng awm zawng zawng hi keimah vang chauh a thleng tur ani. Le sawi rawh le ?" Arawn ti dam thluam a.

A mi ngaihsakna âwka chuan ka rilru ati no leh tlat pek a. Ka'n tap leh te te a. Dawhthei taka ka tap min nghah fe hnu ah ka bang a, vawiin a ka thil hriat leh ka ngaihtuahna te chu ka hrilh vek a.

"Mak iti em ?"

 

"Tilo e"

 

"Mak iti lo mi? Deniz-i nen unau kan nih chu" inbeng kang deuh ti tih chuan ka ti a.

"Nia, ka ti hran lo. Deniz-i khan a nau a zawna a rei tawh a" arawn ti a. A âwm ah beiin ka mu leh ta hle hle.

"Unau inei chu i lawm lo em ni? I nu pawh...." A sawi zawh hma chuan a kâ chu ka hup sak a.

"Ka lawm na ai chuan ka lawm lohna atam zawk. Ka hnaih a an awm chuan ka nu nen min pawhthen ka hlau alawm"

"I nu nen a pawt then tu che apiang chu i haw dawn tihna em ni?"

"Aw, ka nu hi ka engkim ani"

"Anih chuan min haw rawh!"

"Nangin ka nu nen min then ve dawn hleinem"

"Engtik ah emaw chuan a thleng dawn alawm, hmangaih pakhat avangin hmangaih pakhat i kalsan angai dawn"

"Eng nge awmzia ?" Tih pah chuan ka inbeng kang leh ur ur a.

 

"Engmah ani lo. Mu rawh le, naktuk ah thawh hma i ngaih kha" tihpah chuan min kuai mu a, ka dar tuai deuh nghauh nghauh in ka samah chuan afawp a, keipawn ngaihtuah zui nei lemlo chuan amah kuah chial chuan ka muhil ta a.

___________________

Peih leh peih lo chuan ka meng kar a, ka mit chu ka chhing leh sawk zel a. Nizan ka mu thalo chuan awm ati nuamlo ngei mai.

"I va chau awm ve ?" Alice-i chuan arawn ti a.

"Chau lo e" tih te in ka lo chhang.

 

"Vawiin chu haw hma dil ila bazar ang aw" arawn tiru leh sa sa a.

"I û in hlawh ala mi ?" Ka lo ti nang nang a.

 

"Aih, kan hlawh lak ni anih hi. A hmasa ber ah te chuan kan bazar ve bawk dawn lo mi ?" Arawn tih chuan vawiin ah hlawh kan la dawn tih ka hre ve chiah.

 

"Hlawh kan la dawn tih pawh ka hre hleinem"

"Mi hausa bialpa inei a, pawisa pawh hi i lungkham ber tawh lo anih hi" arawn ti deuh pawng  a.